2 Juan 1 - Zapoteco de Aloápam

¹ Neti, Juan biꞌini chi anca benniola, ridhelha sitsi-ni guelu xa nuila chi becuee Tata Do Iyyabaaha acalu guee lenlu ca xiꞌinlu-na. Neti nna gualíga racatia guele. Läga sunru neti racatia guele, anáguaba raquin iyába ca benni guele, ca biꞌini chi yu ca tisa gue Tata Do Iyyabaaha rixxiꞌa nu anca gualí.

² Racatia guele de chi yuꞌu lheꞌe lastoori ca tisa rixxiꞌa nu anca gualí gue Tata Do Iyyabaaha. Ca tisa rixxiꞌa nu anca gualí-na tsaba tsuꞌe lheꞌe lastoori ttu dia liiba.

³ Tata gueri do iyyabaaha lenie Xiꞌinie Jesús Benni anque Cristu edá leque aca lenque le, esiꞌi leque le lhe uteque elha xen lasi lenle lhe. Unque aná len lebiꞌi cumu de ria lele gue nu anca gualí, de raquin gue loesle lhe.

Usiguiri udori tisa gue nu beleꞌe Cristu

⁴ Beꞌolhaba lasia atti guattiꞌaya ttulhe ca xiꞌinlu-na seꞌecana runcana nu raxxína leni ca tisa rixxiꞌa nu anca gualí, attiba chi beni Tata gueri Benni do iyyabaaha mandadu unri.

⁵ Nnanna nna ca benni ria le Jesús, racatia guele, rinnaba lole, aquin gue loesle ttule lhe attule lhe. Unní läga ancana attu nu cubi runia mandadu unle, la ca tisa-nba benniha bieninri primeroha li.

⁶ Atti seꞌeri rudori tisa runri nu beni Tata Do Iyyabaaha mandadu unri, lania ruleꞌe lori raquin gue loesri. Nu benie mandadu unri nna ancana: tseꞌeri aquin gue loesri. Ca tisa-nba benniha bieninri primeroha li.

⁷ Cumu ixeru ca güen lasi chi requi yies lo yu-ni, bittu ria lecani uca Jesús Benni anque Cristu ttu benni attiba riꞌi atti bite yies lo yu-ni. Ca nu rinne aná nna nu güen lasiba anca ca unná, nu lä raca uyú Cristuhaba ancacana.

⁸ Gualudo cuidadu qui lä unnittile sina runle gue Tata Do Iyyabaaha, qui anáchu nna dhíle idaꞌa nu ralhale dhíle utee benniha len lebiꞌi.

⁹ Nuxaba bittu ruleꞌena nu beleꞌe Cristu, lana nna attu nu subi la diana runna läganu Tata Do Iyyabaaha du len unnuha. Nu rusiguina ruleꞌena nu beleꞌe Cristuha liba nna du lenna Tata gueri do iyyabaaha, du lenna Xiꞌin Benniha lhe.

¹⁰ Gansi nuxa ita roꞌo yoꞌo atta seꞌeleha nna bittu rixxiꞌana ca tisa beleꞌe Jesús, bittu ulabile nua lheꞌe lisle, lä gaguale nua: “Daca aníla ute udo”,

¹¹ cumu nu gána nua: “Daca aníla ute udo”, lania nna racana nu sela lheꞌe nu bittu anca tsee runi unnuha.

Ni riluxa run Juan lo sitsi-ni

¹² Ixeru nu racatia upea le, ttiaca bittu raca lasia unia na lo sitsi, cumu chi xen lasia ita atta seꞌele-na, qui cuinaga neti inne lania lebiꞌi. Lania nna edaca leri itú iqui itú leri.

¹³ Ca xiꞌini xilalu, delába ca biꞌini chi becuee Tata Do Iyyabaaha acacabi benni guee, ridhelhacabi ttu padiuxi guele. Amén.