2 Corintios 9 - Zapoteco de Aloápam

Pablo rinnebi adí gue úna ruttupacabi

¹ Gue unle yuda ca benni chi ancacabi gue Tata Do Iyyabaaha nna lägabi raca duelha unia lo sitsi quixxiꞌatia le gue gaxasná unle,

² cumu chiba yua lebiꞌi nna ancale benni raca leni uni yuda. Neti nna tsitsiba nu runia satíaba rpea ca benni seꞌe lo yu gue Macedonia-ni, lebiꞌi ca benni seꞌe lo yu gue Acaya, ida utehali bebequi lele unle yuda. Ca benni gue Macedonia-ni nna ixerucabi bebequi lecabi unguabacabi yuda de binacabi gue nu re lele unle.

³ Nnanna nna ridhelha ca benni ria le Jesús atta seꞌele-na qui aca xen lhasia lebiꞌi nna chiba seꞌe tseele utele úna. Análiba nna qui iría lí nu ria atti ya de nu runia rixxiꞌaya gue nu re lele unle,

⁴ quila ita ttulhe ca benni gue Macedonia-ni len neti atta seꞌele-na, nianna etettiꞌacabi le bittu seꞌe tseele len úna guele. Unnuha unna ettuintu de ancale nu xen letu ute nu chi rále utele. Anába ria de bittu raca lasia innía lebiꞌiba nua ettúxxattinle.

⁵ Denuala nna nuarca ucatia unia duelha innába len ca biꞌini ria le Jesús nneru gácabi itacabi atta seꞌele-na, qui uncabi yuda itupa úna nu chi rále uteleha qui chi te tsee nua atti isíatu. Análiba nna uleꞌe lo anca úna gueleha nu rerú iqui rerú lele rutele, bittu nu duelhaba runle rutele.

⁶ Gualorexxa lele ca tisa-ni: Nu rada xxeni xua nna xxeniguaba lena redí nua, nu bittu rada xxeniha nna bittuguaba xxeni lena redí nua.

⁷ Coa ttuttule nna utele nu rerú iqui rerú lele utele, bittu yuꞌu ttucaba lele lhe bittu exiyyinle gue nu rutele lhe cumu Tata Do Iyyabaaha racanie gue benni rute len elha redaca le.

⁸ Tata Do Iyyabaaha anque benni ra xxeni lee. Gunbe tsani iyá lo nu tsee rute guele qui gattatama nu ixuinle. Aná nna satíaba te tama guele, qui edá lele un tseerule adí len ca benni.

⁹ Lo ca sitsi gue Tata Do Iyyabaaha rixxiꞌa gue ttu benni rute tama, atta rá: Labi nna bete tamabi nu te guebi len ca benni reasani. Larcala nna nu tsee ben biꞌiniha nna tsaba läganu ixulhinna nua.

¹⁰ Tata Do Iyyabaaha Benni rute nninni rada ttu benni, rute nu ro biꞌiniha lhe. Lee nna gutebe iyáxea nu reasinle qui unle iyá lo nu tsee, udienguabe adí nu edíle gue nu tsee runle lhe.

¹¹ Aná nna gatta iyá lo elha tsee guele qui ute tamale nu reasin ca benni. Úna rutele sacaꞌantu-na anque nu uni ute ca benni xquixaru len Tata Do Iyyabaaha.

¹² Cumu úna rutele-na läga sunru ixuu benna dhi ca benni chi seꞌe riesi anca gue Tata Do Iyyabaaha nu risalocabi, anáguaba ixuu Ben-na qui utecabi adí xquixaru len Tata Do Iyyabaaha.

¹³ Ca benni dhi úna-ni nna cuequi xencabi le Tata Do Iyyabaaha gue nu runle. Cumu lebiꞌi nna läga sunru rále ria lele ca tisa gue Cristu, sinuqui rudoguabale tisa gue nu rá ca tisa-na. Anáguaba chi redá lele rutele nu reasaquinbi lhe nu reasani iyába benni lhe.

¹⁴ Lacabi nna innábaguabacabi aca len Tata Do Iyyabaaha le de racaquinbi guele, cumu ya de xxeni elha tsee bete Tata Do Iyyabaaha len lebiꞌi.

¹⁵ Xquixaba Tata Do Iyyabaaha, de ya de xxeni anca elha tsee rute lenri, riꞌi nna niba lä reselinri gaxasná quixxiꞌarie.