2 Corintios 8 - Zapoteco de Aloápam

Pablo rulisabi ca benni gue Corinto qui erú iqui erú lecabi utecabi úna

¹ Lebiꞌi ca benni ria le Jesús, nnanna nna raca letu quixxiꞌentu le gue nu tsee run Tata Do Iyyabaaha len ca benni ria le Jesús ritupa lheꞌe ca yiesi seꞌe lo yu gue Macedonia-ni.

² Lacabi nna lagüi lo tsitsiba nu ratecabi ruyúcabi elha disa, chi seꞌecabi redaca lecabi. Denua nna masquiba ancacabi benni nu ttuttíru bittu te gueni, ttiaca chi bedáru lecabi betecabi úna leni nu te guecabi.

³ Neti anca nu begüia loa, lacabi nna itú iqui itú lecabi betecabi coa teba guecabi. Xxenirla chi betecabi atti nu dica utecabi cumu anába bedá lecabi bencabi.

⁴ Tsitsiba useꞌe diticabi unnabacabi len riꞌitu qui ugüelhatu cabi igutsacabi ca benni rute úna tsia atta seꞌe ca benni chi seꞌe riesi anca gue Tata Do Iyyabaaha seꞌe lheꞌe yiesi Jerusalén.

⁵ Lacabi nna xxenrula anca nu betecabi atti nu xen letu utecabi. Primerba rácabi: “Guaseꞌebatu untu nu innába Jesucristuha.” Anáguaba nna: “Guaseꞌeguatu untu nu innále lhe.” Benbacabi attiba raca le Tata Do Iyyabaaha.

⁶ Denuala nna nuarca unnabatu len Tito usiguibi uttupabi úna nu utele itú iqui itú lele, delába nu chi udulobi ruttupabi axta ttua.

⁷ Lebiꞌiba ancale nu neru runi iyába atti adí benni: ancale nu riaru lele Tata Do Iyyabaaha lhe ancale nu reselaruni rinne lhe ancale nu yuru lhe ancale nu jertte runle yuda lhe ancale nu racaruni guetu lhe. Denuala nna anáguaba nnanna lebiꞌiba nu itú iqui itú lele uteru xxeni úna qui dhi ca benni reasani.

⁸ Neti nna läga rpea le aná de runia le mandadu bixa unle. Rixxiꞌabatia le gue gaxasná run adí benni, lacana nna chi rudo lecani rutecana itú iqui itú lecani nu reasani adí benni, qui anáguaba lebiꞌi nna uleꞌe lole gansi gualíguinle raquinle gue adí benni.

⁹ Cumu lebiꞌi nna chiba yule ya de tsee run Jesucristu Benni bananie ri-na len ca benni. Lee nna anque Benni texxatta guee. De ucabanie guele nna uque Benni bittu te gueni atti bite yies lo yu-ni. Uca Benniha benni bittu te gueni qui anía liba nna ucale nu gatta gueni iyyabaaha.

¹⁰ De runba qui salía tseenle nuarca rpea le nu racatia anca tsee unle. Lebiꞌi nna ida utehali nna tseeba chi udulole betele úna, läga sunru biriequile aca aná, sinuqui benle na itú iqui itú lele.

¹¹ Nnanna nna gualusigui itú iqui itú lele gualuni nu chi rále unleha axta qui lhuxana. Attiba udulole benleha berú iqui berú lele betele úna, aníaguaba nnanna gualutteba coa teba guele.

¹² Cumu nu gualíguinna rerú iqui rerú leni rutena úna, Tata Do Iyyabaaha nna ridíbe baneda ttixaba rutena coa teba gueni, cumu Tata Do Iyyabaaha läga rinnaba Benniha nu bittu te gueri.

¹³ Neti nna läga ria le gualute nu reasin benni axta gattatama gueni, laca lebiꞌi nna seꞌele reasa guele.

¹⁴ Nnanna nna lebiꞌi nna tsapa te guele larcala nna guacaba utele nu reasani adí benni, attu sá nna cunná acacana nu gattatama gueni, lania nna utecana nu reasinle. Aná nna ttulapaba tseꞌe iyále.

¹⁵ Attiba rá lo ca sitsi gue Tata Do Iyyabaaha atta riguixxiꞌa gue lena bani lá “maná” daa iyyabaaha: “Läbiguaba bexxa gue nu bediga xxeniha, niguaba lä beasa gue nu bediga saroꞌorba lhe.”

Tito lenbi a chupa ca benni diacabi Corinto

¹⁶ Neti nna rutea xquixaru len Tata Do Iyyabaaha de benie richacha iqui Tito gue salía tseenle, attiguaba neti richacha iquia gue salía tseenle.

¹⁷ Labi nna guadiba lebi idhelha bi atta seꞌele-na, cumu tsitsiguaba rdacabi itabi güenalhi le, nnanna nna lababi uca lebi dabi ettenalibi le.

¹⁸ Len Tito idhelatu ttu unbiyuu ria le Jesús. Gue biꞌin-ni nna tseeba rinne ca benni ria le Jesús ritupa lheꞌe iyá ca yiesi-na de tseeba rixxiꞌabi ca tisa gue Jesús.

¹⁹ Güeaniba, laguaba ca benni ria le Jesús ritupa lheꞌe ca yies-na becueecabi biꞌin-na itabi len riꞌitu qui unbi yuda uttupatu úna utte ca benni. Nu runtu-ni nna ancana nu runi ribequi xen ca benni le Tata Do Iyyabaaha, anáguaba qui ruleꞌe lo riꞌitu nna redába letu runtu sina-ni qui aca ca benni yuda.

²⁰ Labi nna dabi len riꞌitu qui aná nna bittu utetu lo neda inne benni guetu gue bixa run lentu úna ruttupatu-ni cumu xxeni ben-na.

²¹ Riꞌitu nna läga sunru lo Tata Do Iyyabaaha runtu untu nu anca tsee, sinuqui runguabatu untu nu anca tsee lo ca benni.

²² Ridhelhaguabatu attu biꞌini ria le Jesús attiba riꞌi len ca biꞌin-na. Labi nna ixe libe chi beleꞌe lobi ancabi benni radi lebi runbi sina-ni, itú iqui itú lebi runbi yuda lhe. Adílaba nnanna de ancale benni xenxxatta lebi gueni nna itú iqui itú lebi unbi yuda.

²³ Gansi nuxa benni innába tisana gue Tito-ni, lebiꞌi nna gále cana biꞌin-na ancabi umpanieru quia. Labi rixuutia qui runtu le yuda. A chupa ca biꞌini ria le Jesús daa len Tito-na ancacabi benni udhelha ca benni ria le Jesús ritupa lheꞌe adí ca yiesi-ni. Sina nu runcabi nna anca nu runi qui ribequi xen ca benni Cristu.

²⁴ Larcala nna qui una adí ca benni ria le Jesús ritupa lheꞌe adí ca yiesi-na lebiꞌi nna gualíba raquinle gue ca benni ria le Jesús, gualuleꞌe lo len ca biꞌin-ni, lebiꞌi nna gualíba raquinle gue ca benni ria le Jesús, qui anáchu nna bittu aquin benni dequi cuentaba rinne tseetu guele.