2 Corintios 7 - Zapoteco de Aloápam

¹ Lebiꞌi ca benni ria le Jesús racatia guele, unní chi gaꞌanani Tata Do Iyyabaaha unie len riꞌi. Denua nna nuarca cuari iyáxea nu lä anca tsee runi ritsiga cuerpu gueri-na lo Tata Do Iyyabaaha, nu runi ritsiga espíritu do lheꞌe lastoori-na lhe. De yuꞌu elha rasi gue Tata Do Iyyabaaha lheꞌe lastoori, larcala ttuttu sá iriesri lheꞌe nu lä anca tsee qui acaruri benni radi le Ben-na.

Redaca le Pablo de bodú xiyyana ca benni gue Corinto

² Gualgüelha eyoꞌotu lheꞌe lastoole attu libe. Ni ttule lägabi chi bedhaquintu, nuttuguaba nule chi dia nitti lo niꞌa gue nu bentu lhe läbiguaba chi uxí yietu le lhe.

³ Läga rpea le aná qui udelhiyya le. Attiba chi rpea le ttua, lebiꞌi nna lhiꞌu lheꞌe lastooliha yuꞌule. Masquiba bixa aca neti nna guadúba len lebiꞌi, atti seꞌe banri yies lo yu-ni lhe sila gattiri lhe.

⁴ Neti nna itú iqui itú lasba rinnea len lebiꞌi. Ttsitsiba nu runia atti rixxiꞌatia benni gue nu runle. Lebiꞌi runi redíxxatta elha xen lasi, attulade redú itta lasia lagüi lo atti ratetu ruyútu iyáloba elha disa.

⁵ Desdeba atti bisíatu lo yu gue Macedonia-ni nna tsa lägabi chi beaca letu, cumu gaxaba nua diatu nna ratiꞌatu te utilha. Chi begüeecana riꞌitu lhe uxítu elha rasi lhe.

⁶ Ttiaca Tata Do Iyyabaaha Benni rute elha xen lasi len ca benni seꞌe siꞌi-na nna bote elha xen lasi lentu atti bisía Tito atta seꞌetu-ni.

⁷ Läga sunru de bisíabi atta seꞌetu ni bedítu elha xen lasi, anáguaba de biyútu labi nna tsitsiba tsee re lebi lo niꞌa gue nu runle. Labi utixxiꞌenbi riꞌitu lebiꞌi nna attulade rdacale ilenle riꞌitu attu libe, chi seꞌele re leninle gue nu ucaha lhe chi richacha iquile quia lhe. Iyonna beni nna chi redacaru lasia adí.

⁸ Masquiba useꞌe siꞌile lo niꞌa gue nu rá lo sitsi udhelha gueleha, nnanna nna lärgabirua raca guatetia gue nua. Ttu laniaba uca guatetia de bina useꞌe siꞌile lo niꞌa gue nu rá lo sitsiha, masquiba läga isá useꞌe siꞌile.

⁹ Nnanna nna reꞌo lasia, ttiaca läga de useꞌe siꞌile. Neti nna reꞌo lasia de beni nu useꞌe siꞌileha bodú xiyyanle gue nu runleha. Laba Tata Do Iyyabaaha uca lee useꞌe siꞌile, larcala nna lägabi chi ben riꞌitu qui satele de lo niꞌa gue nu bentuha.

¹⁰ Cumu nu riseꞌe siꞌiri anca gue Tata Do Iyyabaaha nna runna rodú xiyyanri. Unnuha nna runi rodilá Ben-na ri. Larcala nna läga dica aca guatenri gue nu runi Tata Do Iyyabaaha riseꞌe siꞌiri. Ttiaca gansi riseꞌe siꞌiri attiba riseꞌe siꞌi ca benni seꞌe yies lo yu-ni nna elhuttiba che unná gueri lo Tata Do Iyyabaaha.

¹¹ ¡Gualgüiarga! Nu beni Tata Do Iyyabaaha useꞌe siꞌileha nna tonáli nu beni nua: chi benna bichacha iquile gue nu ucaha lhe chi benna utixxiꞌale bixa lo niꞌa gue benle anía lhe chi benna biseꞌenle gue nu ucaha lhe chi benna uyuꞌu elha rasi lheꞌe lastoole lhe chi benna tsitsiba uquinle ttixa aca uyúle neti lhe chi benna uquinle quia lhe chi benna bebequi lele bixa anca nu unle leni nu te tulha gueniha lhe. Iyába nu benle-na ruleꞌe lo läga lebiꞌi ancale nu te tulha gueni gue nu ucaha.

¹² Larcala nna läga de belaba lasia gue benni te tulha guen-na, atti benia lo sitsi udhelha atta seꞌele-na, niguaba de belaba lasia gue benni guate biyú elha disa lo niꞌa gue nu beni benni te tulha gueni gue nu ucaha lhe. Benba lo sitsi-na qui aní lo Tata Do Iyyabaaha uleꞌe lo lebiꞌi nna richachalha iquile guetu.

¹³ Unní anca nu rote elha xen lasi lentu. Ttiaca läga sunru elha xen lasi-ni uxítu, adírla bedaca letu bilentu de attula tsee re le Tito, cumu lebiꞌi nna iyábale bettipale lebi qui do tseebi.

¹⁴ Aná nna läga benle ettútia gue nu ria cumu chila rpea Tito, lebiꞌi nna attulade tsee du lele. Delába unnuha nna attiba gualíbintu bixa rátu le, aníaguaba guaxxína gualíba iyá nu rátu Tito gue bixa lo niꞌa gue yopixxattintu le.

¹⁵ Tito nna adílaba raquinbi guele atti rexxa lebi lebiꞌi nna iyábale bedole tisa, atti rexxa lebi gue itú rixidibale rasinle atti guatsále bi lhe.

¹⁶ Neti nna reꞌo lasia nnanna de ancale nu itú iqui itú lasia xen lasia gueni.