2 Corintios 6 - Zapoteco de Aloápam

¹ Riꞌitu ancatu benni runi yuda lo sina gue Tata Do Iyyabaaha, denua nna rinnabatu lenle bittu udelha lattile elha tsee bete Tata Do Iyyabaaha lenle.

² Cumu lo ca sitsi guee-na rinnee re: Neti nna bienbatia guelu la sá atti chi gaꞌanatia iyientia guelu, la sá gaꞌana lháluha nna ucaba lania lu. Gualuyurga, nnanna nua tiempu tsee. ¡Nasá nua anca sá lhá ca benni qui bittu tsia nitticana!

Nu guate Pablo de rixxiꞌabi ca tisa gue Jesús

³ Riꞌitu nna lägabi runtu ttu bixa nu uni ichecu ca benni lo neda gue Tata Do Iyyabaaha, qui bittubi teequinna inne güecana gue sina gue Tata Do Iyyabaaha runtu-ni.

⁴ Nu runlatu nna ruleꞌe lotu leni bixaba runtu, riꞌitu nna ancatu benni runi sina gue Tata Do Iyyabaaha. Ancatu benni rugo ruchíatu atti ruyútu elha disa, atti bixa reasintu lhe lo iyába nu ratetu lhe

⁵ atti ritsacana lheꞌetu lhe atti rattatu lisiyya lhe atti risatsa benni rebiꞌa nocana riꞌitu lhe. Ruchíatu lo ca sina tsitsi lhe lo atti rebequitu bisiela lhe lo atti rutte bina lheꞌetu lhe.

⁶ Ruleꞌe lo guatú ancatu benni bitturu runtu nu lä anca tsee, yutu gue nu anca gualí lhe ancatu benni du pasensi leni lhe ancatu benni du tsee leni lhe. Ruleꞌe lotu du Espíritu gue Tata Do Iyyabaaha len riꞌitu lhe ancatu nu gualígani racani gue ca benni lhe

⁷ rixxiꞌatu nu anca gualí lhe. Ancatu benni ruleꞌe lo elha uca lani ra xxeni le gue Tata Do Iyyabaaha lhe. Cumu beoni Tata Do Iyyabaaha ri benni tsee loe. Riꞌitu nna rutsá dutu lo ca benni attiba soldado deni iyá lo nu rixuinna ritilhana.

⁸ Guadú nna rapacana riꞌitu respeto, a guadú nna riguꞌu niꞌacani riꞌitu. Guadú nna tseeba rinnecana guetu, a guadú nna rinne güecan guetu. Guadú nna rácan dequi runba letu, ttiaca guancabatu benni rinne nu gualí.

⁹ Ruyúcan riꞌitu attiba ttu nu bittu ancabiaquinna ttiaca guanca biatsittabaquinna riꞌitu. Lacana runcana dequi chiba uttitu, ttiaca requi banbatu. Rugüeguabacan riꞌitu, ttiaca läga rattitu.

¹⁰ Ruleꞌe attisiba seꞌe siꞌitu, ttiaca satíaba seꞌetu redaca letu. Ancabatu benni bittu te gueni, ttiaca ixe benni runtu racacana nu tee gueni len Tata Do Iyyabaaha. Guannalu tsaba bittubabi te guetu, ttiaca len Tata Do Iyyabaaha iyába te guetu.

¹¹ Lebiꞌi ca benni ria le Jesús seꞌe Corinto, lhixxa suba unnetu belisatu le, lägabi bedhea letu. Iyába nu yuꞌu lhiꞌu lheꞌe lastootu chi utixxiꞌentu le.

¹² Lägabi rudhea letu len lebiꞌi lebiꞌi bunna rudhea lele len riꞌitu.

¹³ Nnanna nna rinnaba lenle, attiba ttu tata rinnabana len ca xiꞌinni. Gualosiꞌi guetu, bittu udhea lele lentu, attiba riꞌitu bittu rudhea letu len lebiꞌi.

Riꞌi ancari yotu gue Tata Do Iyyabaaha

¹⁴ Bittu utsequi tisa guele len ca benni bittu ria le Cristu: cumu läga ttudi anca nu anca tseena len nu lä anca tseena lo Tata Do Iyyabaaha. Bittuguaba raxxína xieni-na len chulha-na.

¹⁵ Cristu nna läga aca dho tsee Ben-na len nu xxegüiha. Bittuguaba dica isela ttu nu ria leni Cristu len ttu nu bittu ria leni Ben-na lhe.

¹⁶ Anáguaba läga raxxína ca nu bittu gualí anca diosi-na leni yotu gue Tata Do Iyyabaaha. Riꞌi ancari yotu gue Tata Do Iyyabaaha Benni bani. Tata Do Iyyabaaha nna re lo ca sitsi atta dia ca tisa guee-na: “Neti nna dhua lencana, tsequia atta seꞌecana lhe. Neti aca Dios guecani, lacana nna acacana benni quia.”

¹⁷ Denuala nna nuarca unne Tata Do Iyyabaaha re: “Gualiría lheꞌe atta seꞌe ca nu bittu ria lequinna gualiries ca unná, bittu sattanale nu anca tsiga lhe neti nna gulabiba le.

¹⁸ Lania nna neti aca Tata guele, lebiꞌi nna aca le xiꞌinbiyuua lhe xiꞌiniunnáya lhe. Aná rá Benni bananie ri-na, Benni rinnabia iyáxea.”