2 Corintios 5 - Zapoteco de Aloápam

Iyyabaaha edíri attu cuerpu cubi gueri

¹ Cuerpu gueri-ni ancana attiba ttu yoꞌo bittu ritiani nu doni benni ttu sattiba. Ttiaca gua yubari gansi yoꞌo-ni iseꞌelona, Tata Do Iyyabaaha nna gutebe ttu yoꞌo gueri nu bittu beni benni, delába attu cuerpu gueri nu itíani ttu tsaba iyyabaaha.

² Denuala nna nuarca renne leri laca seꞌeri lheꞌe cuerpu rapari-ni, cumu rdacari etaꞌari lheꞌe cuerpu ute Tata Do Iyyabaaha lenri.

³ Aná nna läga tseꞌeri lä caaba cuerpu gueri, cumu chiba te tsee ttu cuerpu cubi anca gue iyyabaaha dhíri lania.

⁴ Laca seꞌeri yies lo yu-ni lheꞌe yoꞌo nu anca cuerpu gueri-ni nna renne leri ruyúri elha disa. Riꞌi nna läga rdacari eríari lheꞌe cuerpu rapari-ni, rdacabari etaꞌari lheꞌe cuerpu ute Tata Do Iyyabaaha lenri. Aná nna elha nabani gatta ttu dia lii gueri iyyabaaha unie lhuxa nu anca elhutti gueri yies lo yu-ni.

⁵ Laba Tata Do Iyyabaaha chi boseꞌe tsee ri qui aca iyá unní lenri. Chi bete Espíritu guee-na lenri qui aca xen leri gunbe iyá nu chi re unie.

⁶ Larcala satíaba xen suba leri seꞌeri, masquiba yubari laca seꞌeri yies lo yu-ni len cuerpu rapari-ni nna idittuba seꞌeri len atta do Benni bananie ri.

⁷ Laca seꞌeri yies lo yu-ni, riꞌi nna de riaba lerie nuarca ruxxen lerie, läga de chi rilenrie.

⁸ Denuala nna xen suba leri seꞌeri. Riꞌi nna raquinri tseeru anca eríari lheꞌe cuerpu rapari yies lo yu-ni qui eyyari atta do Benni bananie ri-na.

⁹ Larcala nna rudo leri runri nu radi le Benni bananie ri-na laca seꞌeri yies lo yu-ni lhe atti esínri iyyabaaha lhe.

¹⁰ Cumu raca duelha utsá du iyári lo atta do Cristu runie elha uxtisi, qui ttu tturi nna dhíri nu ralhari coa ancaba nu benri atti useꞌeri yies lo yu-ni, si ancana nu tsee o si nu bittu anca tsee lhe.

Pablo rixxiꞌenbi ca benni gaxasná eyaca tseecana len Tata Do Iyyabaaha

¹¹ Larcala nna riꞌitu nna de yuꞌu elha rasi gue Tata Do Iyyabaaha lheꞌe lastootu, nuarca runtu duelha tsia le Benni Ben-na. Tata Do Iyyabaaha gua yuxeabe gaxasná du letu. Neti nna ruxxen lasia anáguaba lebiꞌi guna tseebale gaxasná du letu.

¹² Läga daa riꞌitu attu libe rixxiꞌentu le dequi riꞌitu ancatu nu runi nu tsee qui eyaꞌan tseetu len lebiꞌi. Riꞌitu nna runbatu qui cuequi xen lele gue nu runtu. Aná nna te roꞌole ecabile gue ca nu runi ttaba gue nu racana ancacana, ttiaca bittu rugüicana gue gaxasná anca lhiꞌu lheꞌe lastoocani lo Tata Do Iyyabaaha.

¹³ Gansi ca benni rácana dequi riꞌitu ancatu nu raca iquini, Tata Do Iyyabaaha guayúbe bi gue runtu aná. Ttiaca gansi len lebiꞌi nna ancatu nu rinne lhatsiru attiba ancaba gueni nna runbatu aná qui salía tseenle.

¹⁴ Cumu nu racani Cristuha gueri, rudo besina riꞌitu untu nu runtu-ni. Cumu chiba yuxeabatu Cristuha uttie lo niꞌa gue iyábari. De unnuha nna iyábari ancari benni uttiguaba lenie.

¹⁵ Cristu uttie lo niꞌa gue iyába benni, qui ca benni chi te elha nabani guecani lo Tata Do Iyyabaaha nna bitturu tseꞌecana uncana nu racaba lecani, sinuqui tseꞌecana uncana nu raca le Cristu Benni uttie lhe beacanie lhe lo niꞌa guecani.

¹⁶ Larcala nna riꞌitu nna bitturu ulaba letu gue nuxa benni attiba rulaba le ca benni seꞌe yies lo yu-ni. Masquiba ca tu ttua nna belaba letu gue Cristu attiba rulaba le ca benni seꞌe yies lo yu-ni gue Ben-na, ttiaca nnanna nna lärga anía rulaba letu guee.

¹⁷ Larcala nna benni chi babana len Cristu nna chi beacana ttu benni cubi. Iyába nu run nua ttua nna chi bocaꞌanna. Benni cubiba chi ancana nnanna.

¹⁸ Iyába unná nna ancana nu runi Tata Do Iyyabaaha len riꞌi. De nu guate Cristu lo ya crusiha, beni Tata Do Iyyabaaha beaca tseeri lenie. Lee nna bocaꞌane lentu quixxiꞌentu ca benni gaxasná eyaca tseecana lenie.

¹⁹ Delába Tata Do Iyyabaaha bixuunie Cristu qui benie eyaca tsee ca benni len lee. Lee nna uxíe elha xen lasi gue ca tulha guecani. Len riꞌitu nna bocaꞌane quixxiꞌentu ca benni gaxasná eyaca tseecana lenie.

²⁰ Larcala nna riꞌitu ancatu benni udhelha Cristu quixxiꞌatu ca tisa guee, attisiba Tata Do Iyyabaahaba Ben-na rinnee lenle atti rixuunie riꞌitu rinnetu rátu: “Cristuha udhelhe riꞌitu gátu le gualeaca tsee len Tata Do Iyyabaaha.”

²¹ Cristu nna lägabi ben Benniha ni ttu nu lä anca tsee. De lo niꞌa guebari nna bejúa Tata Do Iyyabaaha Benniha yua lo niꞌa gue ca tulha gueri, qui de nu guate Benniha nna beoni Tata Do Iyyabaaha ri benni tsee loe.