2 Corintios 3 - Zapoteco de Aloápam

Pablo rabi: “Riꞌitu quixxiꞌentu ca tisa cubi”

¹ Atti rátu aná nna ¿si rquinle dequi bededú lo dacabatu attu libe la riꞌibatu rixxiꞌentu le dequi riꞌitu ancatu nu runi nu tsee? O, ¿raca duelha uleꞌentu le sitsi rixxiꞌa loni nuxa ancatu? O, ¿innábatu lenle utele sitsi lentu nu rixxiꞌa loni nuxa ancatu attiba run ttulhe ca nu requi-na? ¡Dica!

² Lebiꞌi ancale attiba sitsi rixxiꞌa loni gue nuxa ancatu yuꞌu lhiꞌu lheꞌe lastootu. Nuxaba benni rilenna gaxasná runle raquinna tseeba anca sina bentu len lebiꞌi.

³ Lebiꞌi ruleꞌe lo ancale attiba sitsi beni Cristu letra loni. Riꞌitu bixuunie attiba ttu lápiz qui uca letra lo sitsi-na, läga len tinta uca letra loni, leni Espíritu gue Tata Do Iyyabaaha Benni doe anque Benni bani uca letra loni. Bittuguaba uca ca tisa-na lo iyya bata lhe. Lhiꞌu lheꞌe lastoo benni liba ucaque.

⁴ Riꞌitu nna xenba letu gue nu rátu-ni lo Tata Do Iyyabaaha de babatu len Cristu.

⁵ Gua yubatu, läga ancatu nu ridá runi ttu bixa. Tata Do Iyyabaahaba raca lanie riꞌitu qui ridátu runtu ttu bixa.

⁶ Labe chi benie acatu benni ixuunie quixxiꞌa ca tisa cubi gue nu chi begüee tisa unie len ca benni. Tisa cubi rixxiꞌatu-ni nna läga anca ben-na nu dia lo ca ley bodhaꞌana Moisés. Ancaba ben-na nu anca gue Espíritu gue Tata Do Iyyabaaha. Cumu ca ley-na rudelhiyyaba ca ben-na ri qui gattiri ttu tsaba. Espíritu gue Tata Do Iyyabaaha nna rute elha nabani gueri.

⁷ Ca ley uca lo ca iyya bocaꞌana Tata Do Iyyabaaha leni Moisés, ca benni rudelha iyyaque ri qui gattiri, ucaque benni ra xxeni leni gaꞌana tsee. Larcala atti beche Moisés ca iyyaha atta seꞌe ca benni Israel, niba lä uca ugüia ca nua lo biꞌiniha cumu racalaa lobi de uyuꞌu xieni gue nu xxeni ra le Tata Do Iyyabaaha, masquiba nu racalaa lo Moisés chila dia nua renitti lona.

⁸ Gansi aníali de xxeni ra le ca ley uxí Moisés, ¿ttiliga xxeni ra le nu runi Espíritu gue Tata Do Iyyabaaha len riꞌi?

⁹ Gansi aníali de xxeni ra le ca ley dia lo ca iyya uxxí Moisés, ca benni rudelha iyyaque ri gattiri, adílaba de xxeni ra le ca tisa cubi, ca benni rixxiꞌacanie ri Tata Do Iyyabaaha rigúe ca tulha gueri qui reonie ri benni tsee.

¹⁰ Cumu ca ley ca benni uca nu ra xxeni leque-na, lärga ancaque nu ra xxeni leni gansi ruquetiri que leni ca tisa cubi-na, ca tisa cubi-naba ancaque benni raru xxeni leque.

¹¹ Gansi ca ley benni sattirba bechíaque-na ucaque nu ra xxeni leni, adílaba de nu ra xxeni leni anca ca tisa cubi ca benni tsa bittu lhuxa-na.

¹² Larcala de xen letu gue ca tisa-na nuarca rinnetu itú iqui itú letu.

¹³ Riꞌitu läga runtu atti beni Moisés. Labi nna betto lobi len ttu lari qui bittu iláni ca benni Israel gaxasná deyya renitti lo nu racalaa gue xieni uyuꞌu lobiha.

¹⁴ Ttiaca ca benni Israel nna bittu uca lecani sadú lecani nu rá ca tisa-na. Nuarcala nna axtaba nnanna gansi chi rulabacana nu rá ca tisa bocaꞌan Tata Do Iyyabaaha len lacana atti nía, attisiba sna xuaba lariha locani. Cumu ria liba lecani Cristu lania liba ritúa lariha locani.

¹⁵ Axtaba nnanna gansi chi rulabacana lo ca sitsi atta dia ca tisa bocaꞌan Tata Do Iyyabaaha leni Moisés, attisiba lariaba nua rixúatteba lo lastoocani. Unnuha bittu rugüelhana sadú lecani.

¹⁶ Ttiaca atti ria leri Benni bananie ri-na, lari nu bittu rugüelhana ttedeenriha nna ritúattebana.

¹⁷ Cumu Benni bananie ri-naba Ben-na anque Espíritu, larcala nna Benni do Espíritu gue Benni bananie ri-na lheꞌe lastooni nna chi ancana Benni ulá lo nu rudelha iyyan-na.

¹⁸ Larcala iyábari atta bitturu xua lariha lori, chi ruleꞌe lori nu xxeni ra le Benni bananie ri-na attiba ttu iyyaguana riguꞌu xieni. Riꞌi nna diari resíari reacari attiba lee. Sá sába diari ruleꞌe lori nu xxeni ra le Benniha. Unní runi Benni bananie ri anca Espíritu-na.