2 Corintios 2 - Zapoteco de Aloápam

¹ Denua nna nuarca boquinna iquia bittu ita ettenalia le attu libe qui bittu edeseꞌe siꞌile.

² Cumu gansi neti unia tseꞌe siꞌile nna ¿núla unna edaca lasia gansi läba lebiꞌi ca benni unia tseꞌe siꞌi?

³ Denuala nna larca benia lo sitsi udhelha guele, qui atti isíaya atta seꞌele-na, bittu unle dho siꞌa, lebiꞌi ca benni dica unle edaca lasia. Neti nna yuxeaba, atti doa redaca lasia nna lebiꞌi nna aníaguaba redaca lele.

⁴ Ttiaca atti benia lo sitsiha, ribesia de rulaba lasia guele lhe de richachaxxatta iquia guele lhe. Neti nna läga benia lo sitsi udhelha gueleha qui tseꞌe siꞌile. Benba nua qui ttedeenle de ya de racatia guele.

Pablo rulisabi ca benni seꞌe Corinto dhicabi elha xen lasi gue benni beni useꞌe siꞌicabi

⁵ Benni beni useꞌe siꞌiriha nna läga sunru neti beni unná dho siꞌa, anáguaba lattiba la beale uni unná tseꞌe siꞌile. Ttonába nu ria de bittu raca lasiatte lo bedáya len nu ria.

⁶ Careꞌaba nu chi rá ixele unna qui quixana gue nu ben-na. Bitturubi udhaquinle na.

⁷ Nu unlale nna gualdhíla elha xen lasi gueni, gualeon leni lhe qui lä udhá iqui unná ria leni Jesús de relenxxattabinna gue nu ben-na.

⁸ Larcala nna rinnaba lenle gualuni qui ttedeenna gua racabinle gueni.

⁹ Denuala nna benia lo sitsi udhelha gueleha atta rinne gue nu ria-ni, cumu unnuha uni uleꞌe lo gansi gua seꞌerle udole tisa gue iyá nu rpea le.

¹⁰ Larcala nna nuxa dhíle elha xen lasi gueni gue ttu bixa ben-na, neti nna guadíba elha xen lasi gue nua. Gansi te ttu bixa dhíri elha xen lasi gueni, neti nna de lebiꞌiba nna uxía elha xen lasi gueni aní lo Cristu.

¹¹ Análiba nna bittu dhaa nu xxegüiha lori, cumu riꞌi nna chiba yuri gaxasná rulaba leni unna len riꞌi.

Ca benni rixxiꞌa ca tisa cubi

¹² Atti bisína lheꞌe yiesi lá Troas qui quixxiꞌaya ca tisa gue Cristu, Benni bananie ri-na, masquiba tseeba udhalie lo neda quia qui quixxiꞌaya ca tisa guee-na nía,

¹³ ttiaca cumu länu Tito biꞌini ria le Jesús attiba riꞌi biyúa nía, neti nna bittu uca xen lasia. Denua nna nuarca bechú tisa loes lania ca biꞌini seꞌe nía, qui diaya daca Macedonia.

Pablo rutebi xquixaru len Tata Do Iyyabaaha

¹⁴ Ttiaca xquixaba Tata Do Iyyabaaha satíaba runie ridátu de babatu len Cristu. Lee nna rixuunie riꞌitu qui runa ca benni ca tisa guee-na. Ca tisa rixxiꞌa gue nu anca guee-na, Ben-na dia risina lheꞌe iyába yiesi anque attiba ttu nu rure tsee daa tsiꞌini itúba lheꞌe ttu yoꞌo.

¹⁵ Cumu riꞌitu ancatu attiba ttu nu rure ixixxi rute Cristuha lo Tata Do Iyyabaaha. Ancabatu attiba ttu nu rure ixixxi, dia risinna atta seꞌe ca benni rilácana lhe atta seꞌe ca benni dia nitti lhe.

¹⁶ Len ca benni dia nittina nu rixxiꞌatu nna ancana nu rure attiba rure nu yatti che elhutti guecani, len ca benni rilá nna nu rixxiꞌatu ancana attiba ttu nu rure tsee che elha nabani guecani. Larcala nna läganu te dhana unna loesi sina runtu-ni gansi bittuba du Cristuha len lana.

¹⁷ Cumu riꞌitu nna läga requitu güerixxi ca tisa gue Jesús qui dhítu belhi atti runi ixe benni. Guayuxeaba Tata Do Iyyabaaha, riꞌitu nna rinnebatu nu anca gualí cumu ancatu benni udhelha Ben-na, benni baba len Cristu lhe.