2 Corintios 13 - Zapoteco de Aloápam

Len ca tisa-ni rulhuxa Pablo runbi lo sitsi

¹ Ni eyonna libe ita atta seꞌele-na. Iyába bixa guacaba elha uxtisi gueni, ladiba seꞌe chupa o tsunna benni begüia locani gue nu uca.

² Atti berupa libe bita atta seꞌele-na, lania belisaba ca nu ttu benla nu lä anca tsee-na, anáguaba adí ca nu runi aná lhe. Nnanna doa idittu nna rulisa cana attu libe. Atti ita attu libe atta seꞌele-na, bittu satúa lasia ca nu beni nu lä anca tsee ttuha, niguaba nuxarua lhe.

³ Cumu lebiꞌi nna raca lele ttedeenle gansi gualíga Cristuha Benniha rinne atti rinnea. Cristu läga anca Ben-na attiba ttu nu bittu ra tsitsi leni qui bittu eyaxanie bixa udhaque le, sinuqui nu ra xxeni lee anca Ben-na len lebiꞌi.

⁴ Gualíba utti Benniha lo ya crusi, uque attiba ttu benni bittu ra tsitsi leni, ttiaca nnanna doe banie ruleꞌenie ri elha ra xxeni lee gue Tata Do Iyyabaaha. Anáguaba riꞌitu, ancaguabatu attiba ttu nu bittu ra tsitsi leni attiba uca Benniha lo ya crusiha, ttiaca de babatu len Cristu, elha ra xxeni lee gue Tata Do Iyyabaaha runie yuꞌu elha nabani guetu, qui aná nna ixuutu len lebiꞌi.

⁵ La lebiꞌiba gualtsatsa niꞌa gue nu anca guele, qui ttedeenle gansi gualí ria tsitsi lele Jesús. Gualcuꞌu bia la lebiꞌiba. ¿Si bittuba ritedeenle yuꞌu Jesús Benni anque Cristu lheꞌe lastoole? Gansi bitturba Benniha yuꞌu lheꞌe lastoole nna lebiꞌi nna lärga gualínle ria lele Ben-na.

⁶ Neti nna xenba lasia lebiꞌi nna guate daabinle gualíba ancatu benni chi gaꞌanani Tata Do Iyyabaaha iche ca tisa guee.

⁷ Riꞌitu nna rinnabatu lo Tata Do Iyyabaaha qui bittu unle nu lä anca tsee. Läga runtu aná qui uleꞌe lo riꞌitu ancatu nu ridá lo sina runtu-ni qui eyaꞌan tseetu. Rinnabatu loe qui lebiꞌi nna unle nu anca tsee, masqui uleꞌe lo dequi riꞌitu nna ancatu nu bittu líntu len nu runtu.

⁸ Cumu riꞌitu nna läga aca guetu udú situ sina runi ca tisa riguixxiꞌa nu anca gualí. Sunruba raca guetu runtu rexú ca tisa riguixxiꞌa nu anca gualí.

⁹ Larcala nna reꞌo letu atti ancatu attiba ttu nu bittu ra tsitsi leni, qui anía nna ancale nu run tsitsi. Riꞌitu nna usiguibatu innábatu lo Tata Do Iyyabaaha aca lanie le qui eꞌeyule acale nu seꞌe tsitsi lo neda guee.

¹⁰ Denua nna runia lo sitsi ridhelha atta seꞌele-na nnanna doa idittu, qui gansi chi bisíaya atta seꞌele-na bittu udhaca disa le, cumu Benni bananie ri-na bodhaꞌane las náya useꞌe tsitsia ca benni lo neda guee, läga bocaꞌan Ben-na las náya qui quinia ca benni iyya lo neda guee.

¹¹ Ca benni ria le Jesús, qui ulhuxa nu rpea le-ni, lebiꞌi nna gualcuequi itta lele, gualun duelha tseꞌe tsitsile lo neda gue Tata Do Iyyabaaha lhe gualuttipale loesle lhe ttuba anca nu gualulaba lele lhe lhatsiru gualtseꞌe len loesle lhe. Tata Do Iyyabaaha Benni racanie gueri-na guadúbe len lebiꞌi. Lee runie seꞌeri xen su lee.

¹² Gualgás loesle padiuxi attiba labi ca benni chi anca gue Tata Do Iyyabaaha runcabi.

¹³ Iyába ca benni chi seꞌe riesi anca gue Tata Do Iyyabaaha seꞌe-ni ridhelhacabi ttu padiuxi guele.

¹⁴ Jesucristu Benni bananie ri-na aca lanie le, anáguaba satíaba acani Tata Do Iyyabaaha guele lhe satíaba dho Espíritu guee len iyábale lhe. Amén.