2 Corintios 12 - Zapoteco de Aloápam

Pablo rixxiꞌabi gue nu ben Tata Do Iyyabaaha bilenbi

¹ Gualíba lägabi riría len benni runna ttaba gue nu runna. Ttiaca raca duelha quixxiꞌaya gue nu chi beleꞌetia, nu beni Benni bananie ri-na bilátia.

² Neti nna ancabiatia ttu unbiyuu ria leni Cristu. Chi uca sitá ida atti uche Cristu biꞌiniha axta nu beyonna iyyabaaha. Neti nna bittu yua, sunruba Tata Do Iyyabaaha yue, si suntteba espíritu gue biꞌiniha güia nía, aca. Si itupaba cuerpu gue biꞌiniha uche benniha nía, aca.

³ Gua yuba netiba nua unbiyuu uche Cristu lo yu gaꞌana tsee atta do Tata Do Iyyabaaha, ttiaca bittu yua si itupa cuerpu quia-ni, aca, suntteba espíritu quia-ni uchee nía, aca. Sunruba Tata Do Iyyabaaha yue.

⁴ Nía bientia ca tisa nu bittu eseltia gaxasná quixxiꞌaya que, nu bittu dica quixxiꞌa ni ttu benni lhe.

⁵ Gue nu bilátia liba nna gua dica cuequi xen lasia, ttiaca gue nu anca quia nna bittu cuequi xen lasia. Larba gue anca ttu nu bittu ra tsitsi leni, gua dica unia ttaba.

⁶ Gansi neti unia ttaba nna läga gue nu lä caa elha rieni gueni nua runia, cumu neti nna rinneba nu anca gualí. Ttiaca läga unia ttaba qui bittu ulaba le benni quia anca nu raru xxeni leni atti nu riláquinna runia lhe nu rixxiꞌaya lhe.

⁷ Nu beleꞌen Tata Do Iyyabaaha neti nna anque ttu nu gaꞌana tsee xxeni. Larcala nna qui bittu tte lo bedáya unia ttaba gue nu bilátiaha nna begüeelhe utaꞌa ttu nu anca attiba ttu sitsi cuerpu quia-ni. Ttu be xxegüiha bunna rugüena neti qui bittu tte lo bedáya unia ttaba.

⁸ Tsunna libe chi unnaba len Benni bananie ri-na cue nu ratea-ni,

⁹ ttiaca Ben-na nna re neti: “Beaca xen lelu. Guadúba len lu, cumu elha ra xxen le quia-na ruleꞌe loe len ca benni ancacana nu bittu ra tsitsi leni.” Larcala nna neti itú iqui itú lasia runia ttaba gue anca ttu nu bittu ra tsitsi leni, qui aná nna satíaba tsuꞌu elha ra xxen le gue Cristu lheꞌe lastooa.

¹⁰ Denuala nna larca reꞌo lasia atti ratea ttu nu runi aca nu bittu ra tsitsi leni, atti nuxa rusía leni neti lhe atti bittu tee nu reasatia lhe atti ruría la benni neti lhe atti ruyúa elha disa lo niꞌa gue Cristu lhe cumu atti anca attiba ttu nu bittu ancana nu rea lasi, lania la anca nu run tsitsiru.

Pablo richacha iquibi gue ca benni seꞌe lheꞌe yiesi Corinto

¹¹ Lebiꞌi nna chi benle duelha quia runia attiba runi ttu nu raca iquini. Cumu lebiꞌi liba anca nu dica inne tsee gue nu runia. Neti nna läga anca nu ra güexxaru leni lo ca benni rá dequi ancacana apóstol ra xxeni lequinna masquiba anca ttu nu bittu daca.

¹² Atti urea len lebiꞌiha nna benba nu beleꞌe lo neti anca apóstol. Ucaba benni bechía lo iyába nu guatea, benba qui uca ca milagru len lebiꞌi lhe benba qui beleꞌe lo nu ra xxeni le gue Tata Do Iyyabaaha len lebiꞌi lhe.

¹³ Neti nna lägabi chi benia dequi ancale nu güexxaru atti adí ca benni ria le Jesús ritupa lheꞌe adí ca yiesi-na, sunruba bittu uca lasia utele len neti nu beasatia. ¡Gualdhí elha xen lasi quia gansi unná anca nu lä anca tsee benia len lebiꞌi!

¹⁴ Gualgüiarga, chi bedú tseea qui ita atta seꞌele-na. Ni eyonna libe ita etenalhia le. Ttiaca bittu raca lasia ichacha iquile quia gue nu reasatia. Neti nna läga delha denoa nu te guele. Lebiꞌi bunna denoa, nuarca delha atta seꞌele-na. Cumu ca tata-na liba daa locani quilacana nu reasani ca xiꞌinquinna läga ca xiꞌinquinna daa locani quilacana nu reasani ca tata-na.

¹⁵ Len neti nna tseeba anca itú iqui itú lasia unnitti loa iyá nu te quia, anáguaba lhuxa lo sina runia len lebiꞌi lhe qui salía tseenle, masquiba laca neti diarua racatia guele, lebiꞌi nna dialale rixulhinle neti.

¹⁶ Neti racatia, lebiꞌi nna gua rábale: “Gualí galá läga ucana nu beni ichacha iquiri gueni”, ttiaca ttulhele nna rále dequi aníaba beguila lasia benia qui uca uxí yieya le.

¹⁷ Lebiꞌi nna ¿si raquinle dequi rixuutia ca benni ridhelha atta seꞌele-na qui aca dhi sigáya belhi guele?

¹⁸ Neti nna unnaba len Tito qui itabi etenalhibi le. Len biꞌin-na udhelhaguaba attu benni riaguaba le Jesús. Tito nna ¿si bettettúabi nu anca guele? ¡Dica! ¡Lägabi run riꞌitu aná! Irupabatu ttuba anca nu rulaba letu, ttuba anca nu runtu lhe.

¹⁹ Lebiꞌi nna ¿si raquinle dequi runbatu qui exútu lole? Ttiaca läga anía anca. Delába unnuha nna rinnebatu aní lo Tata Do Iyyabaaha de ancatu benni baba len Cristu. Iyába nu runtu-ni nna ancana nu uni tseꞌe tsitsile lo neda gue Tata Do Iyyabaaha, lebiꞌi ca benni raquintu gueni.

²⁰ Neti nna richacha iquia cadirba bittuba seꞌele runle nu raca lasia unle atti isíaya ettenalhia le, anáguaba neti bittuguaba unia lenle attiba rulaba lele unia atti isíaya atta seꞌele-na. Richacha iquia qui läga yuꞌule utilha, qui läga seꞌele rutía di le loesle lhe qui läga seꞌele riseꞌen loesle lhe qui läga seꞌe laꞌa lheꞌe loesle lhe qui läga yuꞌule güedelha iyya loesi lhe qui läga yuꞌule güenne sigá gue loesile lhe qui läga seꞌele runle ttaba lhe qui läga seꞌele güea güeaba anca nu run ttuttule lhe.

²¹ Richacha iquia qui lä atti ita attu libe atta seꞌele-na, uni Tata Do Iyyabaaha ettútia guele. Lania nna dhu siꞌi lasia lhe cuesia lhe gue ixele de lebiꞌi nna axta ttua runle nu lä anca tsee, nianna bittu rodú xiyyanle qui odhaꞌanle ca nu satsa runle-na, nu requi mannile-na lhe nu redí baale nu lä anca tsee ridá lele lhe.