2 Corintios 11 - Zapoteco de Aloápam

Pablo runbi rexúbi lo ca nu bittu gualí anca apóstol

¹ Rinnaba lenle dhíle elha xen lhasi quia de rinnea attiba rinne ttu nu richixxi leni. Duelhaba gualuni gualuchía lo nu rinnea-ni.

² Neti nna tsitsiba nu runia rapa sunale. Tata Do Iyyabaahaba runie rulaba lasia guele aná. Cumu attiba ttu nu rbani chi nabana qui dho lenna ttuba unbiyuu, aníaba chi ancatia le len Cristu. Qui utsá dua le lo Ben-na, ancale nari attiba ttu nu rbani ancana nari, nuttu nu unbiyuu chi belisana.

³ Ttiaca rastia cadirba ixú yiele satele attiba guate Eva uxielhana uxí yie belha na leni nu botsiꞌinu leni. Anáguaba lebiꞌi cadirba dhielhale ixú yiele lania nna iganna iquile bitturu udo lele itú iqui itú lele suntteba nu anca gue Cristu.

⁴ Cumu ttirca risía attu nu subi rixxiꞌenna le nu bittu raxxína leni nu chi utixxiꞌentu le gue Jesús, attisiba doba attu Jesús subi. Lebiꞌi nna jeru rudo nagale gue nua, nnela ridielhale ridíle attu espíritu subi nu bittu anca Espíritu gue Tata Do Iyyabaaha Ben-ni chi uxíleha. Anáguaba ridielhale rudo nagale attu tisa subi nu bittu raxxína leni ca tisa gue Jesús chi binaleha lhe.

⁵ Neti nna racatia läga anca ca nu rá dequi ancacana apóstol ra xxeni leni nu raru xxeni leni atti neti.

⁶ Cumu masquiba anca nu lä reselani inne, ttiaca netiba anca nu yuru. Nu ria-ni nna ixe libeba lhe leni iyába nu runtu lhe chi beleꞌe lotu-na.

⁷ ¿Nianna si nu lä anca tseeba nua benia bittu bequixa le atti utixxiꞌatia le ca tisa gue Tata Do Iyyabaaha? Neti nna chi belhidaga lasia qui uca ulequi xen lele.

⁸ Neti nna attiba utúa sigába belhi uxielha uxía bete adí ca benni ria le Jesús ritupa lheꞌe adí ca yiesi qui bixuutia laca runia sina gue Tata Do Iyyabaaha len lebiꞌi.

⁹ Atti urea len lebiꞌiha nna bisía atti beasatia nu goa, ttiaca ni ttule lägabi unnaba nu beasatia. Ca benni ria le Jesús daa daca Macedonia betecabi nu reasatia. Neti nna duelhaba benia bittu betsitsitia le. Anába usiguia unia.

¹⁰ Attiba gua yuxeaba Cristuha neti nna rinneba nu anca gualí, aníaguaba gualítia, tsa nuttu nu te lo yu gue Acaya dhana cuana nu runi ribequi xen lasia de bittu uquixa gue rixxiꞌaya ca tisa gue Cristu.

¹¹ Atti ria aná nna ¿si raquinle bittuba racatia guele? ¡Dica! Tata Do Iyyabaaha gua yuxeabe attulade racatia guele.

¹² Nu runia-ni nna usiguiba unia-na, bittu uquixa, qui análiba nna bittu idhalia lo neda gue ca nu runi ttaba requi rá dequi ttuba ancacana len riꞌitu cumu runguabacana loesi sina runtu.

¹³ Ca unná nna läga gualí ancacana apóstol. Nu requi uxí yieba ancacana, cuentaba runcana dequi ancacana apóstol gue Cristu.

¹⁴ Unní nna läga anca unní nu uni ebaninri, cumu la nu xxegüihaba run leni dequi reacana ingeli du lheꞌe xieni attiba ca ingeli gue Tata Do Iyyabaaha.

¹⁵ Larcala nna läga dica ebaninri gansi ca nu runi sina gue nu xxegüiha run lecani dequi ancacana nu rixxiꞌani ca benni nu anca tsee. Ca unná nna isíaba sá dhicana elha disa gue coa nu lä anca tseeba runcana.

Nu guate Pablo lo niꞌa gue de utixxiꞌabi ca tisa gue Jesús

¹⁶ Neti nna rpea le attu libe: Bittu raca lasia nuxale aquinle ga racaba iquia, ttiaca gansi lebiꞌi rulaba lele aná nna gualugüelha neti innea ulisa le attiba rinne ttu nu raca iquini qui aná nna unguaba saroꞌo ttaba gue sina runia-ni.

¹⁷ Nu ria-ni nna läga anca unní nu rá Tata Do Iyyabaaha neti innea. De xxenba lasia gue nu runia nna nuarca runia ttaba, runba attiba runi ttu nu raca iquini.

¹⁸ De ixeba ca nu runi ttaba gue nu rácana raca guecani runcana, nuarca anáguaba neti unguaba saroꞌo ttaba gue nu runia.

¹⁹ ¡Lebiꞌi nna tsapaba tsee rapale pasensi rudo nagale gue ca nu lä caa elha rien guequinna guaruleꞌele ancale nu te elha rien gueni nna!

²⁰ Anáguaba tsapaba tsee ruchíale lo ca nu runcana dequi lebiꞌi ancale nu ttoꞌo lo sina guecani: rigúacana lo nále nu te guele lhe rudhacacana le attiba racaba lecani lhe runcana ttaba lole lhe ralhicana gui lole lhe.

²¹ Masquiba rettutia, ridí roꞌa ria dequi riꞌitu nna yalhattela benni siꞌile ucatu len lebiꞌi, läga bedhacatu le atti rudhaca ca unná le. Gansi adí ca nu requi na reaxquinna rácana dequi ancacana nu runi nu anca tsee, anáguaba neti eyaxguatia inne tseea gue nu runia, masquiba rinnea attiba rinne ttu nu raca iquini.

²² Gansi ca unná ancacana benni rinne tisa hebreo, anáguaba neti ancaguaba nu rinne tisa hebreo, gansi ca unná ancacana benni Israel, anáguaba neti ancaguaba benni Israel, gansi ca unná ancacana benni datía Abraham, anáguaba neti ancaguaba benni datía Abraham.

²³ Gansi rácana ancacana nu requi rixxiꞌa ca tisa gue Cristu, ttiaca netila anca nu ribenru rixxiꞌaru ca tisa gue Ben-na, masquiba rieni rinnea attiba rinne nu raca iquini atti ria aná. Cumu netiba anca nu runrua duelha ribenrua lo sina gue Cristu atti ca unná, ixerguaba libe chi utta lisiyya atti ca unná lhe tsitsirguaba chi utíncana neti lhe ixerguaba libe chi uláya lo elhuttiha lhe

²⁴ gayu libeguaba chi utín ca benni quia anca benni Israel-na neti len yieti, rilhidacana rerua yuꞌu jaa (39) libe quia.

²⁵ Tsunna libeguaba chi bexuacana neti yaga, chi besiacana neti iyya ttu libe lhe tsunna libeguaba chi uláya bittu uttia de uxudi ca barco ca nu diaya locaniha lheꞌe indattoo lhe chi bettea ttu ela leni ttu sá lo indattoo atta ridú líxxatta loni lhe.

²⁶ Ixe libeguaba chi uyuꞌa neda atta ruxunnina quia iche yoo neti, ruxunnina quia bixa satea lo ná ca ubana lhe ruxunnina quia bixa satea lo ná ca benni lo yies quia anca benni Israel lhe ruxunnina quia bixa satea lo ná ca benni dittu lhe ruxunnina quia bixa satea lheꞌe ca yies-na lhe ruxunnina quia bixa satea atti requia lo yu bisi lhe ruxunnina quia bixa satea lo indattoo lhe ruxunnina quia bixa satea lo ná ca benni run lecani rácana dequi riaguaba lecani Jesús attiba riꞌi lhe

²⁷ retú resábatia de ratexxatta lo sina lhe ixe libe rebequia bisiela lhe ratea lo nu ritunia lhe lo nu rebisia inda lhe ixe libe rutte ubina lheꞌa lhe ratea lo idilha de bittu nu guadi lo nu ucua te lhe.

²⁸ Dequide iyá nu chi ratea-ni nna ttu ttu sába richacha iquia gue iyába ca benni ria le Jesús ritupa lheꞌe ca yies-na.

²⁹ Gansi nuxa benni bixa rdacana, anáguaba neti ruyúguaba elha disa. Ridodíguatia atti runi ttu benni ichecu attu benni lo neda gue Tata Do Iyyabaaha lhe.

³⁰ Gansi raca duelha unia ttaba nna larba gue nu ruleꞌe lo dequi neti anca attiba ttu nu bittu ra tsitsi leni guaca unia ttaba.

³¹ Benni anca Dios lhe Tata lhe gue Jesús Benni bananie ri, lee ralhe cuequi xenri lee ttu dia liiba. Gua yuxeabe läga run lasia.

³² Atti udoa lheꞌe yiesi Damasco, nu rinnabia du cuꞌe nu rinnabia xxeni lá Aretas beseꞌena ca güensina roꞌo puerta do atta ritaꞌa benni lheꞌe yiesiha qui udaxxucana neti.

³³ Ttiaca lheꞌe ttu sumiba uluꞌu ca benni neti qui belhidacabi neti roꞌo ttu ventana do lheꞌe deꞌe iyya cua sabiꞌaba yiesiha. Anía liba uca nna uláya lo ná ca nu re lecani udaxxucana neti.