2 Corintios 10 - Zapoteco de Aloápam

Pablo recabibi gue ca benni rulaba lecani bittu run tseebi sina gue Cristu

¹ Cuinaba neti Pablo innea ulisa le attiba unne Cristu belise ca benni. Leni tisa tsee lhe len tisa siꞌi lhe rinnaba lenle udo nagale quia, masquiba rá benni dequi atti dua len lebiꞌi nna anca ttu benni rasini, attiliba dua idittu nna reaxtia run disa rinnea rulisa le.

² Rinnaba lenle bittu unle inne dia ulisa le gansi chi bisíaya atta seꞌele-na. Cumu neti nna duttila dhaca lania ca nu rinne rá dequi riꞌitu nna attiba run ca benni bittu anca bieni Tata Do Iyyabaaha seꞌe yies lo yu-ni runtu.

³ Gualíba ancatu benni seꞌe yies lo yu-ni, ttiaca läga atti ritilha ca soldado seꞌe yies lo yu-ni ritilha riꞌitu.

⁴ Cumu nu rixuintu ritilhatu nna läga anca unná atti anca nu rixuuni ca soldado seꞌe yies lo yu-ni atti ritilhacana, delába unnuha nna elha raca lani ra xxeni lee gue Tata Do Iyyabaahaba rixuintu qui rutseꞌe lotu iyáloba nu ra tsitsi leni rixuuni nu xxegüiha.

⁵ Rulhuxaguabatu nu rulaba le ca nu reseꞌe disa lo Tata Do Iyyabaaha lhe rulhuxaguabatu iyáloba elha ttaba gue ca nu dia rusuna qui bittu un bia ca benni Ben-na lhe. Runguabatu qui otsia ca benni iyába nu rulaba lecani qui oquinna iquicani udocana tisa gue Cristu.

⁶ Riꞌitu nna seꞌe tilhatu itatu qui bixa udhacatu ca nu bittu rudo tisa-na, dequide chi bedole tisa gue iyá nu anca udole tisa gueni.

⁷ Lebiꞌi nna suntteba gue gaxasná anca lolia gue ca benni rugüiale. Gansi nuxale rulaba leni gualí chi ancana gue Cristu, anáguaba dica ulaba leni, riꞌitu nna ancaguabatu gue Cristu attiba lana.

⁸ Neti nna lägabi rettutia gansi rite lo bedáya de ribequi xen lasia gue ladia bete Benni bananie ri-na. Cumu betebe laditu qui untu tseꞌe tsitsile lo neda gue Tata Do Iyyabaaha, läga bete Ben-na laditu qui untu tsia nittile.

⁹ Neti nna bittu raca lasia ulaba lele aquinle ga runniastia le leni nu rá lo ca sitsi ridhelha atta seꞌele-na.

¹⁰ Ttulhe benni nna rácana dequi tsitsiba idí rinnea lo ca sitsi ridhelha-na, ttiaca atti du cuinaga neti len lebiꞌi nna anca ttu nu bittu re tsitsi leni, rinne nu bittu retábinle gueni.

¹¹ Ca benni rá dequi runtu aná nna raca lasia unacana, riꞌitu nna attiba rinnebatu lo ca sitsi ridhelhatu atti seꞌetu idittu, anába innetu gansi chi bisíatu atta seꞌele-na.

¹² Riꞌitu nna läga eyaxintu utsen tsiꞌitu ca nu requi rudá tisa dequi ancacana nu run tsee, lä ragutsaguabatu cana lhe. Ca unná nna nu lä caa elha rien gueniba anca ca unná, cumu la labacana riguꞌubia loescani, roquinni iquicani nuxacana anca nu raru xxeni leni lhe.

¹³ Riꞌitu nna lägabi runtu ttaba tte bedátu lo nu chi gaꞌana untu. Requibatu rixxiꞌatu ca tisa gue Tata Do Iyyabaaha bedaa atta chi bocaꞌan Ben-na tsiatu, larcala nna bisíatu atta seꞌele-na.

¹⁴ Ttirca bittuba bita primer riꞌitu atta seꞌele-na lania nna guanari dequi rite bedábatu atta chi gaꞌana tsiatu. Ttiaca riꞌibatu ancatu nu primero bisía rixxiꞌa ca tisa gue Cristu len lebiꞌi.

¹⁵ Riꞌitu nna läga runtu ttaba gue sina beni attu benni subi, untu attisiba riꞌibatu beni sinaha, tte lo bedátu leni nu chi gaꞌana untu. Delába unnuha nna riꞌitu nna xenba letu lebiꞌi nna coa diabale riaru lele Cristu, aníaguaba dia rixeni sina guetu daca atta seꞌele-na.

¹⁶ Lania nna aca tsiatu satixxiꞌatu ca tisa gue Cristu lheꞌe ca yiesi seꞌe nu rearu gue atta seꞌele-na, ttiaca läga gaꞌatu atta chi seꞌe ca benni rixxiꞌa ca tisa gue Jesús, nianna untu ttaba attisiba riꞌibatu utixxiꞌentu ca biꞌiniha ca tisa gue Jesús primero.

¹⁷ Nu raca leni unna ttaba nna unna ttaba gue nu run Benni bananie ri-na len lana, bittu gue nu run la labana.

¹⁸ Cumu läga benni rinne rána dequi lana ancana nu runi nu anca tsee reꞌan tseena lo Tata Do Iyyabaaha, benni inná Benni bananie ri-na ancabi benni runi nu anca tsee liba eyaꞌan tseebi lo Ben-na.