2 Corintios 1 - Zapoteco de Aloápam

¹ Neti Pablo anca apóstol chi gaꞌanani Jesús Benni anque Cristu iche ca tisa guee cumu anába bedaa le Tata Do Iyyabaaha unie. Irupaba Timoteo, biꞌini ria le Jesús attiba riꞌi, ridhelhatu sitsi-ni guele lebiꞌi ca benni chi anca gue Tata Do Iyyabaaha ritupa lheꞌe yiesi Corinto qui ribequi xenle Ben-na, lenle adí ca benni seꞌe riesi chi anca gue Tata Do Iyyabaaha seꞌe itúba lo yu gue Acaya.

² Cuina Tata gueri do iyyabaaha lenie Jesucristu Benni bananie ri edá leque aca lenque le lhe unque tseꞌele xen su lee lhe.

Tata Do Iyyabaaha rute elha xen lasi lenri

³ Cuequi xenri Benni anca Dios lhe Tata lhe gue Jesucristu Benni bananie ri. Lee anque Tata gueri Benni ratúa lee ri, Tata Do Iyyabaa Benni satíaba rute elha xen lasi lenri lhe.

⁴ Ben-na rute elha xen lasi lenri atti rateri ruyúri elha disa lo niꞌa gue bixaba rateri, qui anáguaba riꞌi nna aca gueri uteri elha xen lasi len iyába ca benni ruyú elha disa. Uteri elha xen lasi lencana, loesi elha xen lasi rute Tata Do Iyyabaaha len riꞌi.

⁵ Cumu attiba Cristu guate biyúe elha disa, aníaguaba riꞌitu de ancatu benni guee nna ratexxatatu ruyútu elha disa, anáguaba de lee nna redíxxattatu elha xen lasi.

⁶ Riꞌitu nna ratetu ruyútu elha disa qui redíle elha xen lasi, qui lhále bittu tsia nittile lhe. Tata Do Iyyabaaha rute elha xen lasi guetu qui anáguaba lebiꞌi gattaguaba elha xen lasi guele. Análiba nna dhale uchíale lo ca loesi elha disa ruyútu-ni.

⁷ Riꞌitu nna tsitsiba xen letu lebiꞌi nna gua seꞌe tsitsibale, cumu yutu nna attiba ratele ruyúle elha disa len riꞌitu, anáguaba redíle elha xen lasi ridítu.

⁸ Lebiꞌi ca benni ria le Jesús, riꞌitu nna raca letu unale gue tsitsiba nu guatetu biyútu elha disa lo yu te láni Asia. Unnuha ucana ttu elha disa xeni biyútu nu tsaba bitturu ridátu uchíatu loni, larcala nna bisía uquintu dequi bitturba eríatu nía bantu.

⁹ Riꞌitu nna uquintu dequi tsaba chi boquinna iquicani gattitu. Ttiaca unnuha bixuuna len riꞌitu qui uxxen letu Tata Do Iyyabaaha benni runie reacani ca nu yatti-na, qui bitturu uxxen letu gue nu anca guetu.

¹⁰ Tata Do Iyyabaaha bodile riꞌitu. Lee nna godilábe riꞌitu lo ca elha disa xeni che elhutti. Xen letu nna gusiguibe odile riꞌitu.

¹¹ Lebiꞌi unle riꞌitu yuda innábale aca len Tata Do Iyyabaaha riꞌitu, aná nna ixeru benni utecana xquixaru len Tata Do Iyyabaaha de ugüiacabi nu tsee ute Ben-na len riꞌitu cumu ixe benni rinnabacana len Ben-na aca lanie riꞌitu.

Biaca bittu chi uca tsia Pablo lheꞌe yiesi Corinto

¹² Riꞌitu nna nu runna ribe xentu nna ancana, bittutte ttu bixa unna udelha iyyan riꞌitu, cumu len iyába ca benni seꞌe yies lo yu-ni len lebiꞌi itilalhe guaseꞌebatu runtu nu anca tsee runbatu atti runi benni chi anca gue Tata Do Iyyabaaha, ridíba roꞌotu gue nu runtu. Läga elha rien anca gue ca benni seꞌe yies lo yu-ni rixuintu qui runtu aná, Tata Do Iyyabaahaba raca lanie riꞌitu.

¹³ Lo sitsi ridhelhatu guele-na, lägabi runtu loni ni ttu nu bittu sadú lele atti ulabale na. Neti nna xen lasia güisíaba sá atti sadúga lele gue nu rá lo ca sitsi-na,

¹⁴ attiba chi ritedeenle nnanna saroꞌo gue nu rátu, cumu gansi chi bisía sá esía Jesús Benni bananie ri, lebiꞌi ancale nu uni edaca letu riꞌitu nna ancatu nu uni edaca lele.

¹⁵ De xen lasia gue nu ria-ni nna nuarca ucatia etenalhia primerla lebiꞌi, qui anáchu eberu itta lele de etenalhia le chupa libe.

¹⁶ Neti nna belaba lasia ttea etenalhia le gansi chi yuꞌa neda diaya Macedonia, atti dedaaya nna etea atta seꞌele-na attu libe. Lania nna lebiꞌiba unnale gue neda quia qui usiguia tsiaya deca Judea.

¹⁷ Lebiꞌi nna ¿si raquinle dequi nnelaba botsíaya nu rulaba lasia unia atti bebequi lasia unia aná? ¿Si raquinle anca benni nu sattiba rána: “Guaca”, lenla nna redenána: “Bittu aca”, attiba run ca benni gue yies lo yu-ni?

¹⁸ Tata Do Iyyabaaha benni runi nu re gua yuxeabe, riꞌitu nna lägabi ancatu nu primero rátu le: “Guaca”, lenla nna redenátu: “Bittu aca”.

¹⁹ Jesucristu xiꞌini Tata Do Iyyabaaha Benni rixxiꞌa Silvano-na lhe Timoteo-na lhe neti lhe ca tisa guee-na len lebiꞌi, läga anca Ben-na nu primero re: “Guaca”, lenla nna edenee: “Bittu aca”. Len Cristu ca tisa riguixxiꞌatu satíaba ancaque gualí,

²⁰ cumu lee runie raca iyáxeaba nu chi begüee Tata Do Iyyabaaha tisa unie. Larcala nna de Cristu rári: “Amén”. Atti rári aná nna ribequi xenri Tata Do Iyyabaaha.

²¹ Ben-na runie seꞌe tsitsitu lhe seꞌe tsitsile lhe de chi babari len Cristu. Tata Do Iyyabaaha becuee ri acari gue Cristu.

²² Ben-na berenie ri senni qui ruleꞌe lo chi ancari guee, delába uluꞌe Espíritu guee lheꞌe lastoori. Unná runi ruleꞌe lo guadíbari iyá nu chi re utee.

²³ Neti nna de guatúaba lasia le, nuarca bittu chi bita lheꞌesi Corinto atta seꞌele-na attiba chi rpea leha, cumu bittu raca lasia ulisa le len tisa idí. Tata Do Iyyabaaha nna gua yuxeabe gualíbatia nu ria-ni.

²⁴ Läga de rdaca riꞌitu innabiatu le innátu: “Aníttiga tsia lele”, cumu chiba seꞌe tsitsile ria lele Cristuha. Rdacaba riꞌitu untu le yuda qui tseꞌele edacaru lele.