1 Timoteo 6 - Zapoteco de Aloápam

¹ Ca benni ria le Jesús anca nu ttoꞌo lo sina, gapacabi respeto ca benni anca xxancabi, qui bittu inne güee benni gue Tata Do Iyyabaaha, niguaba gue ca tisa ruleꞌeri-ni lhe.

² Ca benni ttoꞌo lo sina gue ca biꞌini chi ria lecabi Jesús, bittu acaquinbi lä udobacabi tisa gue ca benni anca xxancabi de ttuba chi ancacabi benni ria le Jesús. Nu unlacabi nna ugüela lecabi lo sina gue ca biꞌiniha, cumu ca biꞌini dia ribe xeniha nna ancacabi benni ria le Jesús, benni racani Tata Do Iyyabaaha gueni lhe. Ca tisa-ni beleꞌe lhe utixxiꞌani ca benni uncabi lhe.

Pablo rixxiꞌenbi Timoteo gue ca benni bittu rixxiꞌa lhixxa ca tisa gue Jesucristuha

³ Gansi nuxa benni ruleꞌena attu tisa subi nu bittu raxxína leni ca tisa rixxiꞌa nu anca gualí beleꞌe Jesucristu Benni bananie ri, niguaba lä raxxína nua leni ca tisa ruleꞌecanie ri runri nu reꞌo le Tata Do Iyyabaaha lhe

⁴ unnuha nna nu ttababa nua, tsa läga radú le nua. Lana nna tsaba chi bedona leni ritilha tisana gue nu bittu ixuu. Lo niꞌa gue unnuha nna ridú lo ca benni rutía di le loescani, ritilha tisa len loescani lhe rinne güee gue loescani lhe bitturu ria lee gue loescani lhe.

⁵ Satíaba ruꞌucana ritilha tisa len loescani cumu bittu rixuu elha rieni guecani, bittuguaba yucana gue nu anca gualí lhe. Lacana racaquinna dequi uncana nu raca lee Tata Do Iyyabaaha qui aca cue xencana leni belhi rilupicana cuꞌe benni. Lu nna Timoteo biriesi ca benni run aná, bittu iselalu ca unná.

⁶ Gualíba, ridíri ttu elha tsee xeni anca gue Tata Do Iyyabaaha de runri nu raca lee, ladiba ancari benni raca xen leni leni nu tee gueni.

⁷ Cumu tsa lägabi nujari atti bisíari yies lo yu-ni, bittuguaba bi eyojari atti gattiri lhe.

⁸ Gansi gua teba nu gori lhe nu ucuri lhe careꞌaba leni unnuha aca xen leri.

⁹ Cumu ca benni rdacacana acacana nu te gueni, ttu nnelaba ixúyiecana runcana nu ridá lecani, attiba ttu nu uyuꞌu yalhi, nianna reacattebacana nu satíaba do leni unna ixe loba nu lä anca tsee ridá lecani. Unná nna ancana nu bittu ixuu. Sunruba runi unná satecana uyúcana elha disa, tsaba dionna rinnina yiencani qui tsia nnitticana.

¹⁰ Cumu nu ridá leri belhi-na ancana nu runi uni ttu benni iyáloba nu lä anca tsee. Seꞌe ca benni ria le Cristuha lo niꞌa gue de udá lecani belhi-na bedhancana ria lecani Ben-na. Ttiaca la labacana utila elha disa guecani.

Pablo rixxiꞌenbi Timoteo bixa unbi

¹¹ Ttiaca lu, Timoteo biꞌini rixuu lo sina gue Tata Do Iyyabaaha, bittu unlu ni ttu nu lä anca tsee chi utixxiꞌatia lu-ni. Bedola lelu beni nu anca lhatsiru, bedo tisa beni nu tsee anca gue Tata Do Iyyabaaha lhe. Bedo lelu tsiaru lelu Cristuha lhe aquinlu gue adí benni lhe uchíalu lo elha disa uyúlu lhe uca benni siꞌi le lhe.

¹² Itú iqui itú lelu besigui lo neda gue Tata Do Iyyabaaha de ria lelu Cristu. Beni duelha qui gatta elha nabani guelu ttu dia lii. De unnuhala nna uxi Tata Do Iyyabaaha lu, larcala tseeba chi utixxiꞌalu aní lo ixeru benni rál cana lu nna chi ria lelu Jesús.

¹³ Rinnaba lenlu aní lo Tata Do Iyyabaaha Benni rute elha nabani gue iyá nu te yies lo yu-ni, lo Jesucristu benni utixxiꞌa nu anca gualí atti betsá due lo Poncio Pilato qui un nua elha uxtisi guee lhe

¹⁴ bedo tisa beni nu chi benia lu mandadu unlu. Lhatsiru beni iyá nu chi rpea lu-na qui bittu itisalu nnanna lhe atti esía Jesucristu Benni bananie ri lhe.

¹⁵ Benniha nna esíe atti isía sá chi gaꞌanani Tata Do Iyyabaaha. Cumu Ben-na anque Benni anca leꞌa, Benni tturbe do anque Benni ra xxeni lee lhe. Ben-na anque Benni rinnabia anca nu lo gue ca nu rinnabia-na, anque nu lo gue ca nu ra xxeni lequinna lhe.

¹⁶ Tturba Ben-na do anque Benni tsa bittu gatti, anque Benni do lheꞌe ttu xieni atta nuttu nu dhana ibigana gaxxa de ruꞌuba xieni lhe. Lee nua tsa nuttu nu benni seꞌe yies lo yu-ni chi bilenne, nuttuguaba nu dhana ilenne lhe. Ben-na anque Benni ra xxeni lee, anque Benni rinnabia xeni ttu dia liiba lhe. Amén.

¹⁷ Ca biꞌini ancacabi nu te gueni yies lo yu-ni nna belisa cabi qui bittu acacabi nu ttaba, bittuguaba uxxen lecabi gue nu te guecabi lhe cumu reabunna. Adíla tsee nna uxxen lecabi Tata Do Iyyabaaha. Benniha anque benni bani, rute iyá nu reasinri qui te xxeni nu edí baari.

¹⁸ Gus cabi uncabi nu anca lhatsiru, acacabi nu runi iyáloba nu tsee lhe. Itú iqui itú lecabi edá lecabi ugüecabi adí benni bixa te guecabi.

¹⁹ Anía liba nna udiancabi adí elha tsee guecabi nu uxxen lecabi edí baacabi ca sá chi daba isía, qui gatta nu gualíga anca elha nabani guecabi lhe.

²⁰ Timoteo, tsitsi upa sina nu chi bete Tata Do Iyyabaaha len lu. Bittu udo nagalu gue ca nu bitti bittiba rinnecana gue nu bittu ixuu. Lä udoguaba nagalu gue ca nu rácana dequi yulhabacana lhe ttiaca läga gualíquinna.

²¹ Cumu ttulhe benni gue ca unnala bedo nagacani, lacana nna chi bedhancana ria lecani Jesús. Tata Do Iyyabaaha aca lanie lu. Amén.