1 Timoteo 5 - Zapoteco de Aloápam

Pablo rixxiꞌenbi Timoteo gaxasná unbi len ca benni ria le Jesús

¹ Bittu innelu tisa idí atti ulisalu ca unbiyuu chi anca benniola-na. Lhatsiru belisa cabi attiba ttu tata guelu. Ca uncuiti-na nna belisa cana attiba rulisalu ttu betsilu.

² Ca benni nuila chi anca benniola-na, belisa cabi attiba rulisalu ttu nan guelu, ca nuila cuiti-na nna belisa cana attiba rulisalu ttu danlu. Lhatsiru bedú lelu lencana.

³ Biyú ca nuila bidabi ca nu nuttu nu te ugüian cana.

⁴ Gansi ttu nuila bidabi guaseꞌeba xiꞌinbi o xidhoabi lhe primertteba ca unnuha uncana nu daa locani leni ca benni datíacana seꞌe lheꞌe yoꞌo guecani qui eguixatticana ttu latti gue nu bodixen ca tata nan guecaniha cana. Cumu unní anca ttu nu tsee, nu reꞌo le Tata Do Iyyabaaha lhe.

⁵ Nuila nu gualíga ancabi bidabi chi beꞌana atturbabi nna xenba le biꞌiniha aca len Tata Do Iyyabaaha bi, labi nna satíaba rinnababi nu reasinbi lo Ben-na, rela resába rinnebi leni Ben-na lhe.

⁶ Ttiaca nuila bidabi sna redí baarbana nu raca yies lo yu-ni nna sna do banba nua chi ancana nu yatti lo Tata Do Iyyabaaha.

⁷ Beleꞌeguabani ca benni chi ria le Jesús nu ria-ni, qui bittu bi ten benni innecana guecabi.

⁸ Cumu benni bittu rulaba leni gue ca benni datíana, nu bittu richacha iquini gue nu reasani ca benni seꞌe lheꞌe lisni, chiba bedhan nua ria leni Jesús. Adílaba de guate anca nu run nua atti nu bittu anca biani Tata Do Iyyabaaha.

⁹ Lo sitsi atta do lá ca nuila bidabi raca yuda-na, sunruba ca nuila bidabi udo leni ttuba unbiyuu chi ancani guate gayuna (60) ida gua dica dho lácabi lo sitsi-na.

¹⁰ Ancacabi benni daa tisa guecabi bencabi nu anca tsee, benni bodixen tsee xiꞌinni lhe bete ganna liscabi beꞌan benni lhe ucacabi benni utí niꞌa ca benni chi seꞌe riesi anca gue Tata Do Iyyabaaha lhe bencabi yuda ca benni biyú elha disa lhe satíaba bencabi iyába nu dica ixuu lhe.

¹¹ Bittu udolu lá ca nuila bidabi cuiti-na lo sitsi atta sia lá ca nuila bidabi ralhacabi acacabi yuda. Cumu gansi chi rudúncabi edícabi attu unbiyuu nna rudorlana lecabi otsá nácabi attu libe attichu uncabi sina gue Cristuha.

¹² Lania nna racacabi nu te tulha gueni, cumu de bitturu bencabi nu chi racabi Tata Do Iyyabaaha uncabi.

¹³ Anáguaba diaguacabi rilábicabi racacabi nu lea, nu ribeni utá rería retaꞌa lheꞌe ca yoꞌo lhe bittu sunru racacabi nu lea, racaguabacabi nu rinne bittiba lhe nu gaxaba nua ragaꞌa gueni lhe rinnecabi nu bittu elha ralhacabi innecabi lhe.

¹⁴ Denuala nna raca lasia otsá ná ca nuila bidabi cuiti-na, oseꞌe xiꞌincabi lhe innabia lheꞌe liscabi lhe. Bittu uncabi nu bittu anca tsee qui bittu te bixa lo niꞌa gue inne güe ca nu bittu raca uyucanri-na guecabi.

¹⁵ Cumu ttulhe ca nuila bidabi-na chi biriescana lo neda gue Cristu, nu xxegüiha la chi denocana.

¹⁶ Gansi ttu benni ria lebi Jesús seꞌe nuila bidabi datíabi, labi unbi cabi yuda qui bittu ichacha iqui adí ca benni ria le Jesús gue ca biꞌiniha. Qui anáchu ca biꞌiniha nna aca uncabi yuda ca nuila bidabi tsa nuttu nu banquinbi.

¹⁷ Ca benni teru elha rieni guecabi rinnabia tsee, ralhacabi gapale cabi adí respeto. Adílaba ca biꞌini rixxiꞌa ca tisa-na lhe ca biꞌini ruleꞌena lhe.

¹⁸ Cumu lo ca sitsi gue Tata Do Iyyabaaha nna rá: “Bittu cuꞌulu yexxa roꞌo uꞌuna yuꞌu sna.” Anáguaba rinne lo ca tisa-na: “Benni riben sina-na ralhabana dhína nu gaxana gue sá gueni.”

¹⁹ Bittu tsia lelu gue bixa run ttu benni xiyya gue ttu ca biꞌini teru elha rieni guecabi na, gansi bittuba seꞌe chupa o tsunna ca nu begüia locani bixa ben biꞌiniha.

²⁰ Ca biꞌini bittuba riani-ni, sna runbacabi nu lä anca tsee lo Tata Do Iyyabaaha, aní lo adí ca benni ria le Jesús utisacabi qui gasquinbi, bittu un adícabi anía.

²¹ Aní lo Tata Do Iyyabaaha lhe lo Jesucristu Benni bananie ri-na lhe lo ca ingeli chi becuee Ben-na anca guee-na lhe rinnaba lolu unlu nu rpea lu-ni. Bittu aquinlu un tseerlu leni ttu benni atti leni adícabi, ttuba beni leni iyábacabi.

²² Bittu iyúbaxxinlu uxxúa nálu iqui nuxa benni edú uni sina gue Tata Do Iyyabaaha qui bittu igutsalu nu lä anca tsee bittu yulu run biꞌiniha. Beni qui acalu ttu benni bittu tulha gueni te lo Tata Do Iyyabaaha.

²³ De satti belhaba ranilu lhe raca lheꞌelu lhe xa Timoteo, bitturu iꞌiyalu suntteba inda, uꞌuya saroꞌo vinu.

²⁴ Ttulhe ca benni runi nu lä anca tsee, rianni lo nu bencana ni la tti aca elha uxtisi guecani. A ttulhe ca benni nna axta liba aca elha uxtisi guecani, lania liba rianni lo nu runcana.

²⁵ Anáguaba ruleꞌe lotteba nu tsee run ca benni. Adí nu tsee bittu rilá runi benni nna güisíaba sá uleꞌe lo nua.