1 Timoteo 4 - Zapoteco de Aloápam

Bedo cuidadu len ca benni rixxiꞌa ca tisa subi

¹ Espíritu gue Tata Do Iyyabaaha nna lhixxa suba rixxiꞌe re, atti chi daa ribiga isía sá lhuxa yies lo yu-ni, ttulhe ca benni ria le Jesús bitturu tsia lecani Ben-na. Gue ca benni rixuuni ca be xxegüi ridí yiela udo nagacani, tsia lecani gue nu uleꞌe ca nua lhe.

² Ca unnuha nna ancacana nu run leni. Tsaba bitturu raca guattequinna runcana aná, cumu tsaba anca elha rieni guecani chulha.

³ Lacana nna bitturu ugüelhacana utsá ná benni, innabiacana bitturu go benni ttulhe ca elha go chi gaꞌana go benni lhe. Tata Do Iyyabaaha nna chiba bocaꞌane gori nua, cumu atti ro ca benni ria le Jesús yu nu anca gualí nua nna rutecabi xquixaru len Tata Do Iyyabaaha.

⁴ Iyába nu beni Tata Do Iyyabaaha te yies lo yu-ni nna tseeba ancana. Läga dica cuꞌu niꞌari unnuha, gua dicaba gori na, ladiba uteri xquixaru len Tata Do Iyyabaaha.

⁵ Cumu len ca tisa gue Tata Do Iyyabaaha lhe len ca tisa rinneri rulisari Benna lhe reaca benni rori-na nu anca leꞌa.

Pablo rulisabi Timoteo qui unbi lhatsiru sina gue Jesús

⁶ Gansi lu uleꞌenlu ca benni ria lecabi Jesús attiba chi ria lu-ni, lania nna ancalu ttu benni tseeba rixuu lo sina gue Jesucristuha, nu tseeba yuna ca tisa ria leri-na lhe nu chi deti tseena gue nu bedhetina lhe. Ca tisa-na ben-na dialu rudo tsitsilu tisa gueque.

⁷ Bittu udo nagalu gue ca cuentu ca nu rotsiꞌinu le ca benni, ca nu bittu anca gualí rixxiꞌa ca benni lhe. Nu unlalu nna benla qui unlu nu reꞌo le Tata Do Iyyabaaha.

⁸ Cumu ca benni runi qui aca tsitsi cuerpu gueni nna ttu sattirba ixuu nua len lana, ttiaca unri nu reꞌo le Tata Do Iyyabaaha nna ancana nu rixuu satíaba gue iyába ttu bixa. Unná ixuu seꞌeri yies lo yu-ni lhe gansi chi besinri iyyabaaha lhe.

⁹ Tisa anca gualí ben-ni rinnea, nu dica tsia le iyáxea ca benni lhe.

¹⁰ Lo niꞌa gue unnuha nna riꞌi nna rateri, chi ruttipa leri lhe cumu ruxxenba leri un Tata Do Iyyabaaha nu chi re. Lee anque benni bani rodilá iyáxea benni seꞌe yies lo yu-ni, lotteba ca benni ria le Jesús rodile qui bittu tsia nnitticabi.

¹¹ Nu ria-ni beleꞌeni ca benni, guscana uncana lhe.

¹² Beni qui bittu cuꞌu niꞌa ca benni lu de ancalu uncuiti. Delaba unnuha nna lu nna acalu ttu benni ugüia ca benni ria le Jesús gue nu runlu qui aníaguaba uncabi: inne tseelu lhe un tseelu lhe aca siꞌinlu ca benni lhe udú tsee lelu lhe tsia lelu Tata Do Iyyabaaha lhe unlu tagaꞌa nu anca tsee lhe.

¹³ Laca isíaya nna bedo lelu belaba ca tisa gue Tata Do Iyyabaaha aní lo iyá ca benni. Belisa cabi lhe beleꞌen cabi gaxasná tseꞌecabi lhe.

¹⁴ Bittu aquinlu lä ixuubinlu elha tsee chi bete Tata Do Iyyabaaha lenlu. Gue unnuha nua utixxiꞌa ca benni teru elha rieni guecabi atti bexxúa nácabi iquiluha.

¹⁵ Ben duelha bedo lelu beni nu ria-ni qui ttedaani iyá ca benni lu nna ttu diabalu ridú tsitsilu lo neda gue Tata Do Iyyabaaha.

¹⁶ Lhatsiru bedú lelu, lhatsiru beleꞌen ca benni lhe. Tsitsi udú beni nu chi rialu unlu. Cumu aná liba nna lhálu bittu tsia nittilu, lháguaba ca benni udo nagacani guelu lhe.