1 Timoteo 3 - Zapoteco de Aloápam

Gasná dica un benni anca nu lo gue ca benni ria le Jesús

¹ Tisa anca gualí ben-ni rinnea: Gansi nuxa ttu benni rdacabi acabi nu lo gue ca benni ria le Jesús, tseeba anca sina ridá le biꞌiniha unbi.

² Larcala nna benni anca nu lo gue ca benni ria le Jesús riquina acabi: ttu nu bittu bi teni ca benni bixa gácan bi, nu suntteba ttu nuila dho lenbi lhe nu ridá rinnabia elha rieni gueni lhe nu rulaba tsee leni gue nu unna lhe nu runi nu anca lhatsiru qui gapa benni bi respeto lhe nu rute ganna lisni qui eyaꞌan ganna benni lhe ttu nu guaca gueni uleꞌenna adí benni lhe

³ ttu nu bittu ancana nu riꞌiya lhe ttu nu bittu reꞌo leni ritilha na lhe ttu nu bittu ridá leni belhi lhe. Benni aca nu loha nna acabi benni du tsee leni, nu bittu run disa lhe.

⁴ Biꞌini raca guebi rinnabia bi ca benni seꞌe lheꞌe lisbi lhe rulisabi ca xiꞌinbi qui udocana tisa guebi lhe ria lecan bi lhe.

⁵ Cumu benni bittu raca guebi innabiabi ca benni seꞌe lheꞌe lisbi nna läga aca gue nua uleꞌenna ca benni ria le Tata Do Iyyabaaha.

⁶ Bittuguaba dica aca ttu benni bittu chi anca isá bedaxxubi neda gue Tata Do Iyyabaaha nu lo, cumu quini lä unbi ttaba nianna inittibi attiba binitti nu xxegüiha.

⁷ Racaguaba duelha unbi nu anca lhatsiru qui inne tsee ca nu bittu ria le Jesús guebi. Anía liba nna bittu cuꞌu niꞌacan bi, qui bittu iyinnabi lo yalhi gue nu xxegüiha.

Gasná dica un ca benni realha ladicabi qui uncabi yuda ca benni ria le Jesús

⁸ Anáguaba ca benni reseꞌe qui uncabi yuda ca benni ria le Jesús, lacabi nna acacabi nu gapa benni respeto, nu bittu run leni lhe nu bittu ancana nu dusi lhe nu bittu ridá leni dhi sigána belhi lhe.

⁹ Acacabi ca benni nu bittu te bixa uquiꞌana tseꞌe tseecabi lo Tata Do Iyyabaaha, nu bittu udhana ria lee ca tisa gue Jesús lhe delába ca tisa chi beleꞌeni Tata Do Iyyabaaha cabi nnanna.

¹⁰ Lacabi nna primerxa acacabi ttu prueba qui uleꞌena gansi gua dica acacabi ca benni un yuda ca benni ria le Jesús. Gansi nuttuba nu cuꞌu niꞌan cabi nna gua dicaba eyyalha ladicabi lania.

¹¹ Anáguaba ca nuila, acaguabacabi biꞌini gapa ca benni respeto, nu bittu rinne bittiba gue ca benni nu bittu anca gualí lhe nu raca gueni rinnabiana elha rieni gueni lhe nu runi iyá nu rána lhe.

¹² Ca unbiyuu realha ladicabi qui uncabi yuda ca benni ria le Jesús, acaguabacabi nu dho leni suntteba ttu nuila, nu rinnabia tsee ca xiꞌinbi lhe adí ca nu seꞌe lheꞌe yoꞌo guebi lhe.

¹³ Cumu ca benni realha ladicabi qui uncabi yuda ca benni ria le Jesús run tsee sina daa locabi uncabi nna reꞌeyucabi rapa benni cabi respeto, chi te ttu elha xen lhasi guecabi lhe de chi ria tsitsiru lecabi Jesucristu.

¹⁴ Ca tisa-niba runia lo sitsi ridhelha guelu xa Timoteo, masquiba chiguaba ruxxen lasia itattegaba etennalhia lu,

¹⁵ cumu gansi isáya nna lania nna chi yulu gaxasná unlu leni ca benni chi baba leni Tata Do Iyyabaaha. Lacabi ancacabi yotu gue Tata Do Iyyabaa benni anca bani. Ancacabi ca benni seꞌe tsitsi rixxiꞌa ca tisa anca gualí gue Jesús attiba ttu yati nu du den tsitsina ttu yoꞌo.

¹⁶ Gualíba, xxenba anca gue ca tisa gue Cristuha chi yuri nnanna nu bittu chi yu benni ca tu ttuha: Jesús bite yies lo yu-ni, uque benni attiba riꞌi. Espíritu gue Tata Do Iyyabaaha beleꞌe loe gualíba anca Jesús benni runi nu anca tsee. Biláni ca ingeli gue Tata Do Iyyabaaha Benniha lhe utixxiꞌacana gue Benniha leni ca nu bittu anca benni Israel-na lhe. Güia lee ca benni seꞌe yies lo yu-ni Benniha, bedí Tata Do Iyyabaaha Benniha qui besine attu libe iyyabaaha lhe.