1 Timoteo 2 - Zapoteco de Aloápam

Pablo rixxiꞌabi nu dica un ca benni ria le Jesús gansi chi riseꞌecabi rulhacabi gue Tata Do Iyyabaaha

¹ Lotteba nu rinnaba nna gálu ca benni ria le Jesús, innecabi leni Tata Do Iyyabaaha. Innábacabi nu reasaquinbi lhe innábacabi aca lani Ben-na iyába ca benni lhe utecabi xquixaru leni Ben-na gue iyába lhe.

² Innábacabi qui aca lanie ca nu rinnabia-na lhe iyába ca uxtisi-na lhe qui anáchu tseꞌeri lhatsiru, udo leri nu anca gue Tata Do Iyyabaaha lhe gapa loesri respeto lhe.

³ Unní ancana ttu nu tsee, ancana nu reꞌo le Tata Do Iyyabaaha benni bodile ri qui bittu tsia nnittiri.

⁴ Cumu Ben-na raca lee lhá iyárecha ca benni qui bittu tsia nnitticana, eꞌeyucana sadú lecani gue nu anca gualí lhe.

⁵ Cumu tturba ttu Tata Do Iyyabaa do, tturguaba benni do roseꞌe tsee ca benni leni Tata Do Iyyabaaha lhe Benniha nua unbiyuu lá Jesús Benni anque Cristu.

⁶ Lee nua uxielhabe betticane. Anía liba nna utixe gue ca tulha gueri qui lhá iyári bittu tsia nittiri. Unní nua beleꞌe lo Tata Do Iyyabaaha atti bisía sá chi gaꞌananie.

⁷ Denuala nna bodúe neti aca apóstol qui tsequia quixxiꞌaya ca tisa gue Jesús, acaguaba benni uleꞌeni ca benni bittu anca benni Israel-na lhe. Uleꞌetia cana gue gaxasná tsia lecani ca tisa gue Tata Do Iyyabaaha lhe gue nu anca gualí lhe. Gualíbatia nu ria-ni, läga run lasia.

⁸ Larcala nna raca lasia inne ca unbiyuu-na len Tata Do Iyyabaaha gaxaba seꞌecana, güetsaa ilidha ná ca unbiyuu runi nu ruꞌu le Tata Do Iyyabaaha, ca nu bittu risaꞌaquinna lhe ca nu bittu ritilha tisacana lhe.

⁹ Anáguaba ca nuila-na lhe lhatsirba ucu xocani attiba raxxína anca tsee. Bittu eyocu tseexxatta xocani sunruba qui ebanin benni, bittuguaba eyon tseexxatta iquicani lhe lä osiaguaba iquicani nu anca leni oro lhe lä cuꞌuguaba yiencani begá anca leni perla lhe lä ucuguabacana lari dacaxxatta yaxi lhe.

¹⁰ Lacana nna tseerla uleꞌecana gansi uncana nu anca tsee, attiba run ca nuila gualígaquinna runcana nu dica ixuu lo Tata Do Iyyabaaha.

¹¹ Ca nuila-na nna siba tseꞌecana udo nagacani atti quixxiꞌa ca benni ca tisa gue Tata Do Iyyabaaha.

¹² Neti nna läga rugüelha ca nuila-na uleꞌequinna ca unbiyuu-na, bittuguaba rugüelha innabiacana ca unbiyuu-na lhe. Delába unnuha nna siba tseꞌecana udo nagacani.

¹³ Cumu primerba Adán beni Tata Do Iyyabaaha, lenla nna benie Eva.

¹⁴ Bittuguaba Adán nua uxíyie nu xxegüiha, nuilaha liba nua uxíyie nua, dequide chi bixúyiena nna benttebana nu rá Tata Do Iyyabaaha bittu unna.

¹⁵ Ttiaca gualába nuila-na de useꞌe xiꞌinni, ladiba gua ria leni Tata Do Iyyabaaha lhe ancana nuila siꞌi le lhe ancana nuila do riesi lheꞌe nu lä anca tsee lhe nu bittu bittiba runna lhe.