1 Timoteo 1 - Zapoteco de Aloápam

¹ Neti Pablo, anca apóstol gue Jesucristu. Tata Do Iyyabaaha Benni rodile ri qui bittu tsia nittiri, lenie Jesucristu Benni xen leri unie nu chi unnee bodúque neti.

² Na ridhelha sitsi-ni guelu, xa Timoteo. Lu anca attisiba xiꞌinia de beleꞌetia lu ria lelu Jesús. Cuina Tata gueri do iyyabaaha lenie Jesucristu Benni bananie ri, aca lenque lu, satúa leque lu lhe unque dholu lhatsiru lhe.

Gualdo cuidadu len ca tisa subi, ca nu bittu raxxína len nu bedhetiri gue Jesús

³ Attiba chi unnaba len lu atti udáya diaya lo yu te láni Macedonia, lu nna eyaꞌanchilu lheꞌe yiesi Éfeso qui ulisalu ttu chupa ca benni seꞌe-na, bitturu uleꞌequinna ca benni bixarua attu tisa subi nu bittu raxxína len nu beleꞌetia le gue Jesús.

⁴ Ulisaguabalu cana qui bitturu tseꞌecana udo nagacani gue ca cuentu rotsiꞌinule ca benni lhe bitturu udo lecani innexxattacana gue nupaxa uca benniola guecani lhe. Cumu tsa läga anca ga lhuxa gueonna. Sunruba runi unna ritilha tisa benni, tsa lägabi rixuu unná qui useꞌe tsitsincana lo neda gue Tata Do Iyyabaaha de ria lecani Ben-na.

⁵ Bodhaꞌana lu nna de runia uleꞌenlu cana qui aquin gue loescani, cumu aná runi benni anca lheꞌe lastooni nari, nu yuxeabana gua runbana nu anca tsee lo Tata Do Iyyabaaha lhe nu gualínna itú iqui itú leni ria leni ca tisa-na lhe.

⁶ Ttiaca ttulhe ca benni nna lärga runcana aná, ubiattalacana lo neda tsee-na. Gue nu bittu rixuula ruꞌucana ritilha tisacana.

⁷ Rdacacana acacana nu ruleꞌe nu rá lo ca ley gue Tata Do Iyyabaaha, ttiaca niguaba lacana lä radú lecani gue ca tisa rinnecana, niguaba gue nu ruleꞌecana itú iqui itú lecani lhe.

⁸ Riꞌi nna gua yubari, tseeba anca ca ley gue Tata Do Iyyabaaha gansi riꞌi ixuinri que attiba raca lee Ben-na.

⁹ Orexxaguaba leri lhe läga uca ca ley-na qui udelha iyyaque ca benni runi nu anca tsee, ucabaque qui udelha iyyaque: ca nu reseꞌe disa lo ca ley-na, ca nu lä rudo tisa gue Tata Do Iyyabaaha lhe ca nu bittu rudú xibicani lo Tata Do Iyyabaaha lhe ca nu te tulha guequinna lhe ca nu riguꞌu niꞌacani Tata Do Iyyabaaha lhe nu anca leꞌa gue Ben-na lhe ca nu rutti tata nan guequinna lhe iyába ca nu runi elhutti-na lhe

¹⁰ ca nu requi manni-na lhe ca unbiyuu runi nu satsa leni la loesi unbiyuuba cana lhe ca nu rudaxxu sigá benni qui utoꞌocana lhe ca nu run lequinna lhe ca nu chi bodhaꞌan tisa bitturu un lecani nianna sa runruba lecani lhe iyába ca nu reseꞌe disa lo ca tisa rixxiꞌa nu gualí anca gue Tata Do Iyyabaaha ruleꞌeri lhe.

¹¹ Unní rá ca tisa gaꞌana tsee anca leꞌa betee Tata Do Iyyabaa benni ra xxeni lee na len neti qui quixxiꞌaya que.

Pablo rutebi xquixaru len Tata Do Iyyabaaha cumu de guatúa lee biꞌiniha

¹² Jesucristu, Benni bananie ri, rudú tsitsie neti. Rutea xquixaru len Benna cumu xen lee neti, denua nna bodúe neti aca ttu benni un sina guee.

¹³ Masquiba ca tu ttuha nna uca ttu benni unne güee gue Ben-na, bería laya ca benni ria lecani guee lhe bedhaca siꞌacabi lhe, ttiaca lee nna guatúaba lee neti cumu läga chi ria lasie lania, bittuguaba yua bixa nua runia lhe.

¹⁴ Jesucristu, Benni bananie ri, bedaa lee uca lenie neti qui ria lasie, qui racatia gue adí ca benni lhe cumu de chi dua lenie.

¹⁵ Tisa anca gualí ben-ni rinnea, nu dica tsia le iyáxea ca benni: Jesucristu bite yies lo yu-ni qui odile ca benni runi nu lä anca tsee qui bittu tsia nnitticana. Delo iyába ca benni runi nu lä anca tsee, netiba anca nu uttaru tulha gueni.

¹⁶ Ttiaca Tata Do Iyyabaaha nna guatúanie neti qui beleꞌe lo Jesús Benni anque Cristu lee nna ratúanie nuxaba benni. Anioca nna uca benni ugüia ca benni qui tsia lecani Jesucristu, lania nna gatta elha nabani guecani ttu dia liiba.

¹⁷ Larcala nna satíaba rári: “Xxeni ra lelu, Tata Do Iyyabaa Benni rinnabia ttu dia lii. Lä gattiguabalu lhe lä riláguabani ca benni lu lhe. Tturbalu do ancalu Tata Do Iyyabaa, yulu iyárecha lhe.” Amén.

¹⁸ Timoteo, lu ancalu attiba xiꞌinia. Nnanna nna rodhaꞌana las nálu nu rpealu-ni, tsa bittu gasinlu unlu sina gue Tata Do Iyyabaaha itú iqui itú lelu, cumu anába chi utixxiꞌa ca benni unne ca tisa bete Tata Do Iyyabaaha. Neti nna xenba lasia tseeba unlu sina nu chi gaꞌana unlu.

¹⁹ Tsitsi güia lelu Jesús, beni nu anca tsee lhe qui bittu bi te nu unna udú xiyyan lu. Cumu ttulhe ca benni de bitturu bedocana tisa uncana nu racaquinna anca tsee, nuarca bedhá iquicani ria lecani gue nu anca gualí.

²⁰ Lheꞌe ca unnuha nna nutsa ttu nu lá Himeneo, attu nu lá Alejandro lhe. Lacana nua chi bodhaꞌana las ná nu xxegüiha, qui ideticana bittu inne güeecana gue Tata Do Iyyabaaha.