1 Tesalonicenses 4 - Zapoteco de Aloápam

Gualuni nu reꞌo le Tata Do Iyyabaaha

¹ Nnanna nna lebiꞌi ca benni ria le Jesús attiba riꞌitu, rinnabatu len le lhe rulisatu le lhe gualun chi lo niꞌa gue Jesús Benni bananie ri, gualtseꞌe gualuni attiba beleꞌentu le unle qui chadi le Tata Do Iyyabaaha gue nu runle. Attiba runle nnanna aníaba gualunchatti.

² Lebiꞌi nna chiba yule gue nu chi utixxiꞌentule unle, Jesús Benni bananie ri bete derechu len riꞌitu qui uleꞌentu le gue nu unle.

³ Tata Do Iyyabaaha nna raca lee iriesle lheꞌe nu lä anca tsee qui acale guee, larcala bittu tsequi mannile.

⁴ Coa ttu ttule utsá nále len latselale, cumu aná ruꞌu le Tata Do Iyyabaaha, gapaguaba le respeto latselale lhe.

⁵ Bittu udona lele sun ixúbinle cana un lenle cana nu ridá le cuerpu guele-na, attiba runi ca benni bittu anca biani Tata Do Iyyabaaha.

⁶ Ni ttu le bittu udhaca güele ttu betsi loesle, bittuguaba utsá roꞌole latsela nua lhe cumu Jesús Benni bananie ri ugüe ca nu uni anía ttu elha disa xeni, attiba chi rátu le lhe belisatu le lhe.

⁷ Tata Do Iyyabaaha läga uxie ri qui unri nu satsa, uxba Benniha ri qui acari nu riesi lheꞌe nu lä anca tsee.

⁸ Larcala nna nuxa bittu iyieninna udona tisa gue ca tisa ruleꞌetu-ni nna läganu xa benni nua riguꞌu niꞌa nua; Tata Do Iyyabaaha Benni bete Espíritu guee len riꞌi, Bennihaba nua riguꞌu niꞌa nua.

⁹ Lebiꞌi nna lägabi reasinle untu lo sitsi idhelhatu len lebiꞌi atta gátu le aquin gue betsi loesle, cumu chiba beleꞌeni Tata Do Iyyabaaha le aquin gue loesle.

¹⁰ Cumu anába runle leni iyába ca benni chi ria le Jesús seꞌe lo yu te láni Macedonia. Ttiaca rinnabatu lole, lebiꞌi ca benni ria le Jesús attiba riꞌitu, acaruinle gue ca biꞌin-na adí.

¹¹ Gualuni duelha tseꞌe tseele len adí benni, gualulaba lele gue nu anca guele lhe gualcueni sina leni niꞌa nále lhe attiba chi rátu le unle.

¹² Aná gualuni quini tsia le ca benni bittu ria le Jesús guele, qui bittubi eyasa guele lhe.

Bixa aca atti esía Jesús Benni bananie ri

¹³ Lebiꞌi ca benni ria le Jesús attiba riꞌitu. Riꞌitu nna raca letu unale bixa sate ca benni yatti-na, qui bittu tseꞌe siꞌile, attiba ca benni bittu ria le Jesús bittu xen lecani eyacani ca nu yatti-na.

¹⁴ Cumu attiguaba ria leri gualíba utti Jesús nianna beacanie attu libe, aníaguaba ria leri uni Tata Do Iyyabaaha, eyacani ca benni chi utti ria lecabi Jesús qui esíacabi len Ben-na.

¹⁵ Denuala nna rixxiꞌentu le ca tisa utixxiꞌen Jesús riꞌitu. Riꞌi ca benni bani atta sna seꞌerbari yies lo yu-ni atti esía Jesús, läga lo riꞌi eneruri lo ca benni chi utti-na.

¹⁶ Cumu cuinaba Jesús Benni bananie ri eyadie dedee iyyabaaha, tsitsiba dedo tsiꞌe runie mandadu, iyienguaba tsiꞌi ingeli anca benni loha lhe iyienguaba cuꞌu tsiꞌi trompeta gue Tata Do Iyyabaaha lhe. Lania nna primerba ca benni utti ria lecabi Jesús, eyacani.

¹⁷ Lenla nna dedaa riꞌi ca benni bani sna seꞌerbari yies lo yu-ni, tulapaba olhopi Tata Do Iyyabaaha ri lenri ca biꞌiniha lo bea-na, qui etiꞌari Jesús Benni bananie ri lo be. Aníaba tseꞌe lenri Benniha ttu dia liiba.

¹⁸ Larcala nna gualute elha xen lasi len loesle leni ca tisa-ni.