1 Tesalonicenses 3 - Zapoteco de Aloápam

¹ Atti bitturu udátu uchíatu de nutturle chi biyútu nna boquinnatteba iquitu eyaꞌana suntteba neti lania Silas lheꞌe yiesi Atenas,

² nianna udhelhattebatu betsiri Timoteo-na, biꞌini runi sina gue Tata Do Iyyabaaha, selaguabi riꞌitu rixxiꞌabi ca tisa gue Cristu itabi atta seꞌele-na qui useꞌetsitsibi le, uttipabi lele lhe. Anáchu nna tsiachatti lele Jesús,

³ qui bittu eyadi gaa ni ttule lo niꞌa gue elha disa ruyúle-na cumu lebiꞌi nna chiba yule anába te sateri.

⁴ Atti seꞌelitu len lebiꞌiha nna chi utixxiꞌentu le riꞌi nna labíaba uyúri elha disa. Unnuha bunni chi raca nnanna lebiꞌi nna chiba yule.

⁵ Denuala nna atti bitturu udáya uchíana nna udhelhatteba Timoteo etegüiabi qui aca xen lasia gansi gua riaru lele Jesús, cumu rastia quila biaca bi uni nu xxegüiha dhi yien le udhequile ria lele Jesús. Lania nna sina bentuha nna bittubi ixuuna.

⁶ Ttiaca nnanna nna chiba besía Timoteo atta seꞌetu-ni dedaabi atta seꞌele-na. Labi nna rixxiꞌenbi riꞌitu gue tseeba ria lele Jesús, ancale benni racani gue adí benni lhe satíaba rexxa lele riꞌitu itú iqui itú lele lhe rdacalhabale uyúle riꞌitu lhe attiguaba riꞌitu rdacatu uyútu le.

⁷ Larcala nna lebiꞌi ca benni ria lele Jesús attiba riꞌitu, lagüiba atti texxatta elha richacha iqui guetuha lhe ruyútu elha disa lhe bedírutu ttu elha xen lasi xeni de binatu dequi lebiꞌi nna tsitsiba ria lele Jesús.

⁸ De yutu lebiꞌi nna tsitsiba seꞌele lo neda gue Jesús Benni bananie ri-na, ttuttíru beꞌo elha naban guetu.

⁹ Gue unnuha nna bittu redeꞌentu tisa qui utetu xquixaru leni Tata Do Iyyabaaha guele lhe gue de yatterba chi benle bebe itta letu lhe atti riseꞌetu rudú xibitu lo Ben-na.

¹⁰ Rela resába rinnabatu len Tata Do Iyyabaaha, runtu duelha qui aca lanie riꞌitu ilentu le attu libe. Laníha nna uleꞌentu le adí qui edeꞌenle ria lele Jesús.

¹¹ Cuinaba Tata gueri do iyyabaaha Benni anque Dios gueri lenie Jesús Benni bananie ri cuꞌuque riꞌitu neda itatu atta seꞌele-na.

¹² Anáguaba cuinaguaba Jesús Benni bananie ri-na unie acachatti ruin gue loesle, gue iyába benni lhe attiba riꞌitu raquintu guele.

¹³ Laguabe unie cuequi tsitsi lele qui acale nu riesi lheꞌe nu lä anca tsee, bittu tulha gueni te lo Tata gueri do iyyabaaha gansi chi besía Jesús Benni bananie ri, lanie iyába ca benni chi seꞌe riesi ancacabi guee.