1 Tesalonicenses 1 - Zapoteco de Aloápam

¹ Neti Pablo, lania biꞌini lá Silvano lhe biꞌini lá Timoteo lhe ridhelhatu sitsi-ni guele lebiꞌi ca benni ria le Jesús ritupa lheꞌe yiesi Tesalónica. Lebiꞌi nna chi ancale benni baba len Tata gueri do iyyabaaha, leni Jesucristu Benni bananie ri lhe. Cuina laque aca lenque le, unque tseꞌele lhatsiru lhe.

Pablo rutebi xquixaru len Tata Do Iyyabaaha gue nu run ca benni seꞌe Tesalónica de ria lecabi Jesús

² Satíaba rutetu xquixaru len Tata Do Iyyabaaha gue iyábale, de rexxa letu le atti rinnetu lenie.

³ Satíaguaba rexxa letu le lo Tata gueri do iyyabaaha gue iyá nu runle cumu ria lele Jesucristu, gue runle ca benni yuda de raquinle guecani lhe gue ruchíale lo nu ratele cumu xen lele Jesucristu Benni bananie ri lhe.

⁴ Lebiꞌi ca benni ria le Jesús attiba riꞌitu, Tata Do Iyyabaaha racanie guele, riꞌitu yutu labe chi becuee le qui acale benni guee.

⁵ Cumu atti utixxiꞌentu le ca tisa tsee gue Jesucristuha, läga sunru leni tisa utixxiꞌentu le Ben-na, cheeguaba Ben-na elha ra xxen lee gue Espíritu gue Tata Do Iyyabaaha. Riꞌitu nna itú iqui itú letu yutu anca nu ratu leha nu gualí. Gua yubale gue gasná bedú letu atti useꞌetu len lebiꞌi de bentu qui salía tseenle.

⁶ Lebiꞌi nna runbale attiba runtu, attiba runi Jesús Benni bananie ri-na lhe. Masquiba guatele biyúle elha disa lo niꞌa gue nu bedhaca Benni le cumu de güia lele ca tisa gue Jesús Ttiaca Espíritu gue Tata Do Iyyabaaha benie qui bedaca lele.

⁷ Anioca nna ucale benni rugüia ca benni ria le Jesús seꞌe lo yu te láni Macedonia lhe Acaya lhe gue gaxasná runle qui aníachu diacabi runcabi.

⁸ De lebiꞌi nna chi bina ca benni seꞌe lo yu te láni Macedonia lhe Acaya lhe ca tisa gue Jesús Benni bananie ri. Anáguaba lheꞌe adí ca yiesi lhe chi yu benni gue gasná ria lele Tata Do Iyyabaaha. Larcala nna lärga biruha uca duelha quixxiꞌentu cana gue nu runle.

⁹ Cumu cuinaba lacana rixxiꞌaquinna riꞌitu gue gasná benle len riꞌitu atti bisíatu len lebiꞌiha, gue gaxasná uca bedhequile ria lele ca nu bittu gualí anca diosi qui güia lele Dios Benni do iyyabaaha lhe qui runle nu raca lee Ben-na unle lhe. Bennarguaba nna gualí anque Dios, doe banie lhe.

¹⁰ Anáguaba rixxiꞌacana, lebiꞌi nna seꞌele ribedale esía xiꞌinie Jesús dedee iyyabaaha. Benniha nua belhidha Tata Do Iyyabaaha lheꞌe baa atta yuꞌu ca nu yatti-na. Jesús anque Benni rodile ri qui bittu dhíri elha disa la tsuꞌubia chi daba isía ute Tata Do Iyyabaaha gue ca benni.