1 Pedro 5 - Zapoteco de Aloápam

Gaxasná udú le ca biꞌini anca nu lo gue ca benni ri lee Jesús

¹ Nnanna nna rulisa ca benni chi teru elha rieni guecabi anca nu lo gue ca benni ria le Cristu seꞌe len lebiꞌi. Cumu anáguaba neti ancaguaba nu lo gue ca benni ria le Cristu attiba lacabi. Neti anca benni begüia loa iyá nu guate Cristu, selaguaba len ca biꞌin-na edíbaaya nu ra xxen lee gaꞌana tsee gue Ben-na gansi chi besíe.

² Lhatsiru gualuyú ca benni gue Tata Do Iyyabaaha rixxiꞌenle ca tisa gue Ben-na, attiba ttu benni ruyú lhatsiru-na carneꞌe, itú iqui itú lele gualuleꞌequinbi attiba rába Tata Do Iyyabaaha unle, bittu unle sina-na re atti acaba lele. Bittuguaba de ridá lele dhíle belhi lhe sinuqui de anába redá lele unle.

³ Bittutte lo bedále innabiale ca benni baninle-na, sinuqui gualtseꞌela gualuni nu anca tsee raca lele un benni.

⁴ Aná nna gansi chi besía Jesús Benni anque nu rinnabia xeni anca nu lo gue ca benni ruleꞌeni adí benni nna lebiꞌi nna dhíle ttu nu unna cue xen lhe anca attiba corona gaꞌana tsee bittu iseꞌelona.

⁵ Anáguaba lebiꞌi ca uncuiti, gualudo tisa gue ca benni teru elha rien gueni anca nu lo gue ca benni ria le Tata Do Iyyabaaha. Iyábale gualudo tisa gue loesle len siꞌile, cumu: Ca nu runi ttaba-na redú disaba Tata Do Iyyabaaha locani, ttiaca ca benni bittu runi ttaba-na gua racaba lanie cana.

⁶ Gualeaca benni rudá iquini bittu runi ttaba lo Tata Do Iyyabaaha, qui gansi chi bisía sá chi gaꞌanani Ben-na lania nna cuequi xenie le.

⁷ Gualodhaꞌana iyárecha elha richacha iqui guele las ná Ben-na, cumu gua rapaba Ben-na le.

⁸ Gualtseꞌe yanlee, satía gualseꞌe tsee cumu nu xxegüi bittu raca uyún le-na attiba requi besi rutuxxu requina reguilana nuxa gona.

⁹ Gualeseꞌe tsitsi loni, tsitsi gualtsia lele Tata Do Iyyabaaha lhe guayúbale nna adí ca benni ria le Jesús attiba lebiꞌi seꞌe gatti laduba nna attiguaba ratele ruyúle elha disa anáguaba ratecabi.

¹⁰ Ttiaca dequide chi guatele ttu satti nna de chi ancale benni gue Jesucristuha, Tata Do Iyyabaaha Benni rute iyá lo nu tsee len riꞌi, Benni uxie ri qui tseꞌeri atta ttu dia liiba ruꞌu xieni gaꞌana tsee doe, lee unie acale nu chi bedaꞌani, nu seꞌe tsitsi lhe nu runi tsitsi lhe nu chi ria tsitsi leni Ben-na lhe.

¹¹ Ben-na cuequi xenrie ttu dia lii, lee anque Benni rinnabia ttu dia lii lhe. Amén.

Pedro rulhuxabi rinnebi

¹² Silvano, biꞌini xen lasia ancabi ttu benni gualíga ria le Jesús, benbi neti yuda uca sitsi atta rulisale lhe rixxiꞌatia le lhe gue elha tsee chi uxíle-na, unná ancana nu ruleꞌe lo gualíba racani Tata Do Iyyabaaha gueri, denuala nna tsitsi gualtseꞌe len nu chi ria lele.

¹³ Ca benni ria le Jesús seꞌe lheꞌe yiesi Babilonia chi becuee Tata Do Iyyabaaha aca guee attiba lebiꞌi, ridhelhacabi ttu padiuxi guele, anáguaba biꞌini lá Marcos biꞌini raca attiba xiꞌinia-na lhe ridhelhabi ttu padiuxi guele.

¹⁴ Gualgás loesle padiuxi len utsá lo xxaga loesle attiba labi ca benni anca gue Tata Do Iyyabaaha runcabi. Iyáxeale ca benni gue Jesucristu, xen su lee gualtseꞌe.