1 Pedro 2 - Zapoteco de Aloápam

¹ Larcala nna gualcua iyáxea nu lä anca tsee runle-na, nu run lele-na lhe nu ridiyiele-na lhe nu rapale malisi-na lhe nu rinne güee gue loesle-na lhe.

² Nu unlale nna gualuni attiba ttu unto chi ulba, reasinna gasná nu anca ttagaꞌa xisi, anía gualdhá lele ca tisa anca ttagaꞌa gue Tata Do Iyyabaaha, cumu ca tisa-na unque tseꞌe tsitsile lo neda gue Ben-na, anía liba nna lhále bittu tsia nittile,

³ cumu lebiꞌi nna chiba yule, Benni bananie ri-na anque Benni du tsee lee.

Lebiꞌi ancale benni chi becuee Tata Do Iyyabaaha

⁴ Larcala nna gualibiga gaxxa taa len Jesús, Ben-na anque attiba ttu iyya bani. Ca benni seꞌe yies lo yu-ni nna uluꞌu niꞌacani Ben-na, ttiaca len Tata Do Iyyabaaha, Ben-na anque attiba ttu iyya becuee texxatta lidhacani gaꞌana tsee.

⁵ Anáguaba lebiꞌi, ancaguabale attiba iyya bani, ca nu rixuu dia ricoa qui aca yotu anca leꞌa gue Ben-na, qui acale bixxudi chi seꞌe riesi rixuu lo sina gue Tata Do Iyyabaaha, de ria lele Jesucristuha nna lebiꞌi unle nu ruꞌu le Tata Do Iyyabaaha dhie baneda unnuha ancana attiba ttu úna.

⁶ Cumu anába dia lo ca sitsi gue Benna atta rá: Gualgüiarga, neti cuequia ttu iyya lheꞌe yiesi Sión-na, iyyaha anque iyya nu ribe ridentsitsi yoꞌo, anque iyya nu texxatta lidhaque lhe iyya nu chi becueea lhe benni tsia leni Ben-na nna delába Jesús, tsa läga ettuinna.

⁷ Len lebiꞌi ca benni ria le Jesucristuha, nu te xxeni lidhacani anca iyya-na. Ttiaca len ca nu bittu ria le Ben-na nna raxxíbana len lacana attiba rá lo ca sitsi gue Tata Do Iyyabaaha: Iyya uluꞌu niꞌa ca benni rucua yoꞌo-na, delába Jesús, beꞌeyue uque attiba ttu iyya nu ribe riden tsitsi-na yoꞌo.

⁸ Ráguaba lo ca sitsi-na: Iyya-na ancana nu runi richecucana, iyyattoo-na rurixxiettan cana. Lacana richecucana de bittu rudocana tisa gue ca tisa gue Tata Do Iyyabaaha, anába gaꞌana sate ca nu bittu rudo tisa gue Ben-na.

⁹ Ttiaca lebiꞌi nna ancale ca benni chi becuee Tata Do Iyyabaaha, ancale bixxudi gue Benni rinnabie ri-na lhe ancale yiesi chi ulequiesie lhe Benni guee lhe qui quixxiꞌenle ca benni gue nu xxeni reban leri run Ben-na. Denuala nna uxie le, eríale lheꞌe chulha-na qui utaꞌale lheꞌe xieni gaꞌana tsee guee.

¹⁰ Lebiꞌi ca tu ttua nna läga ancale benni lo yiesi gue Tata Do Iyyabaaha, ttiaca nnanna chi ancale benni lo yies gue Ben-na. Ca tu ttuha nna tsa läganu ratúa len le, ttiaca nnanna nna Tata Do Iyyabaaha ratúa lee le.

Gualtseꞌe gualuni nu raca le Tata Do Iyyabaaha

¹¹ Ca benni ria le Jesús racatia gueni, lebiꞌi ancale attiba ttu benni dittu yuꞌu neda, neti rinnaba lole bittu dhielhale unle nu lä anca tsee ridá le cuerpu guele-na unna cumu unnonna ritilha len lastoole-na.

¹² Lhatsiru gualudú lele len ca benni bittu ria le Tata Do Iyyabaaha seꞌe atta seꞌele-na. Aná nna ca nu rinne güe guele nnanna attisiba lebiꞌi ancale nu runi nu lä anca tsee, gansi chi bisía sá atti uni Tata Do Iyyabaaha elha uxtisi gue iyába benni nna lania nna cuequi xencana lee Ben-na de iláquinna lebiꞌi nna tseeba anca nu benle.

¹³ Qui nuttu nu inne güena gue Benni bananie ri-na, gualudo tisa gue iyába ca uxtisi gue yies lo yu-ni, anáguaba nu rinnabia anca nu lo-na lhe cumu lana ancana nu rinnabia xeni.

¹⁴ Anáguaba gualudoguaba tisa gue ca uxtisi roseꞌe nu rinnabia anca nu lo-na lhe cumu beseꞌe ca unná qui ugüecana elha disa ca nu runi nu lä anca tsee-na. Ca benni runi nu anca tsee-na nna gapacana respeto.

¹⁵ Cumu Tata Do Iyyabaaha raca lee unle nu anca tsee, qui bittu bi te ni ca nu lä caa elha rien gueni rinne güee-na innecana guele.

¹⁶ Lebiꞌi nna gualtseꞌeba gualuni atti runi benni nu nuttu nu rinnabian na, ttiaca bittu aquinle de ancale nu nuttu nu rinnabiana le nna guacaba unle nu racaba lele. Nu unlale nna gualtseꞌe gualuni nu anca tsee de ancale benni rixuu lo sina gue Tata Do Iyyabaaha.

¹⁷ Gualgapa respeto iyába benni, aquinle gue ca benni ria le Jesús lhe gatta elha rasi guele lo Tata Do Iyyabaaha lhe gualgapa nu rinnabia-na respeto lhe.

¹⁸ Lebiꞌi ca benni ttoꞌo lo sina gue benni, gualgapa respeto ca benni banquinna le-na, bittu sunru ca nu ruyú tseecan le-na lhe rapacana pasensi guele lhe sinuqui anáguaba ca nu lä ruyú tseecan le-na lhe.

¹⁹ Cumu tseerla anca len Tata Do Iyyabaaha gansi lebiꞌi rugo ruchíale lo elha disa ruyúle masquiba bittu benle nu lä anca tsee, sinuqui de runbale nu anca tsee lo Tata Do Iyyabaaha.

²⁰ Cumu gansi de benbale nu lä anca tsee nuarca rugüe benni le, lania nna tsa lägabi balaꞌana rele rutto ruchíale lo nu rateleha. Ttiaca gansi lo niꞌa gue de runbale nu anca tsee nna rudhaca güee benni le, lebiꞌi nna guaridibale elha xen lasi lhe guaruchiabale lo nua lhe lania nna guarebani Tata Do Iyyabaaha le balaꞌana.

²¹ Denuala nna uxi Tata Do Iyyabaaha le acale benni guee, cumu anába guate Cristuha biyúe elha disa lo niꞌa gueri. Gue atti ben Benniha ugüiale qui anáchu lebiꞌi nna aníaguaba usiguile unle.

²² Benniha nna tsa läga benie ni ttu nu lä anca tsee, lä uxi yieguabe lhe.

²³ Atti bedhaca disacan Benniha nna tsa läga bequi Benniha ecabie len tisa idí, atti ruttecana Benniha elha disa nna tsa läga bequi Benniha un dise, sinuqui las ná Tata Do Iyyabaaha Benni runi elha uxtisi tseehaba bocaꞌane nua.

²⁴ La laba Cristuha bedelha cuꞌe yua gue ca tulha gueriha atti uttie lo ya crusiha, qui riꞌi nna tsa ocaꞌanri nu lä anca tsee runriha attisiba chiba uttiri, ttiaca nnanna seꞌeri anca banri qui anáchu riꞌi nna tseꞌeri unri nu anca lhatsiru. Ca güee uca Cristuha nna benie qui beacale.

²⁵ Cumu lebiꞌi nna requibale ttua attiba requi carneꞌe biganna ttiaca nnanna nna chiba besíale len Cristuha, Benniha ruyúe le attiba ttu benni re lo carneꞌe, qui bittu bi dhacale.