1 Pedro 1 - Zapoteco de Aloápam

¹ Neti Pedro anca apóstol gue Jesucristu, ridhelha sitsi-ni guele lebiꞌi ca benni chi becuee Tata Do Iyyabaaha chi biría lo yies gueni seꞌe-na niba lheꞌe ca yies dittu lo yu gue Ponto, gue Galacia lhe Capadocia lhe Asia lhe Bitinia lhe.

² Lebiꞌi nna axta ttuali chi becuee Tata gueri do iyyabaaha le attiba chi gaꞌananie unie. Lee nna leni Espíritu guee-na ulequiesie le qui acale benni rudo tisa guee, anáguaba qui cua reni gue Jesucristuha ca tulha guele lhe. Cuina laque aca tsitsia lenque le lhe unque tseꞌe le xen su lee lhe.

Tata do Iyyabaaha godilee riꞌi

³ Benni ra xxeni leni anca Tata Do Iyyabaaha, Tata gue Jesucristu Benni bananie ri, Ben-na nna de ratúaba lee ri nna benie beacari benni cubi attisiba ulbari attu libe de beacani Jesucristuha beríe lheꞌe baa atta yuꞌu ca nu yatti-na. Unní rute ttu elha xen lhasi gualí lenri,

⁴ riꞌi nna guadíbari interés nu tua tsee-ni Tata Do Iyyabaaha utee gueri iyyabaaha, unnuha nna läga iseꞌelona, lä itsigaguabana lhe lä usuguabana lhe.

⁵ Lebiꞌi nna de ria lele Tata Do Iyyabaaha nuarca Ben-naba rape le leni elha ra xxen le guee, qui galhale lhále attiba chi gaꞌananie unie atti isía ca sá lhuxa.

⁶ Denua nna gualedaca lele, masquiba nnanna atti seꞌele ttu satti yies lo yu-ni nna lebiꞌi nna satele uyúle ixeloba ca elha disa.

⁷ Ca elha disa uyúle-na uncana uleꞌe lo gansi gualí ria tsitsi lele Tata Do Iyyabaaha. Attiba oro-na masquiba ancana nu riseꞌelo, ttiaca labíaba riana lo gui qui rería ttagaꞌa nu anca oro, larcala nna nu ria tsitsi leri Tata Do Iyyabaaha ancana nu tseerla atti oro, denua nna dequide chi betto bechíale lo nu satele, de ria tsitsi lele Tata Do Iyyabaaha nna ralhale cue xenle lhe dhi lidhacale lhe iyapale respeto lhe atti eyacaxxe Jesucristu esíe.

⁸ Lebiꞌi nna raquinle gue Jesucristu masquiba nuttu Ben-na biyúle, nuttube rilenle nnanna ttiaca gua riaba le lee. Denua nna attulade reꞌo lele, unní ancana tu elha redaca lee nu bittu aca guele quixxiꞌale gue gaxasná ancana.

⁹ Redaca lele de chi diale eꞌeyule dhíle nu xen lele dhíle de ria lele Tata Do Iyyabaaha, delába odilá Ben-na le.

¹⁰ Ca profeta utixxiꞌa ca tisa bete Tata Do Iyyabaaha len lacabi useꞌe atti nía, utsatsa niꞌacabi lhe unnaba tisacabi lhe gue gaxasná odilá Tata Do Iyyabaaha ca benni, utixxiꞌaguabacabi gue elha tsee chi bedále Ben-na betee len lebiꞌi lhe.

¹¹ Espíritu gue Cristu, benni yuꞌu lheꞌe lastoo ca biꞌinihaba rixxiꞌenie ca biꞌiniha gue iyába nu sate Cristuha, gue iyába nu tsee aca dequide lania de gatti Benniha lhe. Ca biꞌiniha nna bencabi duelha utsatsa niꞌacabi nuxa benni nua sate anía, nucaxa aca nua lhe.

¹² Ttiaca Tata Do Iyyabaaha nna utixxiꞌabanie ca biꞌiniha läga aca nua tiempu atti seꞌecabi yies lo yu-ni, sinuqui tiempu seꞌeri nnanna liba aca nua. Nnanna nna iyyabaaha li udhelha Tata Do Iyyabaaha Espíritu guee qui raca lanie ca benni requi rixxiꞌa ca tisa gue Jesús, ca tisaha ben-na chi utixxiꞌencabi lebiꞌi. Unní nna axta ca ingeli-na ridá lecabi ilencabi-na.

Tata Do Iyyabaaha raca lee acari nu seꞌe riesi anca nari

¹³ Denua nna gualulaba tsee lele gue nu unle, gualunna leni elha rieni lhe. Itú iqui itú lele gualuxxen lele gue nu redá le Tata Do Iyyabaaha utee len lebiꞌi atti eyacaxxe Jesucristuha attu libe.

¹⁴ Gualeaca attiba ttu xiꞌini rudo tisa gue tata gueni, bitturu tseꞌele unle ca nu ridá lele runle atti ancale nu chulha leni bittu chi yu nu anca gue Tata Do Iyyabaaha.

¹⁵ Sinuqui gualtseꞌe la gualuni nu anca tsee qui acale nu seꞌe riesi lheꞌe nu lä anca tsee, cumu Tata Do Iyyabaaha benni uxie le-na anque benni do riesi lheꞌe nu lä anca tsee.

¹⁶ Cumu lo ca sitsi gue Ben-na rá: “Acale nu seꞌe riesi lheꞌe nu lä anca tsee, attiba neti anca Benni do riesi lheꞌe nu lä anca tsee.”

¹⁷ Gansi lebiꞌi rále raca Tata guele Tata Do Iyyabaaha Benni runi ttu ttulapaba elha uxtisi gue coa nu runba ttuttu benni, lebiꞌi nna gualgape respeto itú iqui itú lele laca seꞌele yies lo yu-ni.

¹⁸ Cumu chiba yule, Ben-na bodile le lo nu lä anca tsee seꞌele runleha nu bidetile gue ca benniola gueleha, anáguaba gua yuxeabale läga len oro o len plata nu risíaba riseꞌelona utixa Ben-na qui ulále bittu dia nittile,

¹⁹ sinuqui leni reni gaꞌana tsee gue Cristuha bodilá Ben-na le, Benniha uttie, uque attiba ttu carneꞌe tsee nu tsa bittu bixa anquinna qui uyuꞌe úna lo becoa gue Tata Do Iyyabaaha.

²⁰ Atti deobali cue yies lo yu-ni chi bodú Tata Do Iyyabaaha Cristuha qui unie len Ben-na nu chi benie-ni, ttiaca tiempu seꞌeri nnanna liba bisíe qui unie salía tseen le.

²¹ Lebiꞌi nna de Cristuha nna ria lele Tata Do Iyyabaaha Benni beni beacani Cristu dequide uttie, leni unnuha nna benie ure xen Cristuha, qui anáchu lebiꞌi nna tsia lele Tata Do Iyyabaaha, uxxen lele gue nu chi re unie lhe.

²² Lebiꞌi nna de rudole tisa gue ca tisa rixxiꞌa nu anca gualí-na, nuarca chi beni Espíritu gue Tata Do Iyyabaaha beaca nari lastoole qui anáchu gualíga eꞌeyule acaguinle gue ca benni ria le Jesús. Larcala nna itú iqui itú lele aquin gue loesle.

²³ Lebiꞌi nna chi ulile attu libe, ttiaca bitturu ca xxudi xnale ca nu rattibana uluꞌucana le, sinuqui ca tisa gue Tata Do Iyyabaaha benni anca bani tsa bittu lhuxa-na benie ulile nnanna attu libe.

²⁴ Cumu lo ca sitsi gue Tata Do Iyyabaaha rá: Iyába ca benni seꞌe yies lo yu ancacana attiba ixxi. Nu ra xxeni lecani nna ancana attiba ca iyya daa lheꞌe ixxi-na. Ixxi-na ribisbana, iyyaha nna riyinnibana.

²⁵ Ttiaca ca tisa gue Benni bananie ri-na ttu dia liiba ruchíe. Ca tisa-na ben-na ancaque ca tisa rodiláque le chi utixxiꞌentu le.