1 Juan 5 - Zapoteco de Aloápam

Ca benni xen suba lecani Jesús

¹ Iyába ca benni ria lecani Jesús anque Cristu, ca unnuha ancacana xiꞌini Tata Do Iyyabaaha. Ca benni racaquinna gue Tataha nna racaguabaquinna gue ca xiꞌin Benniha.

² Gansi riꞌi raquinri gue Tata Do Iyyabaaha, runri nu benie mandadu unri lhe lania nna chi yuri riꞌi nna gua racabinri gue ca benni anca xiꞌinie.

³ Atti rudori tisa gue Benni benie mandadu unri nna lania ruleꞌe lori raquinri gue Ben-na. Nu benie mandadu unri nna läga anca ben-na ttu nu tsanni disinri unri.

⁴ Cumu iyába ca benni chi anca xiꞌini Tata Do Iyyabaaha, rdacana ruchíacana bitturu runicana nu lä anca tsee te yies lo yu-ni. Cumu de ria leri Jesús, nuarca rdári ruchíari bitturu runri nu lä anca tsee te yies lo yu-ni.

⁵ Sunruba benni ria leni gualí anca Jesús xiꞌini Tata Do Iyyabaaha, rdana ruchíana bittu runna nu lä anca tsee te yies lo yu-ni.

Espíritu gue Tata Do Iyyabaaha rixxiꞌe nuxa anca Jesús

⁶ Jesús Benni anque Cristu bisíe yies lo yu-ni. Leni inda udi Benniha nna reni belali Benniha atti uttie nna beleꞌe lo nuxa anque. Läga sunru atti udi Benniha inda beleꞌe lo nuxa anque, anáguaba leni indaha lhe leni reni guee belalie atti uttie lhe. Espíritu gue Tata Do Iyyabaaha rixxiꞌe nu ria-ni, cumu Ben-na anque Benni rixxiꞌa nu anca gualí.

⁷ Tsunna ca Benni seꞌe iyyabaaha rixxiꞌa gue Benni: [Tataha lhe Xiꞌinie Benni anque tisaha lhe Espírituha lhe. Iyunnaba ca Ben-na ttuba ancaque.]

⁸ Iyunnaba ca Ben-ni rixxiꞌa yies lo yu-ni Jesús anque xiꞌini Tata Do Iyyabaaha: Espíritu-na lhe atti udie inda lhe reni belalie lo ya crusiha lhe ttuba anca nu rá iyunnaque.

⁹ Riꞌi nna gua rutebari lidhaca nu rá ca benni seꞌe yies lo yu-ni, ttiaca dacaru nu rá Tata Do Iyyabaaha, cumu de cuinaga lee utixxiꞌe gue Xiꞌinie.

¹⁰ Benni ria leni Xiꞌini Tata Do Iyyabaaha, unnuha yuꞌu ca tisa utixxiꞌa Benniha lheꞌe lastooni. Nu bittuba ria leni gue nu rá Tata Do Iyyabaaha nna unnuha runna dequi anca Benniha nu run leni, cumu de bittu ria leni gue nu rixxiꞌa Benniha gue Xiꞌinie.

¹¹ Ca tisa-ni benniha rixxiꞌa Tata Do Iyyabaaha: Lee nna chi bete elha nabani gatta ttu dia lii gueri. Elha nabaniha nua utee Xiꞌini Benniha len riꞌi.

¹² Benni du Xiꞌini Tata Do Iyyabaaha len lana, gua teba elha nabani gatta ttu dia lii gueni. Nu bittuba duna len Ben-na, lägabi elha nabani gatta ttu dia lii te gueni.

Ni riluxa run Juan lo sitsi-ni

¹³ Runia iyonni lo sitsi-ni guele lebiꞌi ca benni ria lele Xiꞌini Tata Do Iyyabaaha qui chi yule gua teba elha nabani gatta ttu dia lii guele, [qui anáchu tsiaru lele Xiꞌini Tata Do Iyyabaaha.]

¹⁴ Riꞌi nna xenba leri Tata Do Iyyabaaha, cumu gua yubari nna gansi innábari lenie nu radi lee dhíri nna güiyienbanie gueri.

¹⁵ Attiba chi yuri Benniha nna gua rienbanie gue bixa rinnabari loe, anáguaba chi yuri lee nna gunnabe nu chi unnabari lenie.

¹⁶ Gansi nuxa ttule rilenle runi ttu ca benni ria le Jesús ttu nu lä anca tsee nu bittu quilana elhutti gueni lo Tata Do Iyyabaaha, lana nna innábana lo Benniha dhie elha xen lasi gue nu runi nu lä anca tseeha, Benniha nna gutebe elha nabani gue nua gansi bittuba anca nu lä anca tsee run nua nu quilana elhutti gueni. Cumu te ttu nu bittu anca tsee run benni nu bittu rilána elhutti gueri lo Tata Do Iyyabaaha. Teeguaba nu bittu anca tsee run benni nu rilána elhutti gueni lhe. Neti nna läga rpea le gualinnaba len Tata Do Iyyabaaha dhie elha xen lasi gue ca nu runi nu bittu anca tsee rila elhutti guecani.

¹⁷ Iyába nu lä anca tsee runri ancana tulha lo Tata Do Iyyabaaha, ttiaca seꞌe ca nu lä anca tsee runri lägabi ancacana nu rila elhutti gueri.

¹⁸ Riꞌi nna gua yubari, iyába ca benni chi anca xiꞌini Tata Do Iyyabaaha, lärga rusigui ca unnuha runcana nu lä anca tsee, cumu Jesús Xiꞌini Tata Do Iyyabaahaba rape ca unnuha, nu xxegüiha nna lärgabi ridí yiena ca unnuha.

¹⁹ Riꞌi nna yubari, ancabari gue Tata Do Iyyabaaha. Iyába ca benni seꞌe yies lo yu-ni ca nu bittu ria lecani Benniha nna nu xxegüihaba rinnabian cana.

²⁰ Gua yuguabari nna Xiꞌini Tata Do Iyyabaaha bisíe yies lo yu-ni qui betee elha rieni gueri qui benbiari Benni gualíga anca Tata Do Iyyabaaha. Riꞌi nna seꞌeri leni Benni gualíga anca Tata Do Iyyabaaha cumu seꞌeri leni Xiꞌinie Jesús Benni anque Cristu. Lee anque Benni gualíga anca Dios, anque Benni rute elha nabani gatta ttu dia lii gueri lhe.

²¹ Lebiꞌi ancale attiba xiꞌinto quia, cuidadu gualdo. Bittu tsia lele ca nu bittu gualí anca diosi-na.