1 Juan 4 - Zapoteco de Aloápam

Gaxasná unri qui tte deenri ga du nu run leni

¹ Ca benni ria le Jesús, racatia guele, bittu tsia lele gue iyá ca nu rácana dequi rixxiꞌacana ca tisa rute Espíritu gue Tata Do Iyyabaaha len lacana. Primer xa gualuni qui ttedeenle gansi gualí quin ca unnuha Espíritu gue Benniha nua yuꞌu lheꞌe lastoocani, cumu ixeru ca nu run lecani chi requi yies lo yu-ni rácana dequi ancacana profeta gue Tata Do Iyyabaaha.

² Aní unle qui ttedeenle ga du nu gualínna du Espíritu gue Tata Do Iyyabaaha len lana: Iyába ca nu ridí roꞌocani rácana Jesucristuha bite yies lo yu uque benni attiba riꞌi, ca unnuha nua gualíba yuꞌu Espíritu gue Benniha lheꞌe lastoocani.

³ Nu bittuba ridí roꞌoni gualí uca Jesucristuha benni attiba riꞌi atti bite yies lo yu-ni nna lägabi Espíritu gue Tata Do Iyyabaaha yuꞌu lheꞌe lastoo nua, espíritu gue nu lä raca uyúna Cristuhaba yuꞌu lheꞌe lastoo nua. Lebiꞌi nna chiba bieninle dequi isía nu lä raca uyúna Cristu, nnanna nna chiba requi nua yies lo yu-ni.

⁴ Lebiꞌi ancale attiba xiꞌinto quia, lebiꞌi nna ancale benni gue Tata Do Iyyabaaha. Chiba udále lo ca nu run lecani rácana dequi rixxiꞌacana ca tisa rute Tata Do Iyyabaaha len lacana, cumu Espíritu do lheꞌe lastoole-na nna xxenru ra lee atti nu xxegüi requi yies lo yu-ni.

⁵ Ca nu run leni requi-na nna benni gue yies lo yu-niba ancacana. Larcala nna nu anca gue yies lo yu-niba rinnecana. Ca benni anca gue yies lo yu-ni nna rudo nagacani guecani.

⁶ Riꞌi nna ancabari gue Tata Do Iyyabaaha. Ca benni ancabiaquinna Benniha nna gua rudoba nagacani gueri, ttiaca ca benni bittu ancacana gue Tata Do Iyyabaaha nna läga rudo naga ca nua gueri. Aná nna ritedeenri ga duu nu chee Espíritu gue Tata Do Iyyabaaha rixxiꞌa nu anca gualí, ga duu nu chee be xxegüi rinne nu bittu anca gualí lhe.

Tata Do Iyyabaaha anque benni racanie gue ca benni

⁷ Ca benni ria le Jesús, racatia guele, aquin gue loesri tturi lhe atturi lhe cumu Tata Do Iyyabaaha runie aquin gue loesri. Iyába ca benni racaquinna gue adí benni nna ancacana xiꞌini Tata Do Iyyabaaha, ancabiaquinna Benniha lhe.

⁸ Nu bittuba raquinna gue nuxaba benni nna läga ancabien nua Tata Do Iyyabaaha, cumu Tata Do Iyyabaaha anque benni racani gue ca benni.

⁹ Benniha nna beleꞌe loe racanie gueri atti udhelhe yies lo yu-ni Benni tturbe do anque Xiꞌinie qui gattie cuenta gueri. Anía liba nna gatta elha nabani gueri ttu dia lii.

¹⁰ Leni unní beleꞌe lo Tata Do Iyyabaaha racanie gueri. Läga riꞌi udulori uquinri gue Tata Do Iyyabaaha, sinuqui Ben-naba ucanie gueri primero. Denuala nna udhelhe Xiꞌinie yies lo yu-ni qui uttie cuenta gueri, anía liba nna bebe nu risaꞌani Tata Do Iyyabaaha qui ridíe elha xen lasi gue ca tulha gueri.

¹¹ Ca benni ria le Jesús, racatia guele, gansi análi raquin Tata Do Iyyabaaha gueri, anáguaba riꞌi raca duelha aquin gue loesri tturi lhe atturi lhe.

¹² Tsa läganu chi bilenna Tata Do Iyyabaaha. Ttiaca gansi riꞌi raquin gue loesri tturi lhe atturi lhe lania nna gua duba Benniha len riꞌi, nu racani Benniha gueri nna gualíga yuꞌe lheꞌe lastoori.

¹³ De chi bete Ben-na Espíritu guee len riꞌi, nuarca chi yuri, lee due len riꞌi, riꞌi nna seꞌeri len lee.

¹⁴ Riꞌitu nna begüiaga lotu, larcala nna rixxiꞌatu, Tata gueri do iyyabaaha udhelhe Xiꞌinie yies lo yu-ni qui odile ca benni seꞌe-ni, bittu tsia nitticana.

¹⁵ Nuxaba benni ridí roꞌoni rána Jesús anque Xiꞌini Tata Do Iyyabaaha, unnuha duna len Tata Do Iyyabaaha, Benniha nna due len lana.

¹⁶ Riꞌi nna chi yuri lhe chi ria leri lhe Tata Do Iyyabaaha racanie gueri. Tata Do Iyyabaaha anque Benni racanie gue ca benni ttu dia lii. Benni rusiguina raquinna gue adí benni, unnuha nua duna leni Tata Do Iyyabaaha, lee nna due len lana.

¹⁷ Unní ruleꞌe lo riꞌi nna chi ancari benni gualígani racani gue ca benni, qui anáchu nna gansi chi bisía sá un Benniha elha uxtisi gueri nna bittu bi te bixa lo niꞌa gue gasinri, cumu guaseꞌebari runri attiba beni Jesús atti udoe yies lo yu-ni.

¹⁸ Cumu Tata Do Iyyabaaha racanie gueri, nuarcala bittu rasinri. Nu yuna raquin Tata Do Iyyabaaha gueni nna läga rasin nua. Ca benni rasini rulaba lecani ute Tata Do Iyyabaaha elha disa guecani, cumu läga chi yu ca nua racani Tata Do Iyyabaaha guecani.

¹⁹ Riꞌi nna raquinri gue Tata Do Iyyabaaha, cumu Benniha ucanie gueri primero.

²⁰ Gansi nuxa benni rána: “Neti racatia gue Tata Do Iyyabaaha”, ttiaca rutía diba leni ca benni, unnuha nna nu güen lasiba nua. Cumu nu bittuba raquinna gue ca benni rilenna, ¿gasná aquin nua gue Tata Do Iyyabaaha benni bittu rilenna?

²¹ Unní beni Benniha ri mandadu unri: Benni raquinna gue Tata Do Iyyabaaha, anáguaba aquinna gue ca benni ria le Jesús.