1 Juan 3 - Zapoteco de Aloápam

Riꞌi chi ancari xiꞌini Tata Do Iyyabaaha

¹ Gualugüiarga, análirba de racani Tata Do Iyyabaaha gueri, axtaba xiꞌini Tata Do Iyyabaaha chi teni Benniha lári. Gualíba chi ancari xiꞌinie. Denuala nna bittu radú le ca benni seꞌe yies lo yu-ni nuxa ancari, cumu bittu ancabiaquinna Tata Do Iyyabaaha.

² Ca benni ria le Jesús, racatia guele, riꞌi nna chi ancari xiꞌini Tata Do Iyyabaaha, masquiba bittu chi yuri gattigasná eyacari, ttiaca riꞌi nna chiba yuri gansi chi besía Cristuha, lania nna eyacari attiba anca Benniha, cumu lania nna ilenrie attiga anque.

³ Larcala nna iyába ca benni xen lecani Jesucristuha eyacacana anía, ca unnuha nna runcana qui acacana nu nari lo Benniha cumu Benniha nna anque Benni nari.

⁴ Ttiaca iyába ca nu runi nu lä anca tsee ritsaba ca nua tisa gue nu beni Tata Do Iyyabaaha mandadu unri, cumu atti ritsari tisa gue nu beni Benniha mandadu unri nna tulhaba nua runri.

⁵ Lebiꞌi nna chiba yule Cristuha bite yies lo yu-ni qui utúe ca tulha gueri. Benniha nna tsa lägabi anque Benni te tulha guee.

⁶ Larcala nna iyába ca benni seꞌe len Cristuha nna lärga run ca nua nu lä anca tsee, ttiaca iyába ca nu runi nu lä anca tsee nna läga chi yucana nuxa anca Benniha, niguaba lä ancabiaquinna Benniha lhe.

⁷ Lebiꞌi ancale attiba xiꞌinto quia, bittu ugüelhale nuxa dhi yiena le: benni runi nu anca tseeha nna nu runi nu anca tsee lo Tata Do Iyyabaahaba anca nua, attiba Cristuha anque Benni runi ttulapa nu anca tsee.

⁸ Ttiaca nu runi nu lä anca tseeha nna gue nu xxegüihaba anca nua, cumu nu xxegüiha nna desde primeroha li udulona runna nu lä anca tsee. Denuala nna bita Xiꞌini Tata Do Iyyabaaha yies lo yu-ni bette tseꞌe loe nu runi nu xxegüiha.

⁹ Ni ttu ca benni chi ancacana xiꞌini Tata Do Iyyabaaha bitturu rudona lecani uncana nu lä anca tsee, cumu elha nabani gue Benniha nna chi yuꞌe lheꞌe lastoocani. Bitturguaba aca usiguicana uncana nu lä anca tsee lhe cumu chi ancacana xiꞌini Tata Do Iyyabaaha.

¹⁰ Iyába ca benni bittu runi nu anca tsee lhe bittu racaquinna gue adí benni lhe läga anca ca nua gue Tata Do Iyyabaaha. Aná nna ruleꞌe lo gaxa seꞌe ca benni anca xiꞌini Tata Do Iyyabaaha, gaxa seꞌe ca benni anca xiꞌini nu xxegüiha lhe.

Ca benni ria lecani Jesús raquin gue loescani

¹¹ Ca tisa-ni nua bieninle desdeba primeroha, ca tisa-ni nna ráque: aquin gue loesri tturi lhe atturi lhe.

¹² Bittu acale attiba benni utá lani Caín. Lana nna bettina betsiniha cumu Caín ucana gue nu xxegüiha. Nianna, ¿bi lo niꞌa gue bettina nua? Bettina nua cumu lana nna ucana nu runi nu lä anca tsee, betsiniha nna benna nu anca tsee.

¹³ Ca benni ria le Jesús, bittu ebaninle gansi ca benni seꞌe yies lo yu-ni bittu raca uyúcan le.

¹⁴ Riꞌi nna chiba yuri, chiba ulári lo elhuttiha, nnanna nna chi te elha nabani gueri ttu dia lii, cumu raquinri gue ca benni ria le Jesús. Ca nu bittuba racaquinna gue ca benni ria le Jesús, attiba nu yattiba anca ca nua lo Tata Do Iyyabaaha.

¹⁵ Iyába ca benni rutía di lecani ca benni, nu runi elhuttiba anca ca nua. Lebiꞌi nna gua yubale, ni ttu nu runi elhutti bittu aca banna ttu dia lii lo Tata Do Iyyabaaha.

¹⁶ Cristuha betee elha nabani guee qui uttie cuenta gueri. Anioca nna yuri gasná anca aquin gue loesri. Anáguaba riꞌi nna daa lori edí edenri ca benni ria le Jesús, masquiba gattiri cuenta guecabi.

¹⁷ Ttiaca gansi nux ttu benni gua te lenba guebi nna nianna rilenbi ttu benni ria le Jesús risá lobi, labi nna bittu satúa lebi biꞌiniha utebi nu reasin biꞌiniha, biꞌiniha nna läga gualínbi raquinbi gue Tata Do Iyyabaaha atti raquin Benniha gueri.

¹⁸ Lebiꞌi ancale attiba xiꞌinto quia, bittu ni lo ni tisaba innári dequi raquinri gue ca loesri-na, sinuqui leni nu runri uleꞌe lori gualíguinri raquin gue loesri.

¹⁹ Ganna unri aná, lania nna yu tseeri ancari benni baba len Tata Do Iyyabaaha benni ruleꞌenie ri nu anca gualí, qui gansi chi betsá duri lo Benniha nna xen suba leri bittu bi te bixa lo niꞌa gue udú xiyyan ri,

²⁰ masquiba lastoori-na rudelha iyyan ri dequi bittu run tseeri, ttiaca Tata Do Iyyabaaha la anque Benni ra xxeni ru lee atti lastoori-ni, Benniha anque benni yu iyárechatte.

²¹ Ca benni ria le Jesús, racatia guele, gansi lastoori-ni bittuba rudelha iyyan ri nna guateba elha xen lasi lenri gansi chi betsá duri lo Tata Do Iyyabaaha.

²² Benniha nna gutebe iyába bixa innábari lenie gansi rudori tisa unri nu chi benie mandadu unri, gansi gua runri nu ruꞌu lee lhe.

²³ Nu benie mandadu unri nna ancana: tsia leri xiꞌinie Jesucristu, aquin gue loesri lhe attiba chi benie mandadu unri.

²⁴ Ca benni rudo tisa gue nu beni Benniha mandadu aca nna ca unnuha seꞌecana len Tata Do Iyyabaaha, Benniha nna due len lacana. Riꞌi nna yuri lee nna due len riꞌi de do Espíritu guee-na lheꞌe lastoori.