1 Juan 2 - Zapoteco de Aloápam

¹ Lebiꞌi, ca benni raca attiba xiꞌinia, runia unní lo sitsi qui bittu unle nu lä anca tsee lo Tata Do Iyyabaaha. Ttiaca gansi nux ttule uni nu lä anca tsee, gua doba Benni edí edenie le lo Tata gueri do iyyabaaha. Benniha nua Jesucristu benni runi ttagaꞌa nu anca tsee.

² Lee nna berú iqui berú lee uttie, cumu leni elhutti gue Benniha liba nna bebe nu risaꞌani Tata Do Iyyabaaha, anía liba nna dhie elha xen lasi gue ca tulha gueri. Bittu sunru riꞌi dhie elha xen lasi gueri, anáguaba dhie elha xen lhasi gue ca tulha gue ca benni seꞌe yies lo yu lhe.

Raca duelha udori tisa gue nu beni Tata Do Iyyabaaha mandadu unri

³ Gansi gua rudori tisa gue nu beni Tata Do Iyyabaaha mandadu unri, laniarguaba nna yuri gualíba anca bienri Benniha.

⁴ Nu rána: “Neti anca biatia Benniha”, nianna bittu rudona tisa gue nu beni Benniha mandadu unna nu run lebani anca nua, läga anca nua nu runi nu anca gualí.

⁵ Ttiaca benni rudo tisa gue nu beni Benniha mandadu unna unnuha rguaba nna gualínna raquinna gue Benniha. Anía liba nna yuri, riꞌi nna guancabari benni du len Tata Do Iyyabaaha.

⁶ Benni rána duna len Benniha nna raca duelha unna atti ben Cristu atti güequie yies lo yu-ni.

⁷ Ca benni ria le Jesús, racatia guele, benni runia lo sitsi-ni nna läga anca ben-na attu tisa cubi runia mandadu unle, la tisa-nba benniha bieninle primeroha. Tisa racale mandadu unle-ni nna anque tisa chi bieninle axta ttuha li.

⁸ Ttiaca nna benni runia lo sitsi-ni nna anque ttu tisa cubi runia mandadu aca, cumu Jesucristuha nna beleꞌe loe nu gualíga runi ca tisa-na mandadu aca, anáguaba lebiꞌi lhe seꞌeguabale ruleꞌe lole nu gualíga runi ca tisa-na mandadu aca. Cumu nu anca chulhaha nna chiba dia nua ritena, xieni benni anca gualíha nna chi rudanie.

⁹ Benni rána dequi gua dubana lheꞌe xieni nna ttiaca rutía dirba leni benni nna unnuha nna atta chulhaba sna duba nua.

¹⁰ Benni raquinna gue adí benni nna unnuha duna lheꞌe xieni. Larcala nna tsa lägabi te bixa unna ichecu nua qui unna nu bittu anca tsee.

¹¹ Ttiaca nu rutía di leni adí benni nna lheꞌe atta chulhaba du nua lhe requina lhe. Tsa läga yu nua gaxa diana cumu chulhaba chi benna nua attiba nu xua loni.

Bittu unle nu lä anca tsee raca yies lo yu-ni

¹² Guele unní runia lo sitsi-ni, lebiꞌi ancale attiba xiꞌinto quia. De nu beni Jesucristuha nna chiba uxí Tata Do Iyyabaaha elha xen lasi gue ca tulha guele.

¹³ Runia lo sitsi-ni guele, lebiꞌi ca benni xeni, cumu lebiꞌi chi anca bienle Benni chi do atti chi dhu lola cue yies lo yu-ni. Runia lo sitsi-ni guele lebiꞌi ca uncuiti cumu chi udále lo nu xxegüiha. Runia lo sitsi-ni guele, lebiꞌi ancale attiba xiꞌinto quia, cumu chi anca bienle Tata gueri do iyyabaaha.

¹⁴ Benia lo sitsi-ni guele lebiꞌi ca benni xeni, cumu lebiꞌi chi anca bienle benni chi do atti chi dhu lola cue yies lo yu-ni. Benia lo sitsi-ni guele lebiꞌi ca uncuiti, cumu chi ancale nu re tsitsi leni. Lebiꞌi nna chi begüeelhale utaꞌa ca tisa gue Tata Do Iyyabaaha lheꞌe lastoole, chi udále lo nu xxegüiha lhe.

¹⁵ Bittu aquinle gue nu anca gue yies lo yu-ni, lä acaguabinle gue nu bittu anca tsee raca yies lo yu-ni lhe. Nu raquinna gue nu anca gue yies lo yu-ni nna läga raquin nua gue Tata gueri do iyyabaaha.

¹⁶ Cumu nu bittu anca tsee ridá lee cuerpu gueri-na unna nu ridá lee ca iyya lori-na iláquinna lhe nu runri ttaba len nu te gueri lhe iyába unní nna gue yies lo yu-ni bunni, läganu anca gue Tata gueri do iyyabaaha unní, nu anca gue yies lo yu-niba unní.

¹⁷ Yies lo yu-ni lenna iyába nu bittu anca tsee ridá le benni unna diaba na riluxana, ttiaca benni runi nu ruꞌu le Tata Do Iyyabaaha nna aca banba nua ttu dia lii.

Gualdo cuidadu len ca nu bittu raca uyúcana Cristu

¹⁸ Lebiꞌi ancale attiba xiꞌinto quia, ura bunni chi daa isía. Lebiꞌi nna chiba binale dequi isía nu bittu raca uyúna Cristuha. Gualíba nnanna nna ixe ca nu bittu raca uyúcana Cristuha chi biría runcana dequi lacana ancacana Cristu. Denuala nna nuarca yuri chi daa isía ura.

¹⁹ Ca unná nna riꞌiba biselacana, lenla nna beriescan ri, cumu läga gualí ucacana benni sela len riꞌi. Ttirca gualíga ucacana benni baba len riꞌi nna sa seꞌebacana len riꞌi nnanna. Anába uca qui beleꞌe lo läga iyá ca nu sela len riꞌi ancacana benni baba len riꞌi.

²⁰ Ttiaca lebiꞌi nna chiba ulequiesi Cristuha le atti betee Espíritu gue Tata Do Iyyabaaha len lebiꞌi, larcala nna iyábale chi yule gue nu anca gualí.

²¹ Neti nna läga runia lo sitsi-ni guele de bittu anca bienle nu anca gualí, sinuqui runia lo sitsi-ni guele de chi yule gue nu anca gualí. Lebiꞌi nna gua yubale, tsa lägabi ttu nu bittu anca gualí riría lheꞌe tisa anca gualí.

²² ¿Nú nua anca nu run leni? Nu rána dequi Jesús, läga gualí anque Cristu. Unnuha nua ancana nu bittu raca uyúna Cristu, lana nua riguꞌu niꞌani Tata gueri do iyyabaaha lhe Xiꞌin Benniha lhe.

²³ Iyába ca nu riguꞌu niꞌacani Xiꞌini Tata Do Iyyabaaha, läga seꞌe ca nua len Tata Do Iyyabaaha. Nu ridí roꞌoni anca bienna Xiꞌini Tata Do Iyyabaaha nna duguaba nua leni Tata Do Iyyabaaha.

²⁴ Larcala lebiꞌi nna gualorexxa lele ca tisa bieninle primeroha. Gansi nu rá ca tisa bieninle primeroha eyaꞌan tsitsique lheꞌe lastoole nna lania nna gua seꞌebale len Tata gueri do iyyabaaha, leni Xiꞌini Benniha lhe.

²⁵ Benni nua tisa chi begüee Cristuha len riꞌi, lee nna utee elha nabani gatta ttu dia lii gueri.

²⁶ Runia unní lo sitsi-ni atta rixxiꞌatia le gue ca nu requi rdacacana dhi yiecana le.

²⁷ Ttiaca lebiꞌi nna yuꞌuba Espíritu gue Tata Do Iyyabaaha lheꞌe lastoole, Benni bete Cristuha len lebiꞌi. Larcala nna lägabi reasinle nuxa uleꞌenna le, cumu Espíritu-nba ruleꞌenie le iyába. Nu ruleꞌe Ben-na ancana nu gualí, läga run le Ben-na. Larcala nna gualusigui gualtseꞌe len Cristu attiba chi beleꞌeni Espíritu gue Tata Do Iyyabaaha le.

²⁸ Nnanna nna lebiꞌi ancale attiba xiꞌinto quia, gualtseꞌe len Cristuha, qui gansi chi beacaxxe Benniha nna riꞌi nna xen su lee seꞌeri lania, qui bittu ettuinri atti utsá duri lo Benniha gansi chi besíe.

²⁹ Lebiꞌi nna chiba yule Jesucristuha nna anque Benni runi ttulapa nu anca tsee. Gua yuguabale nna iyába ca benni runi nu raxxína leni nu anca tsee runie, ancacana xiꞌini Tata Do Iyyabaaha.