1 Corintios 9 - Zapoteco de Aloápam

Pablo rixxiꞌabi gue nu guaca gue ttu apóstol unna

¹ ¿Si läba ganna gua du yali guaba loa unia nu racatia anca tsee? ¿Si läba neti anca apóstol benni chi gaꞌanani Jesús ichea ca tisa guee? ¿Si läba neti chi bilátia Jesús Benni bananie ri-na? ¿Si läba de sina runia gue Benni bananie ri-na, lebiꞌi nna ancale benni chi ria leni Ben-na?

² Gansi leni adí benni bittu anca apóstol, ttiaca len lebiꞌi nna gualíba anca apóstol. Cumu de chi ancale benni baba len Benni bananie ri-na, unná ruleꞌe lo gualí anca apóstol.

³ Unní anca nu recabia gue ca nu rinnecana quia:

⁴ Riꞌitu nna guateguaba derechu guetu iꞌiya gotu nu utele.

⁵ Teeguaba derechu guetu icheetu ca nuila guetu ria le Jesús gaxaba diatu attiba runi adí ca benni bedheti ca tisa beleꞌe Jesús-na lhe ca betsi Jesús lhe Cefas-na lhe.

⁶ ¿Si sun netiba lenia Bernabé-na labíaba cuentu sina len niꞌa nátu qui te nu gotu, aca?

⁷ Lebiꞌi gua yubale läganu soldado te rudaxxuna nu anca gueni qui dhína nu reasinna tsiana utilha. Nuttuguaba nu te reada ya besuli, nianna bittu rona besuli ribía lo nua. Nuttuguaba nu te yuꞌinna carneꞌe nianna bittu redí baana ca unnuha.

⁸ Bittu aquinle ga suna gue nu rulaba le ca benni seꞌe yies lo yu-niba unní rulaba lasia ria aní, anáguaba rá lo ca ley bodhaꞌana Moisés.

⁹ Lo ca ley-na rá: “Bittu cuꞌu le yextsina roꞌo ca uꞌuna ruꞌu iqui xua xuxtila-na.” Läga sunru gue ca uꞌuna-n nua rulaba le Tata Do Iyyabaaha atti re anía.

¹⁰ Guebari nua rulaba le Benniha re anía. De lo niꞌa guebari nna re aná lo ca ley-na, cumu nu relhaꞌa lo yuha lenna nu run tsee xuaha, xenba le ca nua edícana lena gue sina runcana.

¹¹ Riꞌitu, attiba ttu nu uda xua nninni ancatu cumu chi bettedhaꞌantu ca tisa gue Tata Do Iyyabaaha len lebiꞌi. Larcala, ¿si yalhaba xxen nua gansi dhítu saroꞌo nu te guele yies lo yu-ni?

¹² Gansi adí ca nu requi rixxiꞌa ca tisa-na tee derechu guecani ridícana saroꞌo nu te guele, riꞌitu nna ¿si läba teerla derechu guetu dhítu nu utele? Ttiaca riꞌitu nna tsa lägabi chi rátu le: “Lebiꞌi nna daba lole ute le nu reasintu.” Gua ruchíabatu lo iyá nu ratetu, de runtu qui bittubi te bixa unna tsaya lo ca tisa gue Cristu.

¹³ Lebiꞌi nna gua yubale, ca benni rixuucana lheꞌe yotu-na, nu anca gue yotu-naba rocana. Ca benni runi sina lo becoa-na, ralhaguabacana rocana nu ribía lo becoa-na.

¹⁴ Anáguaba chi bocaꞌana Jesús aca: Ca benni rixxiꞌa ca tisa gue Ben-na aca bancabi len nu rute ca benni rienquinna ca tisa-na.

¹⁵ Ttiaca neti nna tsa lägabi chi rpea le utele len neti, lä runguaba nu ria-ni lo sitsi-ni qui utele nu ralha dhia. Cumu tseerla anca len neti gattia attichula itúa nu runi do tseea de rixxiꞌaya ca tisa-ni bittubi ridía.

¹⁶ Neti nna lägabi runia gue nu ra xxeni leni de rixxiꞌaya ca tisa gue Jesús, cumu chiba anca mandadu quixxiꞌaya ca tisa-na. Carusiꞌiru neti gansi bittuba quixxiꞌaya ca tisa gue Ben-na.

¹⁷ Gansi neti rixxiꞌaya ca tisa-na cumu de racaba lasia, guateba lhiaxa. Ttiaca gansi de rido duelhaba nuarca requia rixxiꞌaya ca tisa-na, lania nna läga runia nua de raca lasia, sinuqui de bocaꞌanba Tata Do Iyyabaaha sina-ni len neti.

¹⁸ Nianna, ¿bila nua anca lhiaxa ralha dhia ganna? Nu tsee ralha dhia ancana: Do tseea bittu ridía belhi gue de requia rixxiꞌaya ca tisa gue Jesús, delába bittu rinnaba ute ca benni nu ralha dhia.

¹⁹ Masquiba läganu denna roꞌa innabiana neti bixa unia, qui dhaba tsiaru le adí benni Cristu nna nuarca raca nu rudo tisa rixuu lo iyába ca benni.

²⁰ Atti doa len ca benni quia anca benni Israel-na, runba attiba runcana qui ridáya ria lecani Jesús. Qui dhaba tsia lee ca benni rudocana tisa gue ca ley bocaꞌana Moisés, nuarca runia dequi sna rudoba tisa gue ca ley-na, masquiba läga gualí rinnabiaru ca ley bocaꞌana Moisés neti.

²¹ Atti doa len ca benni bittu te ley guecani nna runguaba dequi bittuguaba te ley quia, qui ridáya ria lecani Jesús. Masquiba läga gualí anca nu requi la lo ley gue Tata Do Iyyabaaha, cumu neti anca nu rudo tisa gue ley gue Cristuha.

²² Atti doa len ca benni bittu chi seꞌe tsitsi lo neda gue Jesús, benguaba anca attiba lacana qui udáya useꞌetsitsicana. Benba anca attiba anca iyábacana qui chibuca udáya ulá ttu chupacana.

²³ De runba qui tsia le ca benni ca tisa gue Jesús nuarca runia iyába unná, qui galha dhia nu tsee rá ca tisa-na lhe.

²⁴ Lebiꞌi nna gua yubale atti ritta ca benni gue güexunni, ixebacana ritupa qui ruxunnicana, ttiaca tturba benni ridána ridína ttu elha tsee. Lebiꞌi nna gualuttipa lele lo neda gue Tata Do Iyyabaaha qui dhale dhíle elha tsee ute Ben-na.

²⁵ Iyába ca nu ritta-na chi reseꞌe tseecana qui quittacana, tsa lärga runcana ni ttu nu unna unnitticana. Lacana runcana aná qui dhacana dhicana ttu corona nu riseꞌe lobana, ttiaca riꞌi nna chi ruttipa leri qui dhíri ttu corona bittu iseꞌe lo.

²⁶ Neti nna läga cuenta diaya ruxunnia attiba ttu nu bittu yuna gaxa isínna bittuguaba rutiaya attisiba benba rittilha lenia lhe.

²⁷ Nu runla nna ruttea elha disa cuerpu quia-ni runia duelha gueni udona tisa quia, qui läbi aca netila nu requi rixxiꞌatia ca benni ca tisa gue Jesús, bittu dhia elha tsee.