1 Corintios 8 - Zapoteco de Aloápam

Pablo rinnebi gue bela gue ca nimala rute ca benni úna len ca nu bittu gualí anca diosi

¹ Nnanna nna innea gue bela gue ca nimala rutti ca benni rutecana úna lo becoa gue ca nu bittu gualí anca diosi. Gualíba iyábari chi yuri gue unná, ttiaca nu chi yuri-na runna racari nu ttaba. Ttiaca gansi aquin gue loesri, unná runi riseꞌe tsitsiri lo neda gue Tata Do Iyyabaaha.

² Benni raquinna ancana nu chi yuxxatta, saroꞌoru nua chi yuna.

³ Ttiaca benni raquinna gue Tata Do Iyyabaaha, Tata Do Iyyabaaha anca biabanie nua.

⁴ Nnanna innea gue gansi gua dica gori bela gue ca nimala rutti ca benni rutecana úna lo becoa gue ca nu bittu gualí anca diosi-na. Riꞌi nna gua yuxeabari tsa läganu anca ca nu rá benni anca diosi sia yies lo yu-ni, tturba ttu Dios do, delába Tata Do Iyyabaaha.

⁵ Masquiba seꞌe ixe ca nu rácana anca diosi iyyabaaha lhe yies lo yu-ni lhe cumu gualí galá ixeba diosi lhe ca nu rá benni ancacana nu baninna cana lhe seꞌe,

⁶ ttiaca len riꞌi nna ttuba Dios do, delába Tata gueri do iyyabaaha. Lee benie iyá nu seꞌe, riꞌi nna seꞌeri qui ixuuri loe. Anáguaba ttuba Benni bananie ri do, delába Jesús Benni anque Cristu. De lee nna seꞌe iyá nu seꞌe, anáguaba riꞌi lhe.

⁷ Ttiaca läga iyá benni yucana unní. Ttulhele atta benbiale bedú xibile lo ca nu bittu gualí anca diosi-na ttua, axta nnanna atti role bela gue nimala utti nu betecana úna lo becoa gue ca unná, sna rulababa lele dequi gualíba bani ca nu rácana anca diosi-na. De ancale nu bittu seꞌe tsitsi lo neda gue Tata Do Iyyabaaha nna rulabatteba lele ancale nu anca tsiga lo Tata Do Iyyabaaha de utole belaha.

⁸ Gualí galá, läga elha go-na runna ancari nu tsuꞌuru le Tata Do Iyyabaaha. Cumu lägabi te iría lenri gansi gori belaha, niguaba lägabi unittiri gansi bittu gori na lhe.

⁹ Ttiaca gualgüia qui bittu aca nu du yali lole-na nu uni un ca benni bittu chi seꞌe tsitsi lo neda gue Jesús tulha.

¹⁰ Cumu gansi ilen ttu benni bittu chi du tsitsi lo neda gue Tata Do Iyyabaaha luu nu chi yurulu gueonni dolu go etta atta do becoa gue nu rá ca benni ancana diosi-na, ¿läba ganna udúban nua goguabana elha go uca gue nu betecana úna lo nu rácana anca diosiha?

¹¹ Lania nna lo niꞌa guelu de ancalu nu chi yu, tsia nitti benni bittu chi du tsitsi lo neda gue Tata Do Iyyabaaha, nu uttiguaba Cristuha cuenta gueni.

¹² Atti runle rulaba chupa le ca benni ria le Jesús bittu chi seꞌe tsitsi lo neda gue Tata Do Iyyabaaha, lo Cristuhaba Benniha runle nu lä anca tsee.

¹³ Larcala, gansi de roa elha goha nna rinitti benni ria leni Jesús, tsala bitturu goa bela qui bittu unia un nua nu lä anca tsee.