1 Corintios 7 - Zapoteco de Aloápam

Pablo rixxiꞌabi gaxasná un ca benni seꞌe latselacani, anáguaba ca benni bittu seꞌe latselacani lhe

¹ Nnanna ecabia gue nu rinnaba tisale neti lo sitsi udhelhale len netiha. Gualí galá tseeba anca gan bittuba utsá nále.

² Ttiaca lo niꞌa gue de nnelaba rixúyie benni tsequi mannicana, nuarca coa ttuttu unbiyuu dho lenna nuila gueni, coa ttuttu nuila nna dho lenna unbiyuu gueni.

³ Unbiyuuha nna daa loni gaꞌadhi lenna nuila gueniha, nuilaha nna daa loni gaꞌadhi lenna unbiyuu gueniha.

⁴ Lärga gue nuila-na anca cuerpu gueni, cumu gue unbiyuu guenihaba chi ancana. Niguaba unbiyuu-na bitturu anca cuerpu guen-na gueni, cumu gue nuila guenihaba chi ancana.

⁵ Bittu aquinle udá guele atti tsuꞌu cuꞌe loesle, larba ganna irupabale ttuba eseꞌele oquinna iquile bittu tsuꞌu cuꞌe loesle ttu tiempu qui aca tseꞌerle innele len Tata Do Iyyabaaha. Lenla nna eseꞌele juntu attu libe, qui bittu dhi yie nu xxegüiha le de lä ridále uchíale lo nu ridále cuerpu guele.

⁶ Nu anca quiba unní rinnea ria aní, läga rpea le gualunttiga aná.

⁷ Galá neti nna nuaba quia iyába benni nuttu nu dho lenna attiba neti, ttiaca Tata Do Iyyabaaha chi bete elha tsee gue ttuttu benni. Ttulhe benni uxícana elha tsee utsá nácani, a ttulhe benni uxícana elha tsee bittu utsá nácani.

⁸ Neti nna rulisa le ca unbiyuu seꞌe ttuba-na, lenle ca nuila bidabi-na. Tseeba anca ganna eyaꞌan ttubale attiba neti.

⁹ Ttiaca gan bittuba ridále lo nu ridá le cuerpu guele-na unna nna tseerla anca utsá nále attichula tseꞌele uyúle elha disa gue nu ridá lele unle.

¹⁰ Nnanna nna rulisa le ca benni chi betsá nále-na. Lebiꞌi ca nuila, bittu elaꞌale len ca unbiyuu guele-na. Nu rinnea-ni nna ancana nu runi Tata Do Iyyabaaha mandadu unri, läga anca unní nu anca quia.

¹¹ Gansi ttu nuila elaꞌana leni unbiyuu gueniha, lana nna ttubana eyaꞌanna bittu otsá náni attu libe. Gan biba nna unna duelha eyaca tseena leni unbiyuu gueniha. Aníaguaba lebiꞌi ca unbiyuu, bittu udhequile ca nuila guele-na.

¹² Adíle nna upea le nu racabatia, bittu nu rá Tata Do Iyyabaaha: Gansi ttu unbiyuu ria leni Jesús do lenna ttu nuila bittu ria leni Jesús, bittu elaꞌana leni nuila gueniha, gansi unnuha nna gua racaba leni dho lenna na.

¹³ Gansi ttu nuila ria leni Jesús do lenna ttu unbiyuu bittu ria leni Jesús, bittu elaꞌana len nua gansi unnuha nna racaba leni dho lenna na.

¹⁴ Cumu unbiyuu bittu ria leni Jesús reacana nu nari lo Tata Do Iyyabaaha de anca nuila gueniha nu ria leni Jesús. Anáguaba nuila bittu ria leni Jesús reacana nu nari lo Tata Do Iyyabaaha de do lenna unbiyuu ria leni Jesús. Cumu gan biba nna ca xiꞌincaniha nna nu tsigaba anca ca unnuha lo Tata Do Iyyabaaha, laca nnanna nna guancaba ca unnuha nu seꞌe riesi chi anca gue Ben-na.

¹⁵ Ttiaca gansi nuila o unbiyuu bittu ria leni Jesús rdacabana elaꞌana leni nu do lenna na elaꞌabacana. Lania nna lärgabirua daa lo unbiyuu ria le Jesús dhoru lenna nuilaha, anáguaba nuila ria le Jesús lhe cumu Tata Do Iyyabaaha nna uxbe ri qui tseꞌe len loesri lhatsiru.

¹⁶ Lu nna nuila, läga yulu gansi guadálu unlu qui lhá unbiyuu guelha bittu tsia nittina gansi na doba lenlu na. Niguaba lu, unbiyuu, läga yulu gansi guadálu unlu qui lhá nuila guelha bittu tsia nittina gansi na doba lenlu na.

¹⁷ Coa ttuttule nna gualtseꞌe gaxasná chi bocaꞌana Tata Do Iyyabaaha tseꞌele. Attiba seꞌele atti uxi Tata Do Iyyabaaha le acale guee aníaba gualtseꞌe. Unníba rpea iyába ca benni ria le Jesús uncabi.

¹⁸ Gansi ttu unbiyuu Israel chiba ren senni, nu runcana leni ca unbiyuu Israel, atti uxi Tata Do Iyyabaaha na acana guee, bittu ucatsina ancana anía. Gansi ttu unbiyuu bittu chi ren senni atti uxi Tata Do Iyyabaaha na acana guee, aníaba na ancana, bittu cuena senni.

¹⁹ Cumu lägabi raca duelha si ren senni, nu runcana leni ca unbiyuu Israel, o si bittu ren senni. Nu racaru duelha nna ancana, udori tisa gue nu beni Tata Do Iyyabaaha mandadu unri.

²⁰ Coa ttuttule nna na ancabale gaxasná ancale atti uxi Tata Do Iyyabaaha le acale guee.

²¹ Gansi ancalu benni ttoꞌo lo sina atti uxi Tata Do Iyyabaaha lu acalu guee, bittu ulaba lelu gue nua, ttiaca ganna gua dicaba lhálu nna ben duelha qui lhálu.

²² Benni ancana nu ttoꞌo lo sina atti biaxina güia leni Benni bananie ri-na, benni requi laba chi ancana de babana len Ben-na. Anáguaba benni bittu ancana nu ttoꞌo lo sina atti biaxna, benni ttoꞌo lo sinaba chi ancana gue Cristu nnanna.

²³ Leni nu te lidhacani uyoꞌe le. Denua nna bittu dhielhale acale nu ttoꞌo lo sina gue ca benni.

²⁴ Larcala nna ca benni ria le Jesús, coa ttuttule nna na ancabale attiba ancale atti uxi Tata Do Iyyabaaha le acale guee.

²⁵ Gue ca nu rbani-na, lägabi tisa chi bodhaꞌan Benni bananie ri-na len neti gue gaxasná tseꞌecana. Ttiaca netiba utea ttu elha rieni nu anca quiba lencana, cumu de anca benni guatúa le Benni bananie ri-na neti, nuarca xen le ca benni gue nu ria.

²⁶ Neti nna racatia, lo niꞌa gue elha disa ruyúri ca sá seꞌeri nnanna tseeba ancana seꞌeba ca benni attiba seꞌecana.

²⁷ Gansi do lenlu nuila nna bittu elaꞌalu. Gansi nuttuba nuila do lenlu nna bittu aquinlu quilalu nuila guelu.

²⁸ Gansi utsá nálu nna läga tulha nua unlu. Anáguaba nu rbaniha läga tulha nua un nua gansi utsá náni. Ttiaca ca nu rutsá náquinna elha richacha iquiba te guecani yies lo yu-ni. Unnuonna bittu raca lasia satecana.

²⁹ Neti nna raca lasia upea le, lebiꞌi ca benni ria le Jesús, lärgabirua isá seꞌeri, chiba dabigana gueri. Larcala nna ca nu chi betsá náquinna tseꞌecana uncana attisiba nuttuba nuila do lencana.

³⁰ Ca benni seꞌe ubesi-na uncana attisiba bittuba seꞌe siꞌicana. Ca nu seꞌe güexisi-na uncana attisiba bittuba re itta lecani. Ca nu roꞌo guecani-na uncana attisiba bittubabi te guecani.

³¹ Ca nu seꞌe redí baa nu te yies lo yu-ni nna gualtseꞌe gualuni attisiba bittubabi redí baale. Cumu yies lo yu rilenri-ni nna gualuxattena.

³² Neti nna rdaca bittu tseꞌele ichacha iquile gue nu te yies lo yu-ni. Uncuiti bittu chi betsá nániha nna rudoru le nua unna nu anca gue Benni bananie ri-na, unna nu reꞌo le Ben-na lhe.

³³ Ttiaca nu chi betsá nániha nna richacha iquini gue nu anca gue yies lo yu-ni, gue tixaca unna nu reꞌo le nuila gueniha lhe.

³⁴ Anáguaba läga ttudi anca leni nuila chi betsá nániha leni nuila anca nurbaniha. Nu rbaniha nna rulababa le nua unna nu reꞌo le Benni bananie ri-na, qui aca cuerpu gueniha leni espíritu gueniha nu seꞌe riesi anca gue Tata Do Iyyabaaha. Ttiaca nu chi betsá nániha nna rulabarla le nua gue nu te yies lo yu, qui unna nu radi le unbiyuu gueniha lhe.

³⁵ Rpeba le aná qui salía tseenle, läga de rudheaya le utsá nále. Ribale aná qui tseꞌele unle nu anca lhatsiru, udo lele unle itú iqui itú lele nu anca gue Benni bananie ri-na lhe.

³⁶ Gansi ttu benni raquinna läga anca tsee chi dia rite ida gue xiꞌiniunnániha atti anca utsá ná nua, na utsába ná nua, gansi aníaba rulaba leni anca tsee unna cumu utsá ná nua nna läga anca nua tulha.

³⁷ Ttiaca gansi ttu benni chiba boquinna iquini, na dobinna xiꞌiniunnániha ancana nu rbani, tseeba nua, ladiba lana du tsitsina leni nu raquinna nuttu nu duna rudo duelhan na, sinuqui aníaba raquinna unna len xiꞌiniunnániha.

³⁸ Larcala nna tseeba nua ute ttu benni xiꞌiniunnániha leni unbiyuu, ttiaca tseeru anca bittu utena xiꞌiniunnániha leni unbiyuu.

³⁹ Nuila chi betsá nániha nna gue unbiyuuhaba anca nua laca do bani unbiyuuha. Ttiaca gansi gatti unbiyuuha nna gua dicaba edí nuilaha attu unbiyuu raca leni edína, ladiba anca nua nu ria leni Jesús.

⁴⁰ Masquiba neti racatia tseerla salíanna gansi bittu otsá náni. Unná rulaba lasia cumu yua nna Espíritu gue Tata Do Iyyabaaha do lheꞌe lastooa-niba runie rinnea aná.