1 Corintios 5 - Zapoteco de Aloápam

Pablo rinnababi cuequiescana benni chi bexxí

¹ Lebiꞌi nna daa tisa guele rá benni dequi sela nu requi satsa len lebiꞌi. Nu satsa runi unná nna niba ca benni bittu anca bien Tata Do Iyyabaaha lä reaxquinna uncana aná, delába edo lencana nuila berupa gue tata guecani.

² Lebiꞌi nna gua runrule gue nu tsitsiba xxeni chi ra leni, lugar quiba unnuha nna rána odú xiyyanle lo niꞌa gue de beni unná aná. Gualcuequies unná len lebiꞌi.

³ Neti nna masquiba lä nu cuinaga du len lebiꞌi atta seꞌele-na, ttiaca lastooa-ni nna gua dube len lebiꞌi. Chiba benia elha uxtisi boquinna iquia bixa unle len benni beni aná, attisiba naba dua len lebiꞌi.

⁴ Gansi chi bitupale qui innele gue nu ucana, elha ra xxeni le gue Jesucristu Benni bananie ri nna gua dube len lebiꞌi, neti lhe gua duba lastooa-ni len lebiꞌi, lania nna Jesucristu Benni bananie ri nna utee derechu lenle

⁵ qui utele nu bexxí-na las ná nu xxegüiha, delába bixa satena qui tseꞌe lo iyá nu satsa ridá le cuerpu gueni runna. Anía liba nna lha espíritu gueni gansi chi besía Jesús Benni bananie ri.

⁶ Läga anca tsee racale nu ttaba, cumu lebiꞌi nna chiba yule, saroꞌoru levadura runna regúe betsi itúba cua ttaxtila.

⁷ Larcala gualcua iyába nu lä anca tsee run rinittile-na nu anca attiba levadura yaxxu nu runi rinitti cua, qui acale ttaxtila uca len cua cubi nu bittu levadura dia lenna. Lebiꞌi chi ancale benni bitturu sela nu lä anca tsee cumu Cristu benni anque carneꞌe anca úna gue laní te láni Pascua chi betticane qui utixe nu gaꞌana quixari.

⁸ Denua nna riꞌi nna unbari laníha, len ttaxtila bittu dia lenna levadura, bittu unri laní-na len ttaxtila dia lenna levadura yaxxu. Unní dienna innána, dhi roꞌori gue nu runri lhe inneri nu anca gualí lhe bitturu unri iyáloba nu lä anca tsee, niguaba nu satsa lhe.

⁹ Lo attu sitsi nu chi udhelha gueleha nna rulisa le rpea le bitturu iselale ca nu requi manni-na.

¹⁰ Neti nna läga ria le tsa bittu iselale ca benni bittu ria le ca tisa gue Jesús seꞌe yies lo yu-ni: ca nu ancacana nu requi manni, ca ubana lhe ca nu ridáxxatta lecani gattaru adí bixaruha guecani lhe ca nu rudú xibicani lo ca nu bittu gualí anca diosi lhe. Cumu gansi anía nna raca duelha iría le yies lo yu-ni qui bitturu iselale ca unná.

¹¹ Nu rpea le lo sitsiha nna ancana: Bitturu iselale ca benni rácana dequi ancacana benni ria le Jesús nianna requi mannicana, ridáxxatta lecani gattaru adí bixaruha guecani lhe ria lecani ca nu bittu gualí anca diosi lhe ancacana nu rinne güee gue benni subi lhe nu riꞌa lhe ubana lhe. Len ca benni runi aná nna ni yetta bittu edole go lenle cana.

^12-13 Neti nna lägabi elha ralha unia elha uxtisi gue ca nu bittu ria le ca tisa gue Jesús. Cumu ca benni bittu ria le Jesús, gunba Tata Do Iyyabaaha elha uxtisi guecani. Ttiaca lebiꞌi daa lole unle elha uxtisi gue ca benni ria le Jesús. Larcala nna gualcuequiesi benni bexxí-na len lebiꞌi.