1 Corintios 4 - Zapoteco de Aloápam

Pablo riguixxiꞌabi gue ca apóstol

¹ Larcala lebiꞌi nna raca duelha ulaba lele, riꞌitu nna sunruba benni rixuu lo sina gue Cristu ancatu, ancatu benni bodhaꞌana Tata Do Iyyabaaha lentu quixxiꞌatu gue nu te gatsinie ca tu atti nía.

² Attu nna: Ca benni bodhaꞌana Tata Do Iyyabaaha lencabi uleꞌequinbi ca benni, raca duelha uleꞌe locabi ancacabi benni runi nu daa locabi uncabi.

³ Neti nna lägabi retábitia gansi lebiꞌi innele gue bixa runia, niguaba lä retábitia gansi ca benni seꞌe lheꞌe yoꞌo lagüi uncana elha uxtisi gue nu runia lhe. Niguaba neti lä innea gue nu runia.

⁴ Läquiga de yua bittubi chi benia ttu nu lä anca tsee, nianna innía: Neti anca nu bittu tulha gueni te. Cumu Benni bananie ri-na liba runie elha uxtisi quia.

⁵ Larcala nna nuttu nu unle elha uxtisi gueni antisla isía sá gaꞌana aca elha uxtisi. Gualcueda esía Benni bananie ri-na. Lee nna guabeabe lolia nu te gatsi lheꞌe atta anca chulha, quixxiꞌe nu raquin lhiꞌu lheꞌe lastoo ttuttu benni lhe. Lania nna uni Tata Do Iyyabaaha cue xen ca benni ralha cue xeni.

⁶ Ca benni ria le Jesús, rixxiꞌatia le gue nu runia lhe gue nu runi Apolos lhe qui salía tseenle. Rpea le aná qui nu rugüiale guetu nna ixuuna udhetile bittutte bedále unle nu bittu gaꞌana lo sitsi gue Tata Do Iyyabaaha, qui aná nna bittu unle ttaba de babale len ttu benni rixuu lo sina gue Tata Do Iyyabaaha, nianna cuꞌu niꞌale attubi.

⁷ ¿Cumu nú rán le dequi rerle balaꞌana atti adí ca benni? ¿Bi nua te guele nna ancana nu bittu bete Tata Do Iyyabaaha? Gansi Bennihaba betee nu te guele nna nianna, ¿biacala runle ttaba attisiba lebiꞌiba utila nu te guele?

⁸ ¡Lebiꞌi nna guannalu dequi chiba te iyá nu ridá lele gatta guele! ¡Chiba ancale nu texxatta gueni! ¡Lärgabi reasinle riꞌitu cumu gue nu rinnabiaba chi run lele! Locala gualí chi ancale nu rinnabia qui anáchu riꞌitu nna acaguabatu nu innabia len lebiꞌi.

⁹ Neti racatia nna riꞌitu ca apóstol gue Jesús, xubana liba beseꞌe Tata Do Iyyabaaha riꞌitu. Attiba ttu nu chi boquinna iquicani gattina ancatu. Chiba beacatu nu runi ruxisi iyába ca benni seꞌe yies lo yu-ni atti rugüiacana riꞌitu, anáguaba ca ingeli-na lhe.

¹⁰ ¡Lo niꞌa gue Cristu nna rá benni dequi ancatu attiba ttu nu lä caa xieni gueni, laca lebiꞌi nna raquinle dequi ancale nu tsitsiba yu de ria lele Cristu! ¡Riꞌitu ancatu nu bittu run tsitsi, lebiꞌi nna ancale nu yalha tsitsi runle! ¡Ancatu nu riguꞌu niꞌa benni, lebiꞌi nna yalha rapacan le respeto!

¹¹ Axtaba lora nnanna ratetu rituintu, rebistu inda lhe. Chi anca tsuya xotu lhe rugüe ca benni riꞌitu lhe bittu listu do lhe.

¹² Tuttírba ratu letu ribentu sina qui te nu gotu. Ca nu riguecana iquitu nna rátu cana: “Tata Do Iyyabaaha aca lanie le.” Gua ruchíabatu lo nu rudhaca benni riꞌitu gansi chi ruría lacan riꞌitu lhe.

¹³ Ca nu rinne güe guetu nna rulisatu cana len tisa tsee. Axtaba lora nnanna ca benni nna runcana dequi ancatu ttu nu tsiga gue yies lo yu-ni, ancatu attiba ixi riguꞌuna ca benni lhe.

¹⁴ Läga runia nu ria-ni lo sitsi ridhelha guele qui unia ettuinle. Runia unní lo sitsi qui leni unní nna rudúa elha rieni iquile. Rulisa le attiba xiꞌinia ca nu racatia guecani.

¹⁵ Masquiba tseꞌe ttu tsii mil nu uleꞌenna le ca tisa gue Cristu, ttiaca läganu ixe tata guele seꞌe. Netiba anca tata guele lo neda gue Jesús Benni anque Cristu, de utixxiꞌatia le ca tisa gue Ben-na primero.

¹⁶ Larcala nna rinnaba lole, unle atti runia.

¹⁷ Lo niꞌa gue unní nna udhelha Timoteo atta seꞌele-na. Labi nna racatia guebi attiba xiꞌinia, ancabi nu rudo tisa lo sina gue Benni bananie ri. Labi orexxabi lele gue gaxasná runia de anca benni gue Cristu. Unnába ruleꞌetia iyába ca benni ria le Jesús seꞌe lheꞌe ca yiesi atta ritea.

¹⁸ Ttulhele nna tsitsiba ttaba chi runle, cumu raquinle dequi lärga nuruha neti ita ettenalhia le.

¹⁹ Ttiaca güitattegaba ettenalhia le gansi Benni bananie ri-na aca lee. Lania nna ugüia sanga gue ca nu tsitsiba gue nu xxeni chi run lequinna gansi gualíquinna te elha ra xxen le gue Tata Do Iyyabaaha guecani, ¿si sunruba guacacana innecana, aca?

²⁰ Cumu ca benni rinnabia Tata Do Iyyabaaha, läga sunru guacacana innecana, sinuqui unri nu rinneri len elha ra xxen le gue Tata Do Iyyabaaha.

²¹ Lebiꞌi nna ¿bi raca lele? ¿Si ita atta seꞌele na len ya lhadhi? ¿Si ita aca siꞌitia le len tisa siꞌi le, aca?