1 Corintios 3 - Zapoteco de Aloápam

Neti Pablo lenia Apolos ancatu benni rixuu lo sina gue Cristu

¹ Ca benni ria le Jesús, neti nna läga uca ulisa le attiba rulisa ca benni chi rudo tisa gue Espíritu gue Tata Do Iyyabaaha. Belisaba le attiba rulisa ca benni seꞌe runi nu anca gue yies lo yu-ni, cumu lania nna attiba ttu unto chicaꞌa ancale lo neda gue Cristu.

² Beleꞌebatia le ca tisa dica ttedeenle. Attiba ttu unto rasi, xisiba risela riꞌiyana, bittu elha go, aníaguaba lebiꞌi, cumu läga chi ritedeenle gue nu rpea le lania, niguaba nnanna lhe läga ritedeenle gue nu rpea le.

³ Cumu sna seꞌebale runle attiba run ca benni seꞌe yies lo yu-ni. Lebiꞌi nna laca sna seꞌerbale rapale malisi lhe sna ritilharba len loesle lhe sna ancabale benni runi attiba runi ca benni seꞌe yies lo yu-ni. Runbale attiba runi nuxaba benni.

⁴ Lebiꞌi nna atti rále: “Neti anca benni baba len Pablo”, adíle nna rále: “Neti anca benni baba len Apolos”. Atti rále aná nna runbale attiba runi nuxaba benni seꞌe yies lo yu-ni.

⁵ Nianna ¿nú raquinle anca Apolos? O ¿Nú raquinle anca neti Pablo? Sunruba benni rixuu lo sina gue Tata Do Iyyabaaha ancatu. Lee nna bixuunie riꞌitu qui güia lele Benni bananie ri-na. Coa ttuttubatu runtu sina chi bocaꞌane untu.

⁶ Neti utixxiꞌatia le ca tisa-na primero attiba ttu benni uda xua. Apolos nna beleꞌenbi le adí attiba ttu benni rudo inda nu chi yada. Ttiaca Tata Do Iyyabaahaba runie riseꞌe tsitsile lo neda guee.

⁷ Larcala nna tsa läganu nuxa anca nu rixxiꞌa ca tisa-na primero, niguaba nu ruleꞌe chatti adí lhe. Sunruba Tata Do Iyyabaaha anque Benni xeni. Labe runi riseꞌe tsitsi ca benni lo neda guee.

⁸ Lo Tata Do Iyyabaaha ttuba anca benni rixxiꞌa ca tisa guee-na primero leni benni ruleꞌenbi ca benni ca tisa guee-na adí masquiba cua ttuttubacana dhicana lhiaxa gue coa sina benbacana.

⁹ Neti Pablo lenia Apolos, irpabatu ancatu benni rixuu lo sina gue Tata Do Iyyabaaha. Lebiꞌi nna ancale attiba lo yu gue Ben-na nu runie sina loni, ancale attiba ttu yoꞌo die rucoe lhe.

¹⁰ Tata Do Iyyabaaha bedaa lee bete ttu elha tsee len neti rixxiꞌaya ca tisa guee-na, neti anca attiba ttu benni raca gueni rucoana yoꞌo. Neti utixxa cimientu gue yoꞌoha, attu benni subi nna diana rucoana iqui nua. Ttiaca coa ttuttu benni daa loni ugüiana gaxasná diana rucoana iqui nua qui ttedeenna gansi gua diana rucoa tseena.

¹¹ Jesucristu anque cimientu. Larcala nna nuttu nu aca gueni quixxana attu cimientu subi iqui cimientu chi utixxa Tata Do Iyyabaaha.

¹² Iqui cimientu-ni nna guacaba ucoa ca benni leni oro o leni plata lhe o leni iyya gaꞌana tsee lhe o leni yaga lhe o leni te gue xua lhe o leni iyyaxtila lhe.

¹³ Ttiaca sina ben ttuttu benni nna guleꞌe loba gue nua gansi chi bisía sá aca elha uxtisi gue ca benni, cumu labíaba tte nua lo gui, qui iría lolia sina gue ttuttu benni. Guiha uni uleꞌe lo gansi guanca sinaha nu anca tsee o si bittuba lhe.

¹⁴ Gansi nu becoa ttu benni uchíana bittubi dhacana atti ttena lo gui, biꞌini becoa nua nna dhibabi lhiaxabi.

¹⁵ Ttiaca gansi nu becoa ttu benni itebana, lania nna unnittibana nu ralhana dhína. Benni becoa nua nna gualábana attiba ttu nu ulá lo gui.

¹⁶ ¿Si bittuba yule, lebiꞌi ancale yotu gue Tata Do Iyyabaaha, Espíritu gue Benniha nna doe lheꞌe lastoole?

¹⁷ Lebiꞌi ancale yotu anca leꞌa gue Tata Do Iyyabaaha. Denua nna gansi nuxa utseꞌe lona yotu-na, lee nna utseꞌe loguabe na.

¹⁸ Ni ttule bittu dhi yie la lebiꞌiba. Gansi nuxale raquinle ancale benni te elha rieni gueni yies lo yu-ni, gualuni dequi benni bittu te elha rieni guebani ancale, qui anía liba nna eꞌeyule acale nu gualíga te elha rieni gueni.

¹⁹ Cumu elha rieni anca gue yies lo yu-ni nna nu bittu ixuuba anca unna lo Tata Do Iyyabaaha. Lo ca sitsi gue Ben-na rá: Ca benni rácana te elha rieni guequinna la leni elha resiꞌinu guequinnaba runi Tata Do Iyyabaaha riyaxxucana.

²⁰ Ráguaba lo ca sitsi guee-na: Gua yuxeaba Benni bananie ri-na, tsa lägabi ixuu nu rulaba le ca nu rá te elha rieni guequinna.

²¹ Larcala nna ni ttule bittu unle ancale nu ra xxeniru leni de ancale nu baba leni nuxa benni, cumu guebale anca iyába nu te.

²² Pablo lhe Apolos lhe Cefas lhe yies lo yu lhe elha nabani gueri-n lhe elhuttiha lhe tiempu seꞌeri nnanna lhe tiempu chi daba lhe guebale anca iyába unná.

²³ Lebiꞌi nna ancale gue Cristu, Cristu nna anque gue Tata Do Iyyabaaha.