1 Corintios 2 - Zapoteco de Aloápam

Pablo riguixxiꞌabi gue elha rieni gue Tata Do Iyyabaaha

¹ Ca benni ria le Jesús, neti nna atti bisíaya atta seꞌele-na qui utixxiꞌatia le gue nu run Tata Do Iyyabaaha, lägabi unne neti ca tisa rinne ttu nu yuxxatta, niguaba ca tisa elha lhe.

² Neti nna boquinna iquia atti doa len lebiꞌiha tsa bittu innea gue attu bixaruha, suntteba nu anca gue Jesús Benni anque Cristu innea, quixxiꞌaya gue Jesús benni utá lo ya crusiha.

³ Atti bisíaya len lebiꞌiha nna läga re tsitsi lasia, rixidiba de rasbatia.

⁴ Ca tisa unnea atti utixxiꞌatia le gue Jesús, läga ancaque ca tisa rinne ttu nu yuxxatta qui ixú yiele. Leni elha ra xxen le gue Tata Do Iyyabaahaba lhe leni Espíritu gue Ben-naba lhe unnea qui güia lele,

⁵ qui anáchu lebiꞌi nna tsia lele Jesús de xen lele elha ra xxen le gue Tata Do Iyyabaaha, bittu de xen lele ca tisa rinne ca benni tee elha rieni guecani.

Espíritu gue Tata Do Iyyabaaha ruleꞌenie ri gue nu bittu yu benni

⁶ Gualí galá, rinnebatu ca tisa rinne ttu nu tee elha rieni gueni atti rulisatu ca benni chi seꞌe tsitsi lo neda gue Tata Do Iyyabaaha. Tiaca läga rixuintu elha rieni anca gue yies lo yu-ni, niguaba nu anca gue ca nu rinnabia guequinna lhe cumu ca unná nna lhuxabacana.

⁷ Ca tisa gue nu tee elha rieni gueni rinnetu-ni nna ancaque nu anca gue Tata Do Iyyabaaha bittu ritedaani benni. Elha rieni guee te gatsinie nna atti deobali cue yies lo yu-ni chi gaꞌananie acana nu edí baari.

⁸ Unní unni bittu utedaani ca nu rinnabia seꞌe yies lo yu-ni, cumu ttirca ute daabaquinna lania nna läga betácana lo ya crusi Benni bananie ri Benni ra xxeni lee-na.

⁹ Attiba rá lo ca sitsi gue Tata Do Iyyabaaha: Nu bittu chi bienini benni lhe nu bittu chi biláni benni lhe nu niba lati ulaba le benni gueni lhe chi seꞌe tsee-ni Tata Do Iyyabaaha utee len ca benni racaquinna guee.

¹⁰ Ca unnuonna chi beni Tata Do Iyyabaaha beleꞌeni Espíritu guee-na ri. Cumu Espíritu guee-na ritsatsa niꞌe iyába, axta nu rulaba lhiꞌu lee Tata Do Iyyabaaha yu Ben-na.

¹¹ Cumu, ¿nú yuna bixa racani lhiꞌu lheꞌe lastoo ttu benni? Sunruba Espíritu yuꞌu lhiꞌu lheꞌe lastoo ttu benni yuna bixa raquinna. Anáguaba len Tata Do Iyyabaaha, sunruba Espíritu guee-na yue bixa rulaba lee.

¹² Riꞌi nna läga elha rieni anca gue ca benni seꞌe yies lo yu-ni uxíri. Espíritu betee Tata Do Iyyabaaha liba uxíri qui ttedeenri gue iyá nu tsee chi bedaa le Tata Do Iyyabaaha bete len riꞌi.

¹³ Rinnebatu gue unní len tisa beleꞌeni Espíritu gue Tata Do Iyyabaaha riꞌitu, läga leni tisa bedhetitu len ca nu te elha rieni guecani seꞌe yies lo yu-ni rinnetu. Aná nna rixxiꞌatu nu anca gue Espíritu gue Tata Do Iyyabaaha len ca benni chi yuꞌu Espíritu gue Ben-na lheꞌe lastoocabi.

¹⁴ Nu bittuba yuꞌu Espíritu gue Tata Do Iyyabaaha lheꞌe lastooni nna riguꞌuba niꞌani nu anca gue Espíritu gue Tata Do Iyyabaaha. Nu anca gue nu lä caa xieni gueniba anca Ben-na len lana, bittuguaba radú leni gue Ben-na lhe cumu Espíritu gue Tata Do Iyyabaaha liba runie radú leri gue nu anca guee.

¹⁵ Ttiaca benni yuꞌu Espíritu gue Tata Do Iyyabaaha lheꞌe lastooni, guacaba gue nua itsatsa niꞌani gue iyáloba ttu bixa. Lana nna läganu te aca gueni itsatsa niꞌani gueni.

¹⁶ Attiba rá lo ca sitsi gue Tata Do Iyyabaaha: ¿Nú rite deenna gue bixa rulaba le Benni bananie ri-na? ¿Nú aca gueni uleꞌenna Ben-na lhe? Ttiaca riꞌi nna ritedaabinri unná cumu te elha rieni gue Cristuha gueri.