1 Corintios 16 - Zapoteco de Aloápam

Pablo rinnebi gue belhi ritupa qui tsia Jerusalén

¹ Nnanna nna innea gue belhi ritupa qui dhi ca benni chi anca gue Tata Do Iyyabaaha. Lebiꞌi nna gualunba attiba chi bodhaꞌana un ca benni ria le Jesús seꞌe lo yu gue Galacia.

² Cua ttuttu sá redú niꞌa xumanu cuequies ttuttule ttu latti belhi gue cua nu uxíbale gue sina benle. Unnuha nna cua tseele na qui gansi chi bisíaya nna bittu tsequile güettupa belhi.

³ Gansi chi bisíaya atta seꞌele-na, lania nna idhelha ca benni chi becueeleha lheꞌe yiesi Jerusalén, qui sacaꞌancabi belhi chi bettupaleha. Neti nna guteba sitsi len lacabi nu rixxiꞌa loni nuxa ancacabi.

⁴ Gansi raca duelha tsiaya, anáguaba lacabi dhaguacabi len neti.

Pablo rixxiꞌabi gue bixa rulaba lebi unbi

⁵ Neti nna dequide liba ttea lo yu gue Macedonia, lania liba nna isíaya lheꞌe yiesi Corinto-na cumu labíaba ttea na.

⁶ Lania nna qui nicadiga güeyaꞌanba atta seꞌele-na ttu satti, o si itúba atti raca idilha lhe. Anáchu lebiꞌi nna unle neti yuda gue neda quia qui tsiaya attu ladu.

⁷ Neti nna bittu raca lasia nu yuꞌu nedaba ttea atta seꞌele-na. Raca lasia isá lenba len lebiꞌi, gansi Benni bananie ri-na aca lee.

⁸ Ttiaca nnanna nna sna eyaꞌanruba lheꞌe yiesi Éfeso-ni axta atti isía laní Pentecostés.

⁹ Cumu nnannala chi bealga lo neda quia qui aca quixxiꞌarua ca tisa gue Jesús, masquiba anáguaba seꞌe ixe ca nu bittu raca uyúcana neti.

¹⁰ Gansi isía Timoteo atta seꞌele-na, gualuni qui dho tseebi len lebiꞌi, cumu labi nna sina gue Benni bananie ri-n guaba runbi attiba neti.

¹¹ Larcala nna ni ttule bittu cuꞌu niꞌale bi. Delába unnuha nna gualunla bi yuda qui lhatsiru besiru usiguibi neda guebi, anáchu nna dhabi esíabi atta doa-ni. Cumu neti nna doa ribeda bi leni adí ca benni ria le Jesús.

¹² Biꞌini ria le Jesús lá Apolos-ni, yalha ruegu benia lobi itabi len adí ca benni ria le Jesús etenalhicabi le. Labi nna bittu uca lebi, ttiaca lenla nna güitababi nucaxa gapabi lo neda.

Ni rulhuxa Pablo nu rábi ca benni seꞌe Corinto

¹³ Bittu tseꞌe xulhale, lä udhanguale ria lele Jesús lhe. Gualcuequi ria lele lhe tsitsi gualuni lhe.

¹⁴ Iyába nu runle, gualun na len siꞌi lee.

¹⁵ Ca benni ria le Jesús, lebiꞌi nna gua yubale ca benni datía Estéfanas ancacabi ca benni primero güia lee Jesús seꞌe lo yu gue Acaya. Lacabi nna tsaba seꞌecabi runcabi yuda ca benni seꞌe riesi chi anca gue Tata Do Iyyabaaha.

¹⁶ Neti nna raca lasia udá iquile gue ca benni loes ca biꞌin-na, iyába ca benni runi yuda rixuucabi lo sina gue Tata Do Iyyabaaha lhe.

¹⁷ Reꞌo lasia bisía Estéfanas lenbi Fortunato lhe Acaico lhe atta doa-ni, cumu lacabi bencabi neti yuda nu bittu uca unle de nuttule seꞌe-ni.

¹⁸ Lacabi beni bebe itta lasia, anáguaba lebiꞌi lhe. Larcala nna gualgapa respeto ca benni loesi ca biꞌin-na.

¹⁹ Ca benni ria le Jesús seꞌe lo yu gue Asia ridhelhacabi ttu padiuxi guele. Aquila lenbi Priscila, iyába ca benni ria le Jesús rittupa lheꞌe yoꞌo guecabiha lhe ridhelhacabi ttu padiuxi guele len siꞌi le gue Jesús.

²⁰ Iyába ca benni ria le Jesús seꞌe-ni ridhelhacabi ttu padiuxi guele. Gualgás loesle padiuxi attiba labi ca benni ancacabi gue Tata Do Iyyabaaha runcabi.

²¹ Netiga Pablo, leni náya-nga runia letra quia lo sitsi-ni qui ridhelha ttu padiuxi len lebiꞌi.

²² Tsia nittiba nu bittu raquinna gue Jesús Benni bananie ri-na. ¡Betaa, Benni bananie riꞌitu!

²³ Cuina Jesús Benni bananie ri-na aca lanie le.

²⁴ Neti nna racalhatia guele len siꞌi le gue Jesucristu. Amén.