1 Corintios 15 - Zapoteco de Aloápam

Cristu beacanie dequide uttie

¹ Ca benni ria le Jesús, raca lasia orexxa lele ca tisa gue Jesús utixxiꞌatia leha, ca tisa-na Ben-na güia lele lhe seꞌe tsitsile ria lele lhe.

² Gansi usiguile tsia tsitsi lele ca tisa-na attiba chi utixxiꞌatia leha, lania nna gualábale. Gan biba nna cuentarba güia lele tisa-na.

³ Neti nna lola nu racaru duelha unale utixxiꞌatia le attiba beleꞌequinna neti, delába Cristu uttie lo niꞌa gue ca tulha runri attiba gaꞌana lo ca sitsi gue Tata Do Iyyabaaha.

⁴ Lee nna bigatsie lheꞌe baa, beyonna ubisa nna beacanie attiguaba rá lo ca sitsi gue Tata Do Iyyabaaha,

⁵ nianna beleꞌe loe len Cefas, lenla nna beleꞌe loe len iyába tsiꞌinu ca biꞌini bedheti nu beleꞌe.

⁶ Dequila nna ttu libeba beleꞌe loe leni guatela gayu gayua ca benni ria lecabi Ben-na. Ixecabi sna seꞌe banrubacabi, adícabi nna chiba utticabi.

⁷ Lenla nna bodileꞌe loe len Jacobo, delola nna bodileꞌe loe leni iyába ca biꞌini bedheti ca tisa beleꞌe.

⁸ Dequide liba chi beleꞌe loe len iyába ca biꞌin-na, lania liba nna beleꞌe loe len neti, attiba ttu unto bexxa nu uli yaꞌaba, aníaba anca.

⁹ Neti anca nu bittu daca gue delo iyá ca apóstol, tsa lägabi elha ralha aca apóstol de güequia bería laya ca benni ria le Tata Do Iyyabaaha.

¹⁰ Ttiaca de besiꞌibani Tata Do Iyyabaaha neti nna nuarca anca nu anca. Nu besiꞌinie neti nna läga ancana ttu nu bittu bixuu, delába unnuha nna rixuurla lo sina guee atti adí ca biꞌini bedheti ca tisa beleꞌe Jesús-na. Masquiba läga neti runia sina-na, cuinaba Tata Do Iyyabaaha resiꞌinie neti raca lanie neti raca sina-na.

¹¹ Ttiaca lägabi daa lenna si lacabi lhe si neti lhe la ca tisa-nba ben-na rixxiꞌatu, la ben-na gua bunna güia lele lhe.

Gualíba eyacani ca nu yatti-na

¹² Nianna gansi riꞌitu rixxiꞌatu rátu: “Cristuha beacabanie beríabe lheꞌe baa atta yuꞌu ca nu yatti-na”, ¿galasná nna rá ttulhele dequi bittu gualí reacani ca nu yatti-na?

¹³ Cumu gansi bittuba reacani ca nu yatti-na, bittuguaba beacani Cristu gan nía.

¹⁴ Ttirca bittuba beacani Cristu, lania nna tsa lägabi daca ca tisa requitu rixxiꞌatu-ni, bittuguabi daca nu ria lele Ben-na lhe.

¹⁵ Gansi gualí anía anca, riꞌitu nna nu güen lasi rixxiꞌa gue Tata Do Iyyabaahaba ancatu gan nía, de rixxiꞌatu rátu: “Tata Do Iyyabaaha benie beacani Cristu.” Cumu gansi bittuba gualí reacani ca benni yatti-na, lania nna bittuguaba gualí beni Tata Do Iyyabaaha beacani Cristu.

¹⁶ Cumu gansi bittuba reacani ca nu yatti-na, niguaba Cristu bittu beacanie.

¹⁷ Gansi Cristu bittuba beacanie, nu ria lele Ben-na, tsa lägabi daca-na, sna ancabale nu te tulha guele lhe.

¹⁸ Ttirca anía anca, ca benni utti ria lecabi Cristu, dia nittiba ca biꞌiniha gan nía.

¹⁹ Gansi sunruba atti seꞌeri yies lo yu-ni ixuu nu xen leri Cristu, lania nna delo iyá benni seꞌe yies lo yu-ni, riꞌiba ancari ca nu inneru benni gueni innácana: “¡Carusiꞌirucana! Cuentarba ria lecani Cristu.”

²⁰ Ttiaca gualíba beacanie Cristu beríe lheꞌe baa atta yuꞌu ca nu yatti-na. Labe anque Benni primerba beacani. Unní ruleꞌe lo gualíba eyacani ca benni chi utti güia lecabi Ben-na.

²¹ Cumu attiguaba lo niꞌa gue nu beni ttu benni, delába Adán, utaꞌa elhuttiha yies lo yu-ni, aníaguaba de nu beni ttu benni, delába Cristu, eyacani ca nu yatti-na.

²² Attiba iyábari gattiri de datíari Adán, aníaguaba iyábari atta babari len Cristu, eyaca banri attu libe.

²³ Aní aca atti eyacani ca benni: primerba Cristu beacanie, dequide liba gansi chi besía Cristu attu libe, lania liba eyacani ca benni anca guee.

²⁴ Dequide unnuha nna isía sá atti lhuxa yies lo yu Cristuha nna ulhuxe iyába ca nu lä raca uyúcane, delába ca nu rinnabia lhe ca nu ra xxeni lecani lhe ca nu ra tsitsi lecani lhe lania nna ote itúba nu rinnabie las ná Tata gueri do iyyabaaha.

²⁵ Cumu Cristu labíaba innabie axta liba dhee lo iyá ca nu bittu raca uyúcane.

²⁶ Nu bittu raca uyúne ulhuxe xubana nna ancana elhuttiha.

²⁷ Lo ca sitsi gue Tata Do Iyyabaaha rá: “Lee nna iyába bete las ná Cristu qui innabie cana.” Atti rá Ben-na iyába bocaꞌane las ná Cristuha qui innabie cana, läga sela Tata Do Iyyabaaha, cumu lee anque Benni bete iyá las ná Cristu qui innabie cana.

²⁸ Gansi chi rinnabia Cristu iyába, lania nna la laba Benni anque Xiꞌini Tata Do Iyyabaaha, eyacaguabe Benni innabia Tata Do Iyyabaaha. Anía liba nna a suntteba Tata Do Iyyabaaha Benni benie rinnabia Cristu iyába aque Benni rinnabia xeni gue delo iyáxea.

²⁹ Gansi bittuba gualí reacani ca nu yatti-na, ¿bi lunna run ca nu readi inda cuenta gue ca nu chi utti-na? Ganna bittu xa reacaquin ca unná, ¿biacala readi ca benni inda cuenta gue ca unná ganna?

³⁰ Anáguaba riꞌitu, ¿biacala qui satíaba ruxunnina guetu bixa dhacatu de requitu rixxiꞌatu gue Jesús gansi bittuba gualí eyacani ca nu chi uttina?

³¹ Ca benni ria le Jesús, neti nna ttuttu sába ruxunnina quia gattia. Nu ria-ni nna ancana nu gualí attiba gualítia redaca lasia de ancale benni gue Jesucristu Benni bananie ri.

³² Ttirca bittuba gualí reacani ca nu yatti-na, ¿bila te biría lania bitilha tisa lania ca benni lheꞌe yiesi Éfeso attiba ttu nu ritilha len nimala gue iꞌiyattoo? Gansi anía anca, riꞌi nna unbari attiba rá ttulhe benni: “¡Gobari lhe iꞌiyabari lhe cumu uxxeaba gattiri!”

³³ Bittu dhielhale ixú yiele, cumu attiba rá ca benni: “Nu riselari nu run nu lä anca tsee, runi rinitti nu tsee labiri runri.”

³⁴ Gualedoni nibisa, bitturu unle nu lä anca tsee. Qui ettúbinle nna ria: Ttulhele nna läga chi anca bienle Tata Do Iyyabaaha.

Pablo rixxiꞌabi gasná anca cuerpu deche ca benni yatti-na gansi chi beacaquinna

³⁵ Ttulhele nna gaxa gua rinnaba tisabale rále: “¿Gasná aca eyacani ca nu yatti-na? ¿Galasná anca cuerpu dechecana esíacana?”

³⁶ ¡Lebiꞌi ancale nu diti bittu rienini! Nu radale-na, läga reꞌeyu beotsi iquini gansi bittuba usuna.

³⁷ Läga beotsi reꞌeyuha nua reada benni. Nninniha liba nua rada benni, si xua xuxtila o si bixarba attu nninni lhe.

³⁸ Tata Do Iyyabaaha runie cana attiba raca lee, coa ttuttu nu rada benni runie ruleꞌecana yayalee.

³⁹ Läga iyá ca cuerpu-na ancacana ttudi. Yalee anca cuerpu rapa benni, yaguabalee anca cuerpu rapa ca nimala-na lhe yaguabalee anca cuerpu rapa ca binni-na lhe yaguabalee anca cuerpu rapa ca belha yuꞌu lheꞌe inda-na lhe.

⁴⁰ Anáguaba seꞌeguaba cuerpu anca gue iyyabaaha, seꞌeguaba cuerpu anca gue yies lo yu-ni lhe. Tseeba rilenri ancacana, ttiaca yalee anca ca nu anca gue iyyabaaha len ca nu anca gue yies lo yu-ni.

⁴¹ Yalee anca xieni gue ubisa-na, yaguabalee anca xieni gue beo-na lhe yaguaba lee anca xieni gue ca beli-na lhe. Axtaba ca beli-na cua ttuttucana sia xieni guecani.

⁴² Anáguabunna anca gansi chi beacani ca benni yatti-na. Cuerpu rigatsiha nna ancana nu usu, cuerpu eyacaniha nna ancana nu bittu usu.

⁴³ Cuerpu rigatsiha nna ancana ttu nu bitturu raca tseenri-na, nu eyacaniha nna ancana ttu nu ruꞌu xieni gueni. Cuerpu rigatsiha nna ancana nu bitturu fuerza gueni tee, nu eyacaniha nna ancana nu ra xxeni leni.

⁴⁴ Nu igatsiha nna ancana cuerpu anca gue yies lo yu-ni, nu eyacaniha nna ancana cuerpu anca gue iyyabaaha. Cumu attiba te cuerpu anca gue yies lo yu-ni, aníaguaba te cuerpu anca gue iyyabaaha.

⁴⁵ Lo ca sitsi gue Tata Do Iyyabaaha rá: “Adán uca unbiyuu udo primero. Lana nna ucana benni uyuꞌu elha nabani gueni.” Ttiaca Adán bisía xubana nna delába Cristu, lee nna anque Espíritu rute elha nabani gue ca benni.

⁴⁶ Läga lo cuerpu anca gue iyyabaaha bisía, cuerpu anca gue yies lo yu-ni liba bisía primero, lenla nna daa nu anca gue iyyabaaha.

⁴⁷ Benni udo primeroha nna ancabi gue yies lo yu-ni, len yuba ucana, Benni berupa nna delába Cristu anque gue iyyabaaha.

⁴⁸ Attiba cuerpu gue Adán ucana leni yu, aníaguaba anca ca cuerpu gue ca benni seꞌe yies lo yu-ni, attiguaba anca cuerpu gue Cristu Benni anca gue iyyabaaha, aca ca cuerpu gueri gansi chi seꞌeri iyyabaaha.

⁴⁹ Attiba nnanna ruleꞌeri attiba anca benni beni Tata Do Iyyabaaha len yuha, aníaguaba eyacari attiba anca benni anca gue iyyabaaha.

⁵⁰ Ca benni ria le Jesús, neti nna raca lasia upea le, cuerpu gueri-ni nu anca len bela lhe reni lhe läga aca etaꞌana atta rinnabia Tata Do Iyyabaaha, cuerpu nu usu-na läga aca etaꞌana atta dhona itienna ttu dia lii.

⁵¹ Nnanna nna quixxiꞌatia le gue ttu nu bittu chi yu benni. Läga iyári gattiri, ttiaca iyábari otsia Tata Do Iyyabaaha ca cuerpu gueri-na,

⁵² gansi chi bisía cuesi trompeta nu cuesi xubana, lheꞌe ttu lharu, ttu risá rutticu loriru aca nua. Cumu cuesi xa trompetaha, ca nu yatti-na nna eyacattebaquinna leni ttu cuerpu nu bitturu usu. Anáguaba riꞌi ca benni sna seꞌe banba otsiatteba Tata Do Iyyabaaha cuerpu gueri.

⁵³ Cumu raca duelha eyaca cuerpu nu rusu anca gue yies lo yu-ni nu bitturu usu, cuerpu ratti-na nna eyacana nu bitturu gatti.

⁵⁴ Gansi chi beaca cuerpu gueri nu rusuna, nu bitturu usu, cuerpu ratti-ni nna eyacana nu bitturu gatti, lania nna saxxína aca nu rá lo ca sitsi gue Tata Do Iyyabaaha atta rá: Belhuxaba Tata Do Iyyabaaha elhuttiha, udábe loni.

⁵⁵ Atturu gueni, xa elhutti, ¿gala guagaꞌalu nu ra xxeni leluha? ¿Gala guagaꞌalu nu rixuinlu qui rutelu elha disaha?

⁵⁶ Tulha runri-na ancana nu rixuuni elhutti-na qui te roꞌoni ruttinri, ca ley-na rixuuni ca tulha runri-na qui rudelha iyyacan ri.

⁵⁷ Ttiaca xquixaba Tata Do Iyyabaaha De Jesucristu Benni anque Benni bananie ri-na, lee nna raca lanie ri qui ridári lo nu lä anca tsee-na lenna elhutti-na.

⁵⁸ Larcala nna lebiꞌi ca benni ria le Jesús racatia gueni, tsitsi gualtseꞌe lo neda gue Tata Do Iyyabaaha, bittu udhanle ria lele Ben-na, satía gualudo chatti lele cuenle sina gue Benni bananie ri-na. Lebiꞌi nna chiba yule, de babale len Benni bananie ri-na, läga cuenta runle sina gue Ben-na.