1 Corintios 14 - Zapoteco de Aloápam

Pablo rixxiꞌabi adí gue ca elha tsee rute Espíritu gue Tata Do Iyyabaaha

¹ Gualun duelha acale benni raquin gue loesni, gualudháguaba lele dhíle ca elha tsee rute Espíritu gue Tata Do Iyyabaaha lhe. Ttiaca gualudháru lele dhíle elha tsee nu uni acale benni rixxiꞌa ca tisa rute Tata Do Iyyabaaha len lebiꞌi.

² Cumu nu rinne attu tisa subi, läga len benni nua rinnebi, len Tata Do Iyyabaahaba Benniha rinnebi. Larcala tsa läganu ritedeenna gue nu rábi, cumu rinnebabi ca tisa bittu yu benni rute Espírituha len labi.

³ Ttiaca benni rixxiꞌa ca tisa rute Tata Do Iyyabaaha len labi nna rixxiꞌababi ca tisaha len ca benni qui tseꞌe tsitsicabi lo neda gue Tata Do Iyyabaaha, qui ruttipabi lecabi lhe qui rutebi elha xen lasi lencabi lhe.

⁴ Benni rinne attu tisa subiha nna la laba biꞌiniha runbi ridú tsitsibi, ttiaca benni rixxiꞌa ca tisa rute Tata Do Iyyabaaha len labi nna runbi riseꞌe tsitsi ca benni ria le Jesús.

⁵ Neti nna ridá lasia innee iyále attu tisa subi, ttiaca tseerla anca quixxiꞌale ca tisa rute Tata Do Iyyabaaha len lebiꞌi, cumu benni rixxiꞌa ca tisa rute Tata Do Iyyabaaha nna xxenru anca sina runbi atti benni rinne attu tisa subi. Güen galá ttirca dequide innebi tisa subiha nna eyequibi quixxiꞌabi nu dia le nua qui useꞌe tsitsibi ca benni ria le Jesús.

⁶ Ca benni ria le Jesús, ttirca neti ita atta seꞌele-na innea attu tisa subi, lägabi ixuu nua lenle gansi bittuba quixxiꞌatia le nu beleꞌen Tata Do Iyyabaaha neti, o gan bittuba quixxiꞌatia le nu ritedaatia anca gue Ben-na lhe gan bittuba quixxiꞌatia le ca tisa bete Ben-na len neti lhe gan bittuba uleꞌetia le nu raca lee idetile lhe.

⁷ Attiba anca ca nu rixuuni benni qui rulhacana, delába nu anca pipi-na lenna nu lána arpa-na. Gansi bittuba uncana ulha tsee ca unná ¿tti modu sadú le benni bix nua rulha lencan ca unná?

⁸ Attiba lo ttu elha utilha xeni, gansi bittuba cuꞌu tsee tsiꞌi trompetaha ¿tti modu ttedaani ca benni qui eseꞌe tseecana itilhacana?

⁹ Anágua bunna anca len lebiꞌi. Gansi rinnebale attu tisa subi nu bittu yu benni, ¿tti modu sadú lecani gue bix nua rále? Cumu attisiba be-nba nua rulisale.

¹⁰ Gualí galá ixeloba ca tisa rinne benni te yies lo yu-ni, ttiaca ttuttu ca tisa-na te nu diaquinna innácana.

¹¹ Gansi neti bittuba radú lasia nu dia le ca tisa rinne benni duha nna attiba benni dittuba anca len biꞌiniha. Anáguaba biꞌiniha attiba benni dittu ancabi len neti.

¹² Denua nna lebiꞌi ca benni ridá lele dhíle elha tsee rute Espíritu gue Tata Do Iyyabaaha, gualun duelha qui dhi lenbale ca elha tsee ixuuru qui useꞌe tsitsile ca benni ria le Jesús.

¹³ Larcala nna benni rinne attu tisa subi-na innábabi len Tata Do Iyyabaaha aca guebi quixxiꞌabi bixa dia le nu rábiha.

¹⁴ Cumu gansi neti rinnea len Tata Do Iyyabaaha len attu tisa subi, espíritu quia-nba unná rinnee, ttiaca elha rien quia-ni nna läga ritedeenna gue nu ria.

¹⁵ ¿Bila unia ganna? Inneba leni Tata Do Iyyabaaha leni espíritu quia-ni gan nía, inneguaba lenie len elha rieni quia-ni lhe, ulhaguaba guee leni espíritu quia-ni lhe ulhaguaba guee leni elha rieni quia-ni lhe.

¹⁶ Cumu gansi lu rutelu xquixaru leni Tata Do Iyyabaaha len espíritu guelha, ¿tti modu ecabi benni bittu chi yu tsee gue nu runluha innábi: “Amén” gue nu rutelu xquixaruha gan läga radú lebi gue bix nua ráluha?

¹⁷ Lu nna tseeba betelu xquixaru len Tata Do Iyyabaaha, ttiaca attu nua nna tsa läga benlu dhu tsitsi nua.

¹⁸ Neti nna rutea xquixaru len Tata Do Iyyabaaha, de netiba nu rinnerua attu tisa subi atti nuxabale.

¹⁹ Ttiaca len ca benni ria le Jesús tseerla anca len neti innea gayu tisa radú le benni qui ixuuna uleꞌetia ca benni, attichula innea tsii mil tisa subi bittu ritedaani ca benni.

²⁰ Ca benni ria le Jesús, bitturu ulaba lele attiba rulaba le ca unto-na. Gualacaba attiba ttu unto bittu yu unná nu lä anca tsee, ttiaca gualulaba lele atti rulaba le benni xeni.

²¹ Lo ca sitsi atta dia ca tisa gue Tata Do Iyyabaaha rinnee re: “Neti ixuutia ca benni dittu rinne attu tisa subi qui ulisacana ca benni quia-na, ttiaca ni anía lä iyienquinna quia.”

²² Larcala nna nu rinne benni attu tisa subi nna ancana ttu senni rute Tata Do Iyyabaaha len ca benni bittu chi ria le Jesús, bittu len ca benni chi ria le Ben-na. Ttiaca rixxiꞌari ca tisa rute Tata Do Iyyabaaha nna ancana ttu senni rute len ca benni chi ria le Jesús, läga len ca benni bittu chi ria le Ben-na.

²³ Ttirca iyábale ca benni ria le Jesús innele attu tisa subi gansi chi seꞌele ttu reba, nianna gaꞌa ca benni bittu ria leni Jesús o ca benni bittu chi yu tseebi gue nu runle, ¿läba ganna acabin ca unnuha dequi iquibale raca?

²⁴ Ttiaca gansi iyábale seꞌele rixxiꞌale ca tisa rute Tata Do Iyyabaaha len lebiꞌi atti gaꞌa benni bittu ria le Jesús o gaꞌa benni bittu chi yu tsee gue nu runle, lana nna atti iyeninna iyá nu rinnele nna ¿läba ganna oquinnaba iquini ancana nu runi nu lä anca tsee, ralhabana dhína elha disa ute Tata Do Iyyabaaha lhe godúxiyyabanna gue ca tulha gueniha lhe?

²⁵ De tsanni lo nu yuꞌu gatsi lhiꞌu lheꞌe lastooni, lana nna udú xibini lo Tata Do Iyyabaaha cuequi xenna le Ben-na, atti innána: “Gualíba du Tata Do Iyyabaaha len lebiꞌi.”

Lhatsiru unle atti ritupale udú xibile lo Tata Do Iyyabaaha

²⁶ Nianna ca benni ria le Jesús, ¿bila nua unri? Gansi chi seꞌele ttu reba nna guacaba ulha ttulhele ttu salmo, attu lhele nna uleꞌenle adí benni o quixxiꞌale nu raca le Tata Do Iyyabaaha una ca benni lhe o innele attu tisa subi lhe o quixxiꞌale bixa dia le nu rá benni rinne tisa subiha lhe. Iyonni unle qui tseꞌe tsitsi iyába ca benni ria le Jesús lo neda gue Tata Do Iyyabaaha.

²⁷ Gansi innele attu tisa subi nna ttu o chupabale innele, axta bedaa tsunnale guaca innele. Coa ttuttubale innele nna labía du ttu benni ritedaani gue ca tisa subi-na lhe qui quixxiꞌabi bixa dia le nu unneleha.

²⁸ Ttiaca gan nuttuba benni ritedaani nu dia le ca tisa subi-na du len lebiꞌi nna síba gualeaca, bittu innele tisa subi aní lo ca benni seꞌe lheꞌe atta ritupale. Nu unlale nna coa ttuttubale gualnne tisa subi lhiꞌu lheꞌele len Tata Do Iyyabaaha.

²⁹ Anáguaba ca biꞌini rinne ca tisa rute Tata Do Iyyabaaha, ttu o chupabacabi innee, axta bedaa tsunnabacabi. Adícabi nna unalhicabi gansi guanca tsee nu rá ca biꞌiniha.

³⁰ Gansi Tata Do Iyyabaaha quixxiꞌanie attu biꞌini re nía nu raca lee una ca benni, benni du rinneha nna eyaca sibi qui aca innee attu biꞌiniha.

³¹ Anía nna guacaba innee iyále cua ttuttubale ca tisa rute Tata Do Iyyabaaha len lebiꞌi, qui iyábale idetile lhe cuequi tsitsiru lele lhe.

³² Ca biꞌini rixxiꞌa ca tisa rute Tata Do Iyyabaaha len lacabi-na, la labacabi rinnabiacabi elha tsee rute Espíritu gue Ben-na len lacabi.

³³ Cumu Tata Do Iyyabaaha läga anca Ben-na Dios radi lee gue nu ladihaba runna ttu bixa, ancaba Ben-na benni radi lee unri lhatsiru ttu bixa. Attiba chi labi adí ca benni ria le Jesús seꞌe lheꞌe adí ca yiesi runcabi gansi chi seꞌecabi ttu reba,

³⁴ ca nuila-na nna síba acacabi gansi chi seꞌe iyábale ttu reba, cumu lägabi gaꞌana innecabi. Nu unlacabi nna udá iquicabi attiba rá lo ca ley gue Tata Do Iyyabaaha.

³⁵ Gansi rdacacabi unacabi gue ttu bixa nna lheꞌe yoꞌo guecabiha innába tisacabi ca unbiyuu guecabiha, cumu läga anca tsee innee ttu nuila lagüi raca yotu.

³⁶ Gualorexxa lele, läga len lebiꞌi udulo ca tisa gue Tata Do Iyyabaaha, niguaba sunru lebiꞌi chi binale Ben-na lhe.

³⁷ Gansi nuxale raquinle ancale benni rinne ca tisa rute Tata Do Iyyabaaha len lebiꞌi, o si raquinle ancale benni runi nu rá Espíritu gue Tata Do Iyyabaaha, lana nna labía oquinna iquini, ca tisa runia lo sitsi-ni nna ancaque nu beni Benni bananie ri-na mandadu unri.

³⁸ Nu bittuba oquinna iquini gualí anca Ben-na tisa gue Tata Do Iyyabaaha, lee nna bittuguaba innee gualí anca nua benni guee.

³⁹ Larcala nna ca benni ria le Jesús, gualun duelha acale benni quixxiꞌa ca tisa rute Tata Do Iyyabaaha len lebiꞌi, bittuguaba usuna le inne ca benni attu tisa subi lhe.

⁴⁰ Ttiaca iyába unná lhatsiru gualun na, lixxasu gualun na.