1 Corintios 13 - Zapoteco de Aloápam

Nu raquin gue loesri anca nu xxenru

¹ Gansi neti bete Tata Do Iyyabaaha elha tsee quia innea ixe lo tisa rinne ca benni seꞌe yies lo yu-ni, ca tisa rinne ca ingeli-na lhe ttiaca bittu racatia gue ca benni, lania nna ancaba attiba ttu iyya nu cuentaba riguꞌu tsiꞌini o attiba attu iyya nu suntterba ruidu runna.

² Gansi neti bete Tata Do Iyyabaaha elha tsee quia qui quixxiꞌaya ca tisa rute len neti, ritedaatia gue iyá nu te gatsinie bittu yu benni gueni lhe anca nu te elha rieni gueni yu iyáxeaba lhe anca nu ria tsitsi leni atti innea upea ca iꞌiya-na tsiacana satsiacana attu re nna guacaba nua, ttiaca gansi bittuba racatia gue ca benni, neti nna tsa lägabi daca lania.

³ Gansi quidhia iyába nu te quia len ca benni bittu te gueni, utea cuerpu quia-ni qui itena lo gui lhe tsa lägabi ixuu nu unia gansi bittuba racatia gue ca benni.

⁴ Benni racani gue ca benni nna ancabi nu pasensi, nu du tsee leni lhe nu bittu rapa malisi lhe nu bittu runi ancana nu ra xxeni leni lhe nu bittu runi ttaba lhe.

⁵ Bittuguaba ancabi nu lä duta leni, bittuguaba do lebi suntteba nu anca guebi lhe bittuguaba riseꞌenbi cuenta lhe bittuguaba riguꞌu lebi lhe.

⁶ Bittuguaba reꞌo lebi gue ca nu runi nu lä anca tsee-na lhe gue nu anca tsee runi ca benni liba reꞌo lebi.

⁷ Benni racani gue ca benni nna ancabi benni satíaba ridí elha xen lasi gue iyába ria lebi lhe iyába xen lebi salía tseena lhe iyába rugo ruchíabi loni lhe.

⁸ Isía sá nna chuloba elha tsee ridí ca benni rixxiꞌacabi ca tisa rute Tata Do Iyyabaaha. Lhuxaguaba elha tsee ridí ca benni rinnecabi ca tisa subi lhe itúaguaba elha tsee ridí ca benni qui te elha rieni guecabi lhe ttiaca nu raquin gue loes ri-na, tsa läga lhuxana.

⁹ Cumu nu yuri nnanna nna läga ancana idaꞌa, bittuguaba rixxiꞌari idaꞌa ca tisa rute Tata Do Iyyabaaha lhe.

¹⁰ Iyába nu bittu anca idaꞌana itúa, gansi chi bisía sá esía Benni unie iyába idaꞌa.

¹¹ Atti anca unto chicaꞌa rinneba attiba rinne ttu unto, rulababa lasia attiba rulaba lee ttu unto lhe ritedaabatia attiba ritedaani ttu unto lhe. Atti liba bisía uca unbiyuu xeni nna bodhaꞌana runia atti runi ttu unto.

¹² Nnanna nna läga chi ancabia tseenri nu anca gue Tata Do Iyyabaaha, rilábinrie attiba nu rilá lo ttu iyyaguana bitturu rilá tsee loni. Ttiaca isía sá atti ilenrie aníga lori. Nnanna nna läga ritedaatia iyá, ttiaca isía sá atti unbiaga Tata Do Iyyabaaha, attiba lee anca bienie itúxeaya.

¹³ Tsunna lo nu bittu itúa len riꞌi: nu ria leri Tata Do Iyyabaaha, nu xen le rie-na lhe nu raquin gue loesri-na lhe ttiaca nu raquin gue loesri-nba anca nu xxenru gue delo iyunna ca unná.