1 Corintios 12 - Zapoteco de Aloápam

Pablo rixxiꞌabi gue ca elha tsee rute Espíritu gue Tata Do Iyyabaaha

¹ Ca benni ria le Jesús, neti raca lasia unale gue nu anca gue ca elha tsee rute Espíritu gue Tata Do Iyyabaaha len ttutturi.

² Lebiꞌi nna gua yubale, atti bittu chi ria lele Jesús, tsaba xuaba lole ridielhale denole ca xunaxi biría rá benni dequi anca diosi-na.

³ Larcala nna raca lasia unale nnanna: “Ni ttu benni chi yuꞌu Espíritu gue Tata Do Iyyabaaha lheꞌe lastooni, aca quena iqui Jesús.” Bittuguaba aca inná ni ttu benni: “Jesús anque Benni bananie neti”, gansi bittuba yuꞌu Espíritu gue Tata Do Iyyabaaha lheꞌe lastooni.

⁴ Ixe lo ca elha tsee te, ttiaca la ttuba Espíritu gue Tata Do Iyyabaaha rute ca ben-na len riꞌi.

⁵ Ixe loguaba sina gue Tata Do Iyyabaaha te unri, ttiaca la ttuba Benni bananie ri-na rixuuri lo sina guee.

⁶ Ixe loba nu runri, ttiaca la ttuba Tata Do Iyyabaaha raca lanie iyábari qui runri nua.

⁷ Len coa ttutturi runi Tata Do Iyyabaaha ruleꞌe lo elha tsee rute Espíritu guee-na, qui rixuinri Ben-na runri nu salía tseena iyábari.

⁸ Ttulhe benni nna rute Espíritu-na elha tsee guecabi qui acacabi nu rinne tisa gue nu te elha rieni gueni. Adí benni nna rute Espíritu-na elha tsee guecabi qui acacabi nu ruleꞌe gue nu ritelíquinbi gue nu anca gue Tata Do Iyyabaaha.

⁹ Adí benni nna rute Espíritu-na elha tsee guecabi qui acacabi benni ria lecabi aca nu rinnabacabi aca, adí benni nna rute Espíritu-na elha tsee guecabi qui runcabi reaca ca benni rani-na.

¹⁰ Adí benni nna rute Espíritu-na elha tsee lencabi qui runcabi milagru, adí benni nna rute Espíritu-na elha tsee lencabi qui quixxiꞌacabi nu rá Tata Do Iyyabaaha, adí benni nna rute Espíritu-na elha tsee lencabi qui ttedaaquinbi gue nu yuꞌu Espíritu gue Tata Do Iyyabaaha lheꞌe lastooni lhe gue nu yuꞌu espíritu gue nu xxegüiha lheꞌe lastooni lhe adícabi nna rute Espíritu-na elha tsee lencabi qui innecabi attu tisa subi rute Tata Do Iyyabaaha, adícabi nna rute Espíritu-na elha tsee lencabi qui quixxiꞌacabi bixa dia le ca tisa rute Tata Do Iyyabaaha rinne adí ca benni.

¹¹ Iyába unní runi ttuba Espíritu, delába Espíritu gue Tata Do Iyyabaaha. Lee rute, len ttuttu ca benni nu racanie anca tsee lencana.

Ca benni ria le Jesús, masquiba raca ixecabi, ttuba benni ancacabi len Ben-na

¹² Cuerpu gue ttu benni nna ixe loba ancana, ttiaca masquiba raca ixe ca nua, ttu cuerpuba anca iyábacana. Aníaguaba ca benni baba len Cristu, ttuba chi ancacabi len Ben-na.

¹³ Iyábari chi udiri inda qui ucari ttuba cuerpu. Anába beni Espíritu gue Tata Do Iyyabaaha lenri ca benni Israel, len ca benni bittu anca benni Israel-na lhe len ca benni ttoꞌo lo sina lhe len ca benni bittu ttoꞌo lo sina lhe. Iyábari uxíri la ttuba Espíritu gue Tata Do Iyyabaaha.

¹⁴ Cuerpu gue ttu benni nna läga tturu nua anca, ixe loba ancana.

¹⁵ Gansi niꞌaniha innána: “Cumu läga anca ná, larcala nna läga anca gue cuerpu-ni”, läga de unnuha nna bitturu anca nua gue cuerpuha.

¹⁶ Gansi naganiha innána: “Cumu läga anca neti iyya lo, larcala nna läga anca gue cuerpu-ni”, läga de unnuha nna bitturu anca nua gue cuerpuha.

¹⁷ Ttirca itúba cuerpu-na ancana iyya lo, lania nna ¿bila leni iyieninri? Ttirca itúba cuerpu-na ancana naga, lania nna ¿bila leni urenri?

¹⁸ Ttiaca Tata Do Iyyabaaha besíe cuerpu-na ttuttu ca nu reasinna atta ucaba lee.

¹⁹ Ttirca iyába ca nu anca cuerpu-na ttu loba ancacana, lania nna lägabi cuerpu te.

²⁰ Gualíba ixe nu ancana cuerpu-na raca, ttiaca ttuba cuerpu anca iyábana.

²¹ Iyya lori-na nna läga aca gána ca nári-na: “Lägabi reasatia le.” Niguaba iquiri-na bittu dica gána ca niꞌari-na: “Bittu reasatia le.”

²² Delába unnuha nna ca nu raquinri dequi bi guabi rixuu nu anca cuerpu-na la reasaruinri cana.

²³ Ca nu raquinri bittutte lidhaca-ni te nu anca cuerpu gueri-na, ancacana nu rugucu tseeruri xocani. Ca nu bittu raca leri iláni benni sia cuerpu gueri-n la nna ruyú siꞌiruri,

²⁴ laca ca nu sia cuerpu gueri ruleꞌe tseeru-na nna lägabi reasacani ca unná uyú tseeri cana. Ttiaca Tata Do Iyyabaaha anába benie cuerpu gueri-ni qui uyú tseeruri ca nu raquinri bittutte lidhaca-ni te gue cuerpu gueri.

²⁵ Unná runi seꞌe tsee len loesi iyába ca nu anca cuerpu-na qui cua ttuttu-na ichacha iqui gue loesni.

²⁶ Gansi ttu ca nu anca cuerpu gueri-na bixa rdacana, iyába ca nu sia cuerpu-na ratecana. Gansi ttu ca nu anca gue cuerpu gueri-na, ruteruri lidhaca-ni, iyába adí ca nu anca cuerpu-na seꞌe tseecana len nu ruteruri lidhaca-niha.

²⁷ Lebiꞌi ancale cuerpu gue Cristu. Coa ttuttule chi te ttu sina runle attiba ttuttu ca nu anca cuerpu gueri-na chi runcana yayabale sina.

²⁸ Len lebiꞌi ca benni ria le Jesús boseꞌe Tata Do Iyyabaaha, primertteba ca benni chi gaꞌanani Jesús iche ca tisa guee lá apóstol, berupa nna ca benni rixxiꞌa ca tisa rute Tata Do Iyyabaaha len lacabi, beyonna nna ca benni aca maestru uleꞌe ca tisa guee-na, lenla nna ca benni runi milagru, dequila nna daa ca benni reoni ca benni rani, ca benni uni yuda adí benni lhe ca benni riguꞌucana neda ca benni len nu uncana lhe ca benni rinne ixe lo tisa subi rute Tata Do Iyyabaaha lhe.

²⁹ Läga iyári ancari apóstol, bittuguaba iyári ancari benni rixxiꞌa ca tisa rute Tata Do Iyyabaaha lhe läguaba iyári ancari maestru lhe bittuguaba iyári anca benni runi milagru lhe.

³⁰ Läguaba iyári uxíri elha tsee qui eyonri ca benni rani-n lhe bittuguaba iyári rinneri attu tisa subi rute Tata Do Iyyabaaha lhe bittuguaba iyári raca gueri quixxiꞌari nu dia le ca tisa subi rute Tata Do Iyyabaaha rinne ca benni-n lhe.

³¹ Lebiꞌi nna gualuni duelha dharu lele dhíle ca elha tsee ixuuru. Nnanna nna quixxiꞌatia le gue attu nu ancana tseerla.