1 Corintios 11 - Zapoteco de Aloápam

¹ Gualun atti runia, attiba neti runia atti beni Cristu.

Pablo rixxiꞌabi gue gaxasná un iqui ca nuila-na atti ritupa ca benni rudú xibicani lo Tata Do Iyyabaaha

² Tsitsiba yopitia le lebiꞌi ca benni ria le Jesús, de satíaba rexxa lele neti, de gua rudobale tisa runle attitteba beleꞌetia leha lhe.

³ Nnanna nna raca lasia unale, Cristu anque Benni rinnabia iyába ca unbiyuu-na. Ca unbiyuu-na nna ancacana nu rinnabia gue ca nuila guecani. Tata Do Iyyabaaha nna anque Benni rinnabia gue Cristu.

⁴ Iyába unbiyuu rudhea iquini atti rixxiꞌana ca tisa bete Tata Do Iyyabaaha len lana o rinnena len Benniha lhe riguꞌuba niꞌa nua Benni anca nu rinnabia gueniha.

⁵ Gansi ttu nuila bittuba rudhea iquini gansi chi rinnena len Tata Do Iyyabaaha o rixxiꞌana tisa bete Tata Do Iyyabaaha len lana, riguꞌuba niꞌa nua nu rinnabian na, attisiba begába xiga iqui nua.

⁶ Cumu gansi bittuba rudhea iqui ttu nuila nna tsala ugá iquini gan nía. Gansi rettúbani nuilaha ichuu itsiquini o ugá xiga iquini, ixxúala lari iquini ganna.

⁷ Unbiyuu-na nna läga dica udhea iquini cumu lana ruleꞌe lona gaxasná anca Tata Do Iyyabaaha, ruleꞌe lona nu ra xxeni lee gue Ben-na lhe ttiaca nuila-na ruleꞌe lona nu ra xxeni le gue unbiyuu-na.

⁸ Cumu läga lheꞌe cuerpu gue nuila-na biría unbiyuu beni Tata Do Iyyabaaha primero, nuila-n liba biríana cuerpu gue unbiyuu-na.

⁹ Läga ben Tata Do Iyyabaaha unbiyuu-na lo niꞌa gue nuila. Nuila-n liba unná benie na lo niꞌa gue unbiyuu-na.

¹⁰ Denuala nna labíaba udhea iqui ca nuila-na lo niꞌa gue ca ingeli-na qui uleꞌe lo gua rapabacana respeto ca unbiyuu guecani.

¹¹ Ttiaca len riꞌi ca benni ria leri Jesús, unbiyuu-na nna läganu na do gansi nuttuba nuila-na do, anáguaba nuila-na, läganu na do gansi nuttuba unbiyuu-na do.

¹² Cumu attiba gualíba nuila-na biríana cuerpu gue unbiyuu-na, aníaguaba gualí nuila-nba riguꞌuna unbiyuu-na. Iyá bunni nna Tata Do Iyyabaahaba runie na.

¹³ Lebiꞌiba gualná sanga, ¿si guanca tseeba dhu ttu nuila innena len Tata Do Iyyabaaha bittu udhea iquini?

¹⁴ ¿Läba ganna la elha rien gueri-nba gua ruleꞌe binna ri guateba ruleꞌe ugüelha ca unbiyuu-na ittúnna itsiquicani?

¹⁵ ttiaca nuila-na ttu nu tsee unná anca len lacana aca ttunna itsiquicani. Lacana nna chiba anca ittúnna itsiquicani qui ixuuna udheana iquicani.

¹⁶ Gansi nuxa raca leni itsatsa niꞌani gue nu ria-ni nna neti nna upea le, riꞌitu nna anába labitu runtu, lägabi labitu untu attu nu subi, niguaba adí ca benni ria le Tata Do Iyyabaaha lhe.

Pablo rixxiꞌabi gue lhatsiru un ca benni atti rocabi rse gue Jesús

¹⁷ Leni nu upea le nnannarguaba nna bittu aca innía tseeba anca nu runle, cumu läga runle nu dica ixuu gansi chi ritupale qui cuequi xenle Tata Do Iyyabaaha, nu runleha nna runnittila nua le.

¹⁸ Nu primerba upea le nna ancana, neti nna chi bina dequi lebiꞌi nna gansi chi ritupale qui cuequi xenle Tata Do Iyyabaaha, rilhaꞌatteba lheꞌe loesle. Neti nna racatia gaxa gualíba aníaba runle.

¹⁹ Cumu labíaba ilaꞌa lheꞌe loesle, qui anáchu uleꞌe lo gaxa seꞌe nu gualíga runi nu rá Tata Do Iyyabaaha.

²⁰ Larcala nna atti ritupale qui gole rse gue Jesús, lärga gualínle rse gue Benniha nua role,

²¹ cumu atti ralha gole etta nna coa ttuttubale ridú lottebale role elha go cheele. Ttulhe benni nna ritunbacana seꞌecana, laca adíle nna axtaba ridusinle.

²² ¿Läba gan gua doba lisle atta tsuꞌule iꞌiyale lhe gole lhe? ¿Bi gue riguꞌu niꞌale ca benni ria le Tata Do Iyyabaaha, runle rettuin ca benni bittu te gueni lhe? ¿Bila upea le gue nu runle-ni? ¿Si inníba dequi tseeba anca nu runle? ¡Dica! Tsa läga innía dequi tseeba anca nu runle.

Atti uto rse Jesús lenie ca benni rudheti nu rulheꞌe laní Pascua

²³ Neti nna nu beleꞌebin Jesús neti chi beleꞌetia le: La ela atti bete Judas Jesús Benni bananie ri-na las ná ca nu uttican Benniha, lee nna bedaxxue ttaxtila,

²⁴ dequide re Tata Do Iyyabaaha xquixarue nna ulhaꞌattebe lheꞌe ttaxtilaha, nianna re: “[Gualgo lhe gualiꞌiya lhe.] Ben-ni anque cuerpu quia, benni utea gatti lo niꞌa guele. Aná unle qui exxa lele neti.”

²⁵ Aníaguaba benie, dequide chi uto rseque, bedaxxuttebe copa taꞌa vinu lheꞌeniha, nianna re: “Vinu taꞌa lheꞌe copa-ni ancana nu raxxína nu dia-ni tisa cubi rugüe Tata Do Iyyabaaha len ca benni. Len reni quia ocaꞌan tsitsia tisa-na. Aní unle, atti iꞌiyale unní nna exxa lele neti.”

²⁶ Larcala nna atti gole ttaxtila-ni lhe iꞌiyale vinu-ni lhe lebiꞌi nna rixxiꞌale gue utti Jesús lo niꞌa gueri. Anába unle axta liba esíe.

²⁷ Larcala nna nuxaba benni bittu rutena lidhaca rse gue Jesús atti rona ttaxtila-na lhe riꞌana vinu-na lhe lana nna racana nu che tulha gue nu runna de riguꞌu niꞌani cuerpu gue Jesús, reni belali Benniha lhe.

²⁸ Denua nna atti deobali gole ttaxtila-na lhe iꞌiyale vinu-na lhe coa ttuttule itsatsa niꞌale gue nu runle.

²⁹ Cumu benni nu ladiatteba rona ttaxtilaha lhe riꞌana vinuha lhe bittu rugüena lidhaca cuerpu gue Jesús, unnuha nna de rona lhe riꞌana lhe rseha anía, rílaba gueni dhína elha disa ute Tata Do Iyyabaaha.

³⁰ Lo niꞌa gue unná nna rani ixele, chi ancale siꞌi lhe ixeguale chi utti lhe.

³¹ Ttiaca gansi itsatsa niꞌa tseeri gue nu anca gueri, lania nna lägabi te bixa lo niꞌa gue utee Ben-na elha disa gueri.

³² Atti rute elha disa gueri nna runie nua qui iyieninri udori tisa. Anía nna bittu udelha iyye ri lenri ca nu bittu ria le Jesús seꞌe yies lo yu-ni.

³³ Larcala nna lebiꞌi ca benni ria le Jesús attiba neti, gansi chi ritupale qui gole rse gue Jesús, gualcueda loesle.

³⁴ Gansi chiba rituni nuxale nna tsala gualgottela lheꞌe lisle qui bittu utee Tata Do Iyyabaaha elha disa guele lo niꞌa gue nu runle atti ritupale go rsele. Gue adí bixarua te innía nna guannebari gueonna gansi chi bisíaya atta seꞌele-na.