1 Corintios 10 - Zapoteco de Aloápam

Pablo rixxiꞌabi gue nu ben ca benni Israel qui bittu unri aná

¹ Ca benni ria le Jesús, neti nna bittu raca lasia ixulhinle gue nu guate ca benniola gueriha. Iyábacabi beꞌocabi neda denalhacabi bea udá xequicabiha, iyáguabacabi betecabi lheꞌe Indattoo Xinaaha lhe.

² Lacabi nna ucacabi benni udi inda de beꞌocabi neda lheꞌe xula gue beaha lhe de utecabi lheꞌe indattooha lhe. Anía liba nna ucacabi benni baba len Moisés.

³ Anáguaba, iyáguabacabi utocabi la ttuba elha go udhelha Tata Do Iyyabaaha,

⁴ la ttuguaba inda udhelha Ben-na uꞌuyacabi lhe. Cumu uꞌuyacabi inda biría lheꞌe iyyattoo udhelha Tata Do Iyyabaaha dedaa deyuꞌu neda len lacabiha. Cristuhaba Benniha anque iyyattooha.

⁵ Ttiaca guate salhe ca biꞌiniha bencabi nu bittu reꞌo le Tata Do Iyyabaaha. Denua nna nuarca níaba utticabi lo yu bisiha.

⁶ Iyába unní uca qui acana ttu nu ugüiari. Aníachu nna bittu dha leri unri nu lä anca tsee attiba ca biꞌiniha udá lecabi uncabi nu lä anca tsee.

⁷ Larcala nna bittu udú xibile lo ca nu bittu gualí anca diosi-na, bittu unle atti ben ttulhe ca biꞌiniha. Attiba rá lo ca sitsi gue Tata Do Iyyabaaha: “Ca benni nna bebíattebacana utocana lhe uꞌuyacana lhe atti udulíttebacana uyuꞌucana güitta güexisi.”

⁸ Bittuguaba tsequi manniri unri atti ben ttulhe ca biꞌiniha. De unnuha nna lheꞌe ttu sába utti tsunna erúa milcabi (23.000).

⁹ Bittuguaba utseꞌenri Benni bananie ri-na atti beni ttulhe ca biꞌiniha. Lo niꞌa gue unnuha nna utticabi de utisi belha cabi.

¹⁰ Bittuguaba inne güeri gue Tata Do Iyyabaaha atti unne güee ttulhe ca biꞌiniha. Lo niꞌa gue unnuha nna belhuxa ingeli udhelha Tata Do Iyyabaaha cabi.

¹¹ Iyába unná guate ca biꞌiniha qui acana nu ugüiari. Ucana lo sitsi, qui riꞌi ca benni seꞌe ca sá lhuxa-ni bittu unri atti ben ca biꞌiniha.

¹² Larcala, benni rudhaca leni chi du tsitsina lo neda gue Tata Do Iyyabaaha, udona cuidadu qui bittu ixú yiena unna nu bittu anca tsee.

¹³ Lebiꞌi nna lägabi chi guatele ttu nu bittu chi guate adí benni. Tata Do Iyyabaaha anque Benni dica uxxen lerie. Lee nna läga ugüelhe satele ttu nu bittu dhale uchíale loni. Delába unnuha nna gansi chi bisía satele ttu bixa nna cuinaba lee aca lanie le uchíale qui anáchu dhale lo nua.

¹⁴ Larcala nna ca benni ria le Jesús racatia gueni, gualiriesi lheꞌe nu anca gue ca nu bittu gualí anca diosi-na, bittu udú xibile lo ca unná.

¹⁵ Rinnea rulisa le cumu ancale benni radú leni. Gualitsatsa niꞌale gue nu ria le-ni gansi guancana nu gualí.

¹⁶ Atti rori rse gue Benni bananie ri-na, riꞌi nna ruteri xquixaru len Tata Do Iyyabaaha gue vinu riꞌariha, lania nna riselari reni gue Jesús. Atti rori ttaxtila benni rilhaꞌari-na, riꞌi nna riselari cuerpu gue Ben-na.

¹⁷ Masquiba raca ixeri, iyábari rori la ttuba ttaxtila. Denuala nna ttu benniba anca iyábari.

¹⁸ Gualugüiarga gue nu run ca benni Israel-na. Atti rocana bela gue ca nimala rutticana qui rutecana úna lo becoa gue Tata Do Iyyabaaha, Tata Do Iyyabaaha Benni ridí baneda úna rite lo becoaha nua riselacana.

¹⁹ Leni nu ria-ni nna läga diatia ria le dequi te lidhaca ca nu bittu gualí anca diosi-na, niguaba lä diatia ria le dequi bela ribía lo becoa gue ca unná ancana nu gualí te lidhaca-ni.

²⁰ Nu ria-ni nna ancana: gansi chi rutti ca benni bittu anca biani Tata Do Iyyabaaha ttu nimala qui utecana úna lo becoa gue ca diosi guecani, len ca be xxegüiba rutecana nua, läga len Tata Do Iyyabaaha rutecana nua. Neti nna bittu raca lasia iselale ca be xxegüi-na de gole nu rutecana len ca unná.

²¹ Bittu aca iꞌiyale vinu atti role rse gue Benni bananie ri-na, nianna lenla nna edeꞌeyaguabale nu anca gue ca be xxegüi-na. Bittu dica ebíale roꞌo mexa du atta sia ca benni rocana rse gue Benni bananie ri-na, nianna lenla nna edebíale roꞌo mexa atta sia ca nu rocana rse gue ca be xxegüi-na.

²² ¿Si rdacari unri aná qui utseꞌenri Tata Do Iyyabaaha aca? ¿Si adírla tsitsi ra leri atti Ben-na aca?

Iyába nu unle gualun na qui cuequi xen benni Tata Do Iyyabaaha

²³ Lebiꞌi nna rinnele rále: “Iyába guacaba unia.” Ttiaca neti ria: Läga iyonna ancana nu dica ixuu. Gualíba, guacaba un benni iyába, ttiaca läga iyá unná runna tseꞌe tsitsiri lo neda gue Tata Do Iyyabaaha.

²⁴ Ni ttule bittu unle suntteba nu unna salía tseenle, sinuqui unguale qui salía tseena adí benni.

²⁵ Gualgoba iyába bela ritoꞌo lheꞌe atta raca iꞌiya-na, bittu innába tisale gue ga daa belaha qui bittu unna ulaba lele gue nua.

²⁶ Cumu, gue Tata Do Iyyabaahaba itúba yies lo yu-ni leni iyába nu seꞌe loni.

²⁷ Gansi gaxi ttu benni bittu ria leni ca tisa gue Jesús lheꞌe lisni qui gole etta lenna lebiꞌi nna racaba lele tsiale, gualgoba iyába nu usiana lole. Bittu innába tisale ga daa nu goleha, qui bittu ulaba lele gue nua.

²⁸ Ttiaca gansi quixxiꞌen nuxa benni le: “Belaha nna ancana gue nimala betticana betecana úna lo becoa gue ca diosi guecani”, lebiꞌi nna bittu gole nua lo niꞌa gue nu utixxiꞌenna leha, qui bittu udú chupana le nua.

²⁹ Rinnea gue nu ulaba le benni utixxiꞌenna leha, bittu rinnea gue nu ulaba lele. Cumu, ¿biaca ettesuna attu benni subi unia nu raca lasia de rulaba leni bittu anca tsee nu runia?

³⁰ Gansi neti guaruteba xquixaru leni Tata Do Iyyabaaha gue nu roa nna ¿biacala itúa balaꞌana quia de roa nu betea xquixaru leni Tata Do Iyyabaaha gueni?

³¹ Larcala atti role ttu bixa lhe atti iꞌiyale ttu bixa lhe atti runle ttu bixaba lhe gualun qui cuequi xen benni Tata Do Iyyabaaha.

³² Bittu unle ichecu ni ttu benni, ni ca benni Israel-na lhe ni ca benni bittu anca benni Israel-na lhe niguaba ca benni ria le Jesús lhe.

³³ Anáguaba neti, leni iyába nu runia, runia duelha reꞌo le iyába benni, läga reguila unia suna nu salía tseebana neti, runba nu salía tseena adí benni qui anáchu odilá Tata Do Iyyabaaha cana.