1 Corintios 1 - Zapoteco de Aloápam

¹ Neti Pablo, Tata Do Iyyabaaha bedaa lee bodúe neti aca apóstol gue Jesús Benni anque Cristu. Neti lenia Sóstenes biꞌini ria le Jesús attiba riꞌi,

² ridhelhatu sitsi-ni guele lebiꞌi ca benni ria le Tata Do Iyyabaaha seꞌe lheꞌe yiesi Corinto. Lebiꞌi chi ancale benni seꞌe riesi anca gue Tata Do Iyyabaaha de chi babale len Jesús Benni anque Cristu. Biaxile acale benni seꞌe riesi anca gue Tata Do Iyyabaaha lenle iyába ca benni seꞌe biꞌacanaba ria le Jesucristu Benni bananie ri. Ben-na anque Benni bananie cabi, anáguaba riꞌi lhe.

³ Cuina Tata gueri do iyyabaaha lenie Jesucristu Benni bananie ri aca lenque le, unque tseꞌele xen su lee lhe.

Pablo rutebi xquixaru len Tata Do Iyyabaaha

⁴ Satíaba rutea xquixaru len Tata Do Iyyabaaha gue lebiꞌi, de redá lee raca lanie le de chi babale len Jesús Benni anque Cristu.

⁵ Cumu de babale len Ben-na nuarca bete Tata Do Iyyabaaha iyáloba elha tsee te guee len lebiꞌi, qui anáchu teru elha rieni guele lhe resela runle rinnele lhe.

⁶ Unní ruleꞌe lo, ca tisa utixxiꞌentu le gue Cristuha nna anque nu gualí.

⁷ Aná nna lärgabi reasinle attu elha tsee rute Tata Do Iyyabaaha laca seꞌele ribedale isía sá esía Jesucristu Benni bananie ri.

⁸ Laguabe useꞌe tsitsie le axta atti isía sá lhuxa, qui bittubi te bixa lo niꞌa gue itisale atti isía sá esía Jesucristu Benni bananie ri.

⁹ Tata Do Iyyabaaha anque benni runi nu chi re. Lee uxie le qui tseꞌele len xiꞌinie Jesucristu Benni bananie ri.

Ca benni ria le Jesús seꞌe lheꞌe yiesi Corinto bilhaꞌa lheꞌe loescabi

¹⁰ Ca benni ria le Jesús, rinnaba lole gualun chi lo niꞌa gue Jesucristu Benni bananie ri, ttuba gualeseꞌe, bittu ilaꞌa lheꞌe loesle. Lhatsiru gualtseꞌe. Ttuba gualulaba lele lhe ttuba anca nu aquinle lhe.

¹¹ Rpea le aná, lebiꞌi ca benni ria le Jesús, cumu chi utixxiꞌani ca benni seꞌe lisi Cloé-na neti, lebiꞌi nna seꞌe tilhaba len loesle,

¹² delába ttulhele nna rále: “Neti anca benni baba len Pablo”, attu lhele nna rále: “Neti anca benni baba len Apolo”, attu lhele nna rále: “Neti anca benni baba len Cefas”, attu lhele nna rále: “Neti anca benni baba len Cristu.”

¹³ ¿Biaca rále aná? ¿Si laꞌa lheꞌe loesi Cristuha? ¿Si neti Pablo utáya lo ya crusi qui uxa gue nu lä anca tsee benle? ¿Si neti Pablo betti láya atti udile inda, aca?

¹⁴ Xquixaru Tata Do Iyyabaaha lärga nuruha nuxale begadi neti inda, sunruba Crispo lenna Gayo-na begadia inda.

¹⁵ Aná nna bittubi tenle innále dequi neti Pablo betti láya atti udile inda.

¹⁶ Begadiguaba inda ca benni seꞌe lisi Estéfanas. Dequide ca biꞌin-na nna bitturu rexxa lasia gansi begadirua nuxaruha inda.

¹⁷ Cumu läga udhelha Cristu neti ugadia benni inda. Udhelhaba Benniha neti quixxiꞌaya ca tisa guee-na. Neti nna läga rixxiꞌaye leni tisa elha loesi tisa rinne ca nu te elha rieni guequinna qui bittu itúa lidhaca elhutti uxí Cristu lo ya crusiha.

Cristu ruleꞌe loe elha rieni gue Tata Do Iyyabaaha

¹⁸ Ca tisa rixxiꞌa gue nu guate Cristu atti uttie lo ya crusiha ancaque attiba tisa nu bittu elha rieni gueni tee len ca benni dia nitti. Ttiaca len riꞌi ca benni lhá bittu tsia nitti, ca tisa-na ancaque nu ra xxeni lee gue Tata Do Iyyabaaha.

¹⁹ Lo ca sitsi atta dia ca tisa gue Tata Do Iyyabaaha re: Unia initti elha rieni gue ca nu ra tee elha rieni guequinna, cuꞌu niꞌaya nu yu ca nu rá dequi ancacana nu yu lhe.

²⁰ Nianna ¿nala ca nu rá dequi teru elha rieni guecaniha ganna? ¿Nala nu rá dequi yuxxatta gue nu dia lo ca sitsi-na lhe? ¿Nala nu rinnexxatta gue nu yuna gue nu anca gue yies lo yu-niha lhe? Tata Do Iyyabaaha benie aca elha rieni gue ca nu seꞌe yies lo yu-ni, attiba elha rieni gue nu bittu xieni gueni tee.

²¹ Cumu Tata Do Iyyabaaha anque nu yu gue nu runie, bocaꞌane bittu eyonbia ca nu seꞌe yies lo yu-ni Ben-na leni elha rieni anca gue yies lo yu-ni. Nu ben lee nna guadiba lee odile ca benni tsia lecanie len ca tisa rixxiꞌatu, masquiba rá ca benni dequi anca ca tisa-na nu anca gue ca nu lä caa xieni gueni.

²² Ca tisa-na ancaque gue nu lä caa xieni gueni len ca benni Israel-na, cumu ribedacana iláquinna milagru xxeni, anáguaba len ca benni ca nu rinne tisa griego lhe cumu reguilacana iyienquinna ca tisa elha gue nu tee elha rieni gueni.

²³ Ttiaca riꞌitu nna rixxiꞌabatu gue Cristu benni utá lo ya crusiha. Unná runi rido dini ca nu Israel-na. Ca nu bittu anca benni Israel-na nna rácana dequi nu rixxiꞌatu ancana gue nu lä caa xieni gueni.

²⁴ Ttiaca ca benni chi uxi Tata Do Iyyabaaha acacana benni guee, si ancacana benni Israel o si benni rinne tisa griego lhe Cristuha anque Benni ruleꞌe loe elha ra xxeni le gue Tata Do Iyyabaaha, elha rieni gue Benniha lhe.

²⁵ Cumu nu beni Tata Do Iyyabaaha ruleꞌe ancana gue nu lä caa elha rieni gueni, ttiaca unnala ancana gue nu teru elha rieni gueni attichula nu anca gue ca nu rá dequi te elha rieni gueni seꞌe yies lo yu-ni. Anáguaba nu ruleꞌe len ca benni dequi Tata Do Iyyabaaha bittu anque Benni ra tsitsi lee, unnala ancana nu ra tsitsiru leni atti nu ra tsitsi le delo iyáxea ca benni.

²⁶ Ca benni ria le Jesús, gualorexxa lele, atti uxi Tata Do Iyyabaaha le acale benni guee, ttu chuparba le ancale ca nu rá ca benni seꞌe yies lo yu-ni gua tee elha rieni gueni, ttu chuparguabale ancale benni ra xxeni leni lhe nu datía benni rapa adí benni respeto lhe.

²⁷ Ttiaca Tata Do Iyyabaaha becuee ca benni rá ca benni seꞌe yies lo yu-ni ancacana nu bittu tee elha rieni gueni qui unie ettuin ca nu rá ancacana nu texxatta elha rieni gueni, becuee ca benni rá ca benni bittu ancacana nu ra tsitsi leni qui unie ettuin ca nu ra tsitsi leni lhe.

²⁸ Tata Do Iyyabaaha becuee ca benni bittu rixuu, ca nu riguꞌu niꞌa ca benni seꞌe yies lo yu-ni, delába ca benni bittu daca, qui cue nu ra xxeni le gue ca nu rá ancacana benni ra xxeni leni.

²⁹ Aná nna nuttu nu benni tee unna ttaba lo Tata Do Iyyabaaha.

³⁰ Tata Do Iyyabaaha benie ancale benni baba len Jesús Benni anque Cristu. Benguabe qui bete Benniha elha rieni guee lenri lhe benguabe beni Benniha qui acari benni tsee loe lhe acari benni seꞌe riesi anca guee lhe benguabe aca Benniha benni odile ri lhe.

³¹ Análiba nna saxxína nu rá lo ca sitsi gue Tata Do Iyyabaaha atta rá: “Nu raca leni cue xenna unna cue xeni Benni bananie ri-na gue nu ben Ben-na.”