Yuda 1 - Lagano da Isambi

¹ Niye Yuda mtumwa wa Yesu Kristo, senhambo, senhambo ndugu wa Yakobo, nowandikila mweye mokemigwa, wene unogelo wa Mulungu Tata, wemilizwe na Yesu Kristo.

² Bazi, tindiwalo na nogelo dibwagale kumwenu!

Walaguzi wa utungulu vondawagale ubananzi

³ Mweye wanogelwa, nigangaliza nghani kuwandikilani magweka ga nghombolwa yetu tweye chose; nidohelezwa mmoyo kuwandikila na kumswagizani, mgombele nhamanilo ija, iwenghigwe wangʼalile mwanza umwe.

⁴ Kilumbo wakuko wanhu, wengila muna didale kwa kwinyegeleza, wombeza Mulungu kwa kudihindula bazi jake, giladi wakole unyolodo, wambela Heyo Mwene kutawala yaiyeka hamonga na Mndewa wetu Yesu Kristo, komu nhaguso yawo yandikigwa mwaka.

⁵ Viyemela mweye wenyego mgatanga gano gose, bali nolonda kuwakumbusa, kamba Bwana kawakombola wanhu wake muisi ya Misri, ilawabaho kawangamiza waja walemile kumtogola.

⁶ Kabili malaika walekile kuteganya ukulu wawo, wochola chaka, walekile hanhu hawalagizwe, Mulungu kawadaza mdiziza na minyololo haidenhekaga, waibete ija siku nghulu wataguswe.

⁷ Geseni Sodomu na Gomora na viwambo vikalile mmwambwegambwega, wakala wonogelwa na uchapalisi, wahindula uchozi wa nzila ziyagwe za lukuli: watoza kamba waja malaika, avo lihilo jawo diwapatile, kuko kusakala na moto hauzimikaga, uwo utango wa kutuzuma.

⁸ Na waja wezile kuwakongaga vivija, walingana kamba wanhu wolota, wobananga nghuli zawo, wolema kutawaligwa, waligaga wakulu.

⁹ Komu Malaika Mkulu Mikaeli, viyambamilila Mwenembago na kwiuzagiza kamba yalihi yausole mtufi wa Mose, halondile kumnanga hebu kumliga, komu kalonga, Magana nayakukomhokele.

¹⁰ Bali wanhu wano waligaga magweka hawagamanyile, na gaja gawamanyile kilukuli, kamba mingʼonyo ilibule nzewele, ago gonda gawabanange.

¹¹ Wojona waja, kwa mzoko waigoga nzila ya Kaini, na kudidimila muna ditozo da Bileamu kwa kilumbo cha mhiya, wangamila muna uhonzolomo wa Kora.

¹² Awo wagalamka kamba mabaka, wahengila haja hamwigolelaga chakuja cha unogelo, baho wajaga chaka wabule kinyala. Kabili wagalamka kamba mabingu galibule mvula, gasolagwa na beho. Wagamba kamba mibiki ilibule mijani, hailelaga mujo miyanza yose mibili, ingʼoka ihimbuka imizizi, inyala.

¹³ Wagalamka kamba mawimbi makali ga mbahali, galavaga kinyala chawo kamba hovu, kabili kamba nhondo zipotelaga chaka, zikilwa fungu jawo dijo ziza kulu da idigunge.

¹⁴ Magweka gawo kagasimulila Henoki, munhu wa saba kulawa Adamu, yomana kulonga, Lola Mndewa kokwiza na malaika zake mizo kwa mizo, giladi yawataguse na kuwalihiza wose walemile kumdumba Mulungu,

¹⁵ kwa kilumbo cha sanghana zawo zose za ubananzi, ziwasanghane kwa kumzela Mulungu, hamonga na ulonzi wawo mgaga wose, uwatozile vuwamwehule Mulungu.

¹⁶ Awo watwanganikaga na kwihilwa na gaja gawapatile, gabanile na uchozi wa dongho zawo, na milomo ilongaga ulonzi mkulu wa chodo, kuno wolola vihanga vya wanhu giladi wagolelwe.

¹⁷ Komu mweye wanogelwa, zigelegezeni mbuli zilongigwe vino sambi na watumigwa wa Mndewa wetu Yesu Kristo!

¹⁸ Vuwawalongele mwemwe, Mazuwa ga ikimambukizo wolawilila waponela, wondawagendelele kuzikola dongho zawo wenyecho, waleke kumdumba Mulungu.

¹⁹ Na hewo wawo wogala kwihasanya kumwenu, iwo wanhu wa imbago ino, wabule Loho Yangʼalile.

²⁰ Bali mweye wanogelwa, izengeni wenyego muna inhamanilo yenu ingʼalile nghani, na kumtambikila Mulungu kwa mhiko za Loho Yangʼalile!

²¹ Iteganyeni wenyecho, mkale na kumnogela Mulungu muna dinogelo jake, kuno mdibeta bazi da Mndewa wetu Yesu Kristo, mvikile upile wa idigunge!

²² Wayagwe wali na kinghwaso kamba muhawasagula, woneleni bazi;

²³ muwahonye, kuno muwasamha kulawa mmoto; komu wayagwe woneleni bazi kwa kidumbo kuno mwihilwe na nguwo zigeligwe ubweto wa lukuli!

²⁴ Heyo yadahile kuwemiliza mweye sukumwikwale, na kuwemiza hali iyenzi hakihanga chake, mulibule mabaka, wene kudengha nghani, Heyo yagambile Mulungu yaiyeka, Muhonya wetu kwa kumgala Yesu Kristo Mndewa wetu – Iyenzi, ukulu, mhiko na ugalu wose izo izake kulawa milongo yose, na vino sambi, kuvikila digunge kwa idigunge. Amina.