Yohana 8 - Lagano da Isambi

Yesu kamuhonya mpinga yatinghanizwe muugoni

¹ Imala baho Yesu kachola kavika kudigongo ja Mizeituni.

² Vuuchele imitondo, kengila kabili mdihekalu, na wanhu wose wamgendela; kakala hasi yowalanguliza.

³ Aho Wana Nzuma na Mafariseo wamgalila mtwanzi yatinghanizwe muugoni, wamwika hagatigati womulongela,

⁴ “Mkulufunzi, mtwanzi yuno katinghanizwa muugoni.

⁵ Avo Mose mwinzuma kalangukiza kuwatowa na mabwe kamba wano. Agweye kotangaze?”

⁶ Ago wakala wogalonga kwa kumgeza, giladi wagoge kilumbo cha kumdununza. Komu Yesu kenamila, yomana kwandika na kidole chake mmisenga.

⁷ Na hewo vuwagendelele kumdununza, kenula ditwi kawalongela, “Mmwenu ayo yali bule tozo, na yasonge kumwasila dibwe!”

⁸ Kenamila lwekabili kandika na kidole chake mmisenga.

⁹ Na hewo vuwahulike, munda na kitupe wagagesa, walawa yumweyumwe wasonga wavyele kuvikila wa ikimambukizo; kasigala Yesu yaiyeka na yuja mtwanzi bahaja.

¹⁰ Yesu viyenule meso gake, hamonile munhu, komu yuja mtwanzi, kamulongela, “Agweye mtwanzi, wakwahi waja wakudununze; haduhu mwene kukutagusa?”

¹¹ Kamwidika, “Haduhu. Bwana!” Yesu kamulongela, “Hata niye sikutagusa. Genda na zako, bali sikuubwelele kutoza!”

Yesu yuyo Mlangaza wa imbago

¹² Baho Yesu kawalongela kabili, “Niye nene mulangaza wa ulumwengu. Yongholeleza, honda yachole mdiziza ngʼo, komu kokuwa na mulangaza wa upile.”

¹³ Mafariseo wamulongela, “Gweye kokisindila mwenyecho; usindi wako si wa ihoko.”

¹⁴ Yesu kawedika yolonga, “Vilema nihesindila mwenyecho, usindi wangu uwo wa ihoko, kwa kilamso nikutanga kundawile na kunigenda amweye hamnhangile kundawile, wala kunichola hamnhanga.

¹⁵ Mweye motagusa kwa kuwinza viloto vya mulukuli, niye simtagusa munhu.

¹⁶ Hata nihatagusa, utagusi wangu uwo ihoko, kilumbo niye sili yeka, bali niye na Yuja Yangalile.

¹⁷ Muna Inzuma yenu yandikigwa, Usindi wa wanhu wabili uwo wa ihoko.

¹⁸ Niye nene nikisindila mwenyecho, na heyo Tata Yangalile konisindila.”

¹⁹ Wamulongela, “Kakwahi Tata wako?” Yesu kawedika, “Mweye hamnhangile, wala Tata wangu hamumtanga; kamba mnhangile niye, muhamtangile Tata wangu.”

²⁰ Higo kagalonga viyakalile yolanguliza mdihekalu, hana digati da kwikila mhiya. Wala haduhu yamgogile, kilumbo kidami chake kikala hakinavika tanhu.

Usindi wa ihoko wa kumtanga Yesu zizo sanghano

²¹ Viyagwe kawalongela, “Niye nochola, na mweye monzahila; mweye mofa mmatozo genu, na kunichola niye, mweye hamdaha kwiza.”

²² Baho walonga, “Che, kokikoma mwenyecho? habali kolonga, kunichola niye, mweye hamdaha kwiza?”

²³ Kawalongela, “Mweye mwa hasi, niye na uchana. Mweye mulawa muisi ino, bali niye silawile muisi ino.

²⁴ Kileka hivo nimulongelani, mofa mmatozo genu. Kilumbo kamba hamtogole, niye iyo nene, avo mofa mmatozo genu.”

²⁵ Wamulongela, “Uli nani na gweye?” Yesu kawalongela, “Vilema dilonga, dijo dinimulongelani.

²⁶ Ninago bwando ga kulonga na kutagusa; bali Heyo Yangalile iyo wa ihoko, na niye gamhulike kumwake, gago nilonga mulumwengu.”

²⁷ Komu hewo hawamtangile kamba kowatambulila Tata.

²⁸ Baho Yesu kawalongela, “Vonda mmwinule Mwanage Munhu mbiki, movimanya kamba niye iyo nene, wala sitenda mbuli nili yeka, komu vija Tata viyanangukize, vivo vinilonga.

²⁹ Heyo Yangalile kahamonga na niye, handekile nili yeka, kwa mzoko nosanghana sikuzose gaja gamnogele.”

³⁰ Yesu viyakalile yolonga higo, bwando wamtogola.

Ihoko ya Yesu yonda itukombole

³¹ Na heyo kawalongela waja Wayuda wamtogole, “Muhakala muna imbuli yangu, mogalamka wanahina wangu wa ihoko.

³² Kabili moitanga ya ihoko, na hiyo ihoko iyo yonda imkomboleni.”

³³ Wamwidika, “Tweye twa lukolo lwa Abrahamu, wala hatunakala utumwa kwa munhu yoyose, na gweye kolongaze, mokomboligwa?”

³⁴ Yesu kawalongela, “Togola togola nomulongelani, Munhu yoyose yotenda zambi, yuyo mtumwa wa zambi.

³⁵ Viema mtumwa hakala sikuzose mngʼanda, bali Mwana kokala sikuzose.

³⁶ Avo Mwana yahamkombolani, mogalamka wagolo kwelikweli.

Umulelo wa Mwenembago uwo womwihila Yesu

³⁷ Nivimanya kamba mwa ulelwa wa Abrahamu; komu molonda kunghoma, kilumbo cha malonga gangu gamduhu mgati mmwenu.

³⁸ Niye nolonga ganiwene kwa Tata; amweye mtenda gamuhulike kwa tata wenu!

³⁹ Wedika wamulongela, “Tata wetu iyo Abrahamu!” Yesu kawalongela, “Kamba muli wanage Abrahamu, muhatendile ziyatendile Abrahamu.

⁴⁰ Komu mweye mozahila kunghoma niye, kilumbo nimlongelani da ihoko dija dinihulike kulawa kwa Mulungu; Abrahamu hatendile hivo.

⁴¹ Mweye mzitenda kazi za tata wenu.” Baho wamulongele, “Tweye hatuleligwe kwa ugoni, tweye tunayo tata imonga, viema iyo Mulungu.”

⁴² Yesu kawalongela, “Kamba Mulungu maza yagalamke tata wenu, muhanogele na niye, kwa mzoko ndawa kwa Mulungu nabaha; avo sizile kwa giladi jangu, komu Yuyo Yanhumile.

⁴³ Vilihi mweye hamgamanya higo gonilonga? Kileka avo mweye hamdaha kuutegeleza uno ulonzi wangu!

⁴⁴ Mweye mwa wanage Mwenembago tata wenu, na sulukilo za tata wenu zizo zimulonda kuzitenda. Heyo kakala mkoma wanhu kulawa ichanduso, wala hemile muihoko, kilumbo mgati mmwake mduhu ihoko. Hoyolonga uvwizi, kalongaga igake mwenyecho, kilumbo heyo mtungulu, kabili iyo tata wa utungulu.

⁴⁵ Na niye, kwa mzoko nolonga ya ihoko, hamnhogola.

Yesu kabule matozo; kohuma kifo, kamona Abrahamu

⁴⁶ Yalihi mmwanza wenu yodaha kusindila kamba niye nina matozo? Na niye nihalonga ya ihoko, mbona mweye hamnhogola?

⁴⁷ Ayo yali wa Mulungu kozihulika mbuli za Mulungu, komu mweye hamuhulika, kilumbo mweye si wa Mulungu.

⁴⁸ Wayuda wamwidika wolonga, “Che, hatulonga goya kamba gweye kwa Msamaria, kabili kuna luwege?”

⁴⁹ Yesu kalonga, “Niye nabule luwege, bali nomtuniza Tata wangu, na mweye mombeza niye.

⁵⁰ Niye sizahila nhogolwa yangu aka; kabaho mwene kuizahila na kutagusa kitala.

⁵¹ Ihoko ihoko nomulongelani, Munhu yahaugoga ulonzi wangu, honda yadanganike digunge na digunge.”

⁵² Wayuda wamulongela, “Avino tuhuguza, kumbe kuna luwege. Abrahamu kafa, Watulandagu wafa, na gweye kolonga, Munhu yahaugoga ulonzi wangu, honda yalanze kifo, kokala digunge kwa digunge!

⁵³ Gweye kwa mkulu kubanza tata wetu Abrahamu, na Watulandagu wafa. Kokiitenda uwe yalihi?”

⁵⁴ Yesu kedika, “Nihaitogola mwenyecho, nhogolwa yangu si kinhu; bali kabaho Tata wangu yoningha iyenzi, viyemela mweye momulonga yuyo Mulungu wenu.

⁵⁵ Amweye hamumtangile. Bali niye nimtanga; nihalonga kamba simtangile, nogalamka mvwizi kamba mwemwe. Komu nimtanga na Longa jake nidigoga.

⁵⁶ Abrahamu tata wenu kadenghelela vija vonda yayone isiku yangu; na heyo kayona, kaimozamoza.”

⁵⁷ Wayuda wamulongela, “Gweye hunavika miyaka milongo mitano, na gweye kumona Abrahamu?”

⁵⁸ Yesu kawalongela, “lhoko nomulongelani, Abrahamu yali haduhu, kipigiti kija niye nili baho.”

⁵⁹ Basi wadondola mabwe, giladi wamwasile, bali Yesu kayangayuka, kalawa mdihekalu.