Yohana 7 - Lagano da Isambi

Ndugu za Yesu wamswagiza bali wamuleka

¹ Imala baho Yesu kakala yozunguluka Galilea, halondile kuchola Uyuda kwa vija Wayuda vuwakalile wozahila kumkoma.

² Na sikunghulu ya Wayuda ikemagwe ya Visakila ikala behi.

³ Aho ndugu zake wamulongela, “Halawe hano ugende Uyuda, giladi wanahina zako walole vinzonza viutenda.

⁴ Kilumbo haduhu munhu yasanghane mbuli, kuno kefisa na heyo yolonda wamtange, gweye uhatenda viloto kamba hivo, vinoga wilave mulumwengu!”

⁵ Chanduso na ndugu zake wenyego wakala hawamtogole.

⁶ Yesu kawalongela, “Kimilo changu hakinavika; kidami chenu chabaha sikuzose.

⁷ Mweye imbago haidaha kumwihilani, komu inihila niye, kilumbo noisindila misanghano yake iha.

⁸ Kweleni mweye mkaje sikunghulu: kamba niye, sikwela tanhu haje sikunghulu ino, kilumbo kimilo changu hakinavika.”

⁹ Viyamalile kuwalongela ago, kakala kuko Galilea.

Langulizo da Yesu dohuguzwa na nhegelezo; Inzuma vilumba kuvikizwa kiloho

¹⁰ Kumwande ndugu zake luwamalile kuigendela sikunghulu, ilawa baho na heyo kakwela, si kwa kwilagusa komu kwa kwinyegeleza.

¹¹ Wayuda wakala wamzahila hasikunghulu akuno wolonga, “Ka kwahi ija?”

¹² Kulawilila na minyongʼonyo bwando muja mmadale kilumbo chake. Wayagwe walonga, “Munhu ija kanoga;” wayagwe walonga, “Si vivo, bali kolulusa wanhu waja hawaitangile inzuma.”

¹³ Komu kuduhu yamtambule kimwagaiya, kilumbo wakala wadumba Wayuda.

¹⁴ Hata sikunghulu vivikile kindibwindibwi Yesu kakwela, yomana kwingila mdihekalu kalanguliza wanhu.

¹⁵ Baho Wayuda wakanganya walonga, “Vilihi, aino kaditangaze Jandiko, na heyo halangulizwe?”

¹⁶ Yesu kawedika yolonga, “Malangulizo gangu si gangu nene, bali gake Yuja yangalile.

¹⁷ Munhu yahavumila kugasanghana manogelwa gake, kodimanya langulizo kamba dilawa kwa Mulungu, hebu kamba niye nolonga mbuli zangu mwenyecho.

¹⁸ Heyo yolonga mbuli zake mwenyecho kozahila nhunizo zake mwenyecho; maza yozahila nhunizo zake Yamgalile, iyo yuyo wa ikweli wala mmwake mduhu uponela.

¹⁹ Chevule! Mose hamwinghileni inzuma? Kahi kumwenu haduhu yoivikiza nzuma; mbona molonda kunghoma?”

²⁰ Wanhu wedika, “Gweye kuna kikwale! Iyo yalihi yolonda kukukoma?”

²¹ Yesu kawedika yolonga, “Niye sanghana kinhu kimonga amweye mose mokanganya.

²² Mose kawengha luto lwa kumbi, – si kamba kumbi dija dilawa kwa Mose aka, bali kwa wahenga (Abrahamu) na mweye momwingiza kumbi munhu disiku ja ukuhumula.

²³ Kamba momwingiza kumbi siku ja Sabato giladi nzuma ya Mose sikuibanangike, vilihi mweye monghalalila niye, kilumbo nimtenda munhu yawe mgima kabisa siku ja iSabato?

²⁴ Sikumtaguse kitala cha meso, komu taguseni kitala kilumbile ihoko!”

Kristo kuyalawile hakutangika

²⁵ Baho wayagwe wa Yerusalemu womana kulonga, “Che! aino siyo yuyo iwomzahila wamkome?

²⁶ Lola kolonga kibunhubunhu wala hawamulongele mbuli! Mmanye wakulu wamtanga kweli kamba ino yuyo Kristo?

²⁷ Komu yuno tumtanga kolawa kwahi, bali yaheza Kristo, haduhu yonda yavimanye kuyolawa!”

²⁸ Baho Yesu yomana kubwata mdihekalu yolanguliza kuno yolonga, “He! niye mnitanga, na hiko kundawile mkutanga? Komu niye silawile hanhu hangu mwenyecho, bali Heyo Yangalile yuyo wa ihoko, amweye hamumtanga.

²⁹ Aniye nimtanga, kilumbo ndawa kumwake, na Heyo yuyo yangalile.”

³⁰ Baho wagesa kumgoga, komu haduhu munhu yagolose mkono hambwe yamkwase, kilumbo kimilo chake hakinavika.

³¹ Kileka wanhu bwando muna ididale wamtogola wolonga, “Kwiza Kristo vonda yeze, che, kovidabula vilolomboto bwando kumbanza ino?”

Kristo konda yachole kulihi

³² Luwahulike Mafariseo minyongʼonyo ya wanhu kilumbo chake, aho Wakulu wa Nhambiko na Mafariseo watuma wasongolo giladi wamgoge.

³³ Yesu kalonga, “Kihali kipigiti kidodo nihali baha hamonga na mweye; imala baho nochola kwa Yuyo Yangalile.

³⁴ Kwiza mweye monzahila komu hondamnyone, na kunili niye mweye hamdaha kuvika.”

³⁵ Wayuda welongela, “He! ino kochola kwahi konda tuleke kumona? Mmanye kowagendela awo wapwililike muisi za Wagriki; hebu kochola kuwafunda Wagriki?

³⁶ Mbuli yaki iyopeta, Monzahila honda mnyone, na Kunili niye mweye hamdaha kuvika?”

Yesu heyo yolava mazi ga upile

³⁷ Aluja ludivikile disiku ja ikimambukizo ja Sikunghulu dili nghulu nghani, Yesu kema wima kakomhoka yolonga, “Munhu yohona nghilu, na yeze kumwangu yangʼwe!

³⁸ Yonhogola niye kamba vija Jandiko vidipeta vizanda vya mazi ga ugima vyokuluma vyobwinda kulawa muinda yake.”

³⁹ Na mbuli hiyo kaipeta yotambula iLoho, kwiza waja wonda wamtogole wogolelwa iloho hamwande, kwa mzoko Loho kakala hanakwiza, kilumbo Yesu tanhu hanagolelwa yenzi.

Mesiya vilumba kulawa Betlehemu; Nikodemu kamwimila Yesu kumtaza

⁴⁰ Vuwagahulike malonga gano, wayagwe walonga, “Aino kagamba ayo Mlaguzi Yokwiza.”

⁴¹ Wayagwe walonga, “Yuno yuyo Kristo.” Wayagwe walonga, “Che, Kristo yalawe Galilea?

⁴² Che, Jandiko hadilonga kamba Kristo kokwiza mulukolo lwa Daudi mkiwambo cha Betlehemu kiyakalile Daudi?”

⁴³ Kulawilila mmwagemmwage muna gamadale kwa sosombi yake.

⁴⁴ Wayagwe walonda kumgoga, bali haduhu munhu yagolose mkono wake yamkwase.

⁴⁵ Watumigwa waja wawagendela Wakulu wa Nhambiko na Mafariseo, na hewo wawauza, “Mbona hamumgalile?”

⁴⁶ Waja iwatumigwa walonga, “Hanalonga munhu yoyose kamba yuno viyolonga.”

⁴⁷ Mafariseo wawedika, “Che! na mweye mbitilwa?

⁴⁸ Che, kuna munhu yamvumile kulawa kwa iwakulu na Mafariseo?

⁴⁹ Komu dija didale haditangile Nzuma jodumilizwa!”

⁵⁰ Baho Nikodemo ija yanduse kumgendela Yesu ikilo, na heyo kakala imonga wawo, kawalongela,

⁵¹ “Che, Nzuma yetu imtagusaga munhu kamba tanhu hanategelezwa na kuvitanga viyatendile?”

⁵² Wedika womulongela, “Kumbe na gweye Mgalilea;

⁵³ zahila ubone, kuduhu Mlaguzi yolawa Galilea!” Wachola kila munhu ukaye kumwake.