Yohana 6 - Lagano da Isambi

Wanhu elfu nhano weguswa

¹ Imala baho Yesu kagenda na zake mwambu wa Bahali ya Galilea, nayo iyo ya Tiberia.

² Na madale bwando gamuwinza, kilumbo wagona malolomboto goyokala yowatendela watamu.

³ Na heyo Yesu kakwela kukigongo, kakala hasi hamonga na wanahina wake. Na Pasaka sikunghulu ya Wayuda ikala behi.

⁵ Avo Yesu viyenule meso gake, kagona madale bwando wokwiza kumwake, kamulongela Filipo, “He! tugule kwahi migate, wanhu wano kileka waje?”

⁶ Kalonga gano giladi yamgeze, na heyo kavimanya mwenyego vonda yatende.

⁷ Filipo kamwidika, “Migate ya silingi elfu mbili honda yenele bule, kila imonga yenghigwe kinofu.”

⁸ Baho imonga wa wanahina, Andrea ndugu yake Simoni Petro kamulongela,

⁹ “Hano hana mwana kana migate mitano ya uhemba na visomba vibili, bali choni hicho, wanhu vuwali bwando kamba vino?”

¹⁰ Yesu kalonga, “Walongeleni wanhu wakale hasi!” Na hanhu haja hakala henela milolo; wamana kukala hasi, wambigalo kamba elfu nhano.

¹¹ Yesu yomana kuisola ija migate na kuimoteza, kawengha waja wakalile hasi, na visomba vivija kamba vuwalondile.

¹² Aluja luwegute kawalongela wanahina wake, “Dondoleni awo upakapaka usigale, kinhu sikuchage!”

¹³ Vuwaulundize wamemeza vigelo longo dimwe na vibili vya uja upakapaka wa migate ija usigale vuwadile.

¹⁴ Aho wanhu waja luwawene unzonza uyasanghane walonga, “Baye yuyo Mlaguzi yuja Yokwiza mulumwengu.”

¹⁵ Yesu viyatangile kamba wokwiza wamgoge wamtende mndewa, kasegela kakwela kudigongo yaiyeka.

Yesu kagenda uchana mbahali

¹⁶ Haichungulo wanahina wake wamana kuhumulukila mhwani.

¹⁷ Wengila mngalawa kuloka kugenda Kapernaumu, na ziza disonga kugwa, bali Yesu hanavika. Na bahali isonga kulindimuka kilumbo cha beho dikala dibwinha nghani.

¹⁹ Wamana kugela nhafi zawo, wagenda umwanza wa maili ndatu nne, mhunde wamona Yesu yochola uchana mbahali yokwenhuka behi na ingalawa, na hewo wadumba.

²⁰ Aheyo kawalongela, “Nene hiyo! Sikumdumbe!”

²¹ Na hewo walonda kumbokela mngalawa, wedukila ingalawa ivika iisi ija yowokala wogenda.

Wanhu vuwalondile vijusa, Yesu kalema

²² Siku jekabili jake mtinghanilo wiza wema umwambu wa ibahali, vuwawene kamba zingalawa ziyagwe kuduhu bali imonga, na kamba Yesu hengile hamonga na wanahina wake mngalawa ija, komu wanahina waloka wayeka.

²³ Kumwande ziza ngalawa ziyagwe zilawa Tiberia zivikila habehi na ihanhu haja hawadile migate ija igeligwe luvimbe na Yesu.

²⁴ Basi madale ga wanhu vuwawene kamba Yesu haduhu wala wanahina wake, wamana kwingila na hewo mzingalawa, waloka wavika Kapernaumu na kuno womzahila Yesu.

²⁵ Vuwamuwene mwambu wamana kumulongela, “Mkulufunzi, gweye kuvika hano zuwaki?”

Msanghano wa Mulungu uwo kumgoga Yesu; Yesu yuyo mgate wa upile ulawaga kuulanga

²⁶ Yesu kedika yowalongela, “Togola Togola, nomulongelani, Mweye monzahila si kamba mvyona vijuza, bali vumdile ija migate mwiguta.

²⁷ Sikumsanghanile ndigwa ibanangikaga, bali mgadukile ndigwa ikalaga na upile wa digunge; hiyo iyo ndigwa yonda yamwingheni Mwanage Munhu, kilumbo yuyo yageligwe utango na Tata Mulungu.”

²⁸ Womana kumuuza, “Tweye tutendeze kileka tusanghane kazi yake Mulungu?”

²⁹ Yesu kedika kawalongela, “Msa-nghano wa Mulungu uwo uno, mumtogole Heyo yatumigwe na Heyo.”

³⁰ Hewo wamulongela, “Agweye kotenda unzonza ulihi, tuwone kileka tukutogole?

³¹ Gweye kosanghana choni? Tata zetu wakala wadile Mana ija kuluwala, kamba viyandikigwe, Heyo kawengha ndigwa ilawile kuulanga giladi waije.”

³² Yesu kawalongela, “Togola Togola nomulongelani, Siyo Mose yamwinghileni ndigwa ili kuulanga, bali Tataangu komgwelelani ndigwa ya kweli ilawa kuulanga.

³³ Kilumbo ndigwa ya Mulungu iyo ino ihumuluke kulawa kuulanga na kuigolela iisi yose upile.”

³⁴ Baho wamulongela, “Mndewa, tugolele ndigwa hiyo sikuzose!”

³⁵ Baho Yesu kawalongela, “Niye nene ndigwa ya upile. Yokwiza kumwangu honda yayone nzala ngʼo, na yanhogole niye honda yayone nghilu.

³⁶ Amweye nikala nimulongelani, monyona kileka hamnitogole.

³⁷ Maza wose Tata woyongwelela wokwiza kumwangu, na niye yoyose yokwiza kumwangu simuwinga kunze mbe.

³⁸ Chanduso niye vinilawa kuulanga sizile nisanghane manogelwa gangu aka, komu manogelwa gake Yangalile.

³⁹ Na manogelwa gake Yangalile gago gano, sikunyase hata yumwe mmwao woyoningha, bali nimzuse siku ja ikimambukizo.

⁴⁰ Kilumbo gamnogele Tataangu gago gano, giladi munhu yoyose yomulola Mwana na kumtogola, yawe na upile wa milongo yose, na niye nomzusa siku ya ikimambukizo.”

Wanhu wa kilukuli wehilwa na malonga ga Yesu; Chakuja cha Manna kuluwala hakidahile kuhonya

⁴¹ Waja Wayuda wamana kutwanganika kilumbo kalonga, “Niye nene ndigwa ihumuluke ilawile kuulanga.

⁴² Na hewo walonga, Aino siyo Yesu mwanage Yosefu yuyo itutanga tataake na mamaake? Kolongaze ino kamba Nihumuluka ndawa kuulanga?”

⁴³ Baho Yesu kawedika, “Sikumtwanganike mwemwe kwa mwemwe!

⁴⁴ Haduhu munhu yodaha kwiza kumwangu kamba hakwegigwe na Tataangu yangalile, na niye nomzusa siku ja ikimambukizo.

⁴⁵ Mbuli hiyo yandikigwa muna Walaguzi, Wose wogalamka wafundigwe na Mulungu. Basi ayo yonda yategeleze na kwifunda kwa Tata, kokwiza kumwangu.

⁴⁶ Haduhu munhu yamuwene Tata kamba haduhu Heyo yalawile kwa Mulungu, iyo yamuwene Tata.

⁴⁷ Togola Togola nomulongelani, Yonhogola kana upile uwo wokwiza.

⁴⁸ Niye nene ndigwa ya upile.

⁴⁹ Tata zenu waija manna ija kuluwala, wafa.

⁵⁰ Ino iyo ndigwa ihumuluke kulawa kuulanga giladi heyo yoija sikuyafe.

⁵¹ Niye nene ndigwa ya upile ihulumuke kulawa kuulanga; munhu yahaja ndigwa ino, kokala digunge kwa digunge; na ndigwa yonda ndave niye, lulo lukuli lwangu kilumbo cha ugima wa imbago.”

Tuhabokela lukuli lwa Yesu, togalamka wapile

⁵² Baho Wayuda webamilila wawo kwa wawo wolonga, “Munhu ino kodahaze kutwingha tweye lukuli lwake tuluje?”

⁵³ Yesu kawalongela, “Kingongongo nomulongelani, Kamba hamdile lukuli lwa Mwanage Munhu na kungʼwa mulopa wake, mwa bule na ugima mmwenu.

⁵⁴ Yonda yaje lukuli lwangu na kungʼwa mulopa wangu, kana ugima wa milongo yose, na niye nomzusa siku ja ikimambukizo.

⁵⁵ Kilumbo lukuli lwangu iyo ndigwa ya kwelikweli, na mulopa wangu uwo ungʼwaji wa ihoko.

⁵⁶ Yonda yaje lukuli lwangu na kungʼwa mulopa wangu, kokala mmwangu na niye mmwake;

⁵⁷ Kamba vivija Tata Mwene Upile viyangalile, na niye na Mpile mmwake Tata, vivo heyo yandile niye, kowona upile mmwangu.

⁵⁸ Ino iyo ndigwa ihulumuke kulawa kuulanga, si vija vuwadile wahenga wadanganika; yoja ndigwa ino kokuwa na upile wa milongo na milongo.”

⁵⁹ Malonga higo Yesu kagalonga muna ingʼanda yaukupulila, viyakalile yolanguliza Kapernaumu.

Lukuli lwa kimunhu halufaya; Petro kamtogola Yesu yuyo Mndewa wa idigunge

⁶⁰ Baho wanhu bwando muna iwanahina wake vuwagahulike higo, walonga, “Mbuli ino ngaga nghani, kumbe yalihi mina yonda yadahe kwitegeleza?”

⁶¹ Yesu kavitanga mloho yake kamba wanahina wake woigegedukila mbuli hiyo, kawalongela, “Che! mbuli kamba ino yomkwalani?

⁶² Vokuwaze aho vonda mumone Mwanage Munhu yokwela kuko kuyakalile haikilongozi?

⁶³ Ayo Loho iyo izusa mgalamke wapile; amba lukuli halufaya; malonga ganghalile nimulongelani ago iyo Loho, kabili uwo upile.

⁶⁴ Bali wabaha wayagwe mmwanza wenu wolema kutogola.” Kwa mzoko Yesu kavitanga mwaka kulawa ikinhanga, walihi wolema kutogola, na heyo yalihi yonda yamuhonze.

⁶⁵ Avija kalonga, “Kilumbo hicho leka mana nimulongeleni, Haduhu yovidaha kwiza kumwangu, komu yamotelwe na Tataangu.”

⁶⁶ Giladi ya ago wanahina bwando wahinduka kuchugu, kabili hawelongoze nayo.

⁶⁷ Baho Yesu yawalongele waja Mulongo umwe na Wabili, “Che! na mweye molonda kuse-gela?”

⁶⁸ Simoni Petro kamwidika, “Mndewa, tumgendele nani?

⁶⁹ Gweye kunago malonga ga upile wa digunge; na tweye tuvumila, kabili tuvitanga kamba gweye yuyo Yangʼalile wa Mulungu.”

⁷⁰ Yesu kedika, “Che! simsaguleni mweye Longo dimwe na Wabili? Kumbe imonga wenu iyo Mndumu Satani Mgeza-wanhu.”

⁷¹ Hano kampeta Yuda mwanage Simoni Iskariote, aheyo yonda yamulave, na heyo kakala imonga wa waja Mulongo umwe na Wabili.