Yohana 5 - Lagano da Isambi

Mtamu wa Betizata kagalamka msindi wa Yesu; Kuigoga sabato hebu kumvumila Mulungu

¹ Imala baho kukala na sikunghulu ya Wayuda, na Yesu kachola Yerusalemu.

² Na hiko Yerusalemu behibehi na Umlango wa Nghondolo kukala na lamba tagwa jake Kiebrania Betizata, dina vifuluga vitano.

³ Aho hagati, dale kulu nghani da watamu wakala wotambalala, vimbugumbugu, mbetembete na wene kuholola.

⁴ Wobeta gamazi gatibulwe. Kilumbo aho halawililaga nyidukila, malaika kahumulukaga yokwingila mdilamba, yotibula gamazi; ayo yonda yalongole kwingila mdilamba, mazi gahamala kutibulwa kahona utamu wose wayali nawo.

⁵ Baho hakala na munhu imonga yagogigwe na utamu milongo midatu na minane.

⁶ Yesu viyamuwene yotambalala, na kuno kavitanga ino mtamu wa mazuwa bwando, kamulongela, “Gwe kolonda kuhona?”

⁷ Kedika, “Mndewa, niye nabule munhu wa kuningiza mdilamba, gamazi gahatibulwa; haja hanizaga niye, kolawilila munhu hakisogo, kombanza niye.”

⁸ Yesu kamulongela, “Inuka widikwe lusazi lwako, uchole!”

⁹ Mhundemhunde munhu ija kakala mgima, kedwika lusazi lwake kachola. Na siku hiyo ilinga siku ja ukuhumula.

¹⁰ Kilumbo hicho Wayuda wamulongela yuja yahonyezwe, “Lelo dino Sabato, havilumbile gweye kwidwika lusazi.”

¹¹ Na heyo kawedika, “Ayo yanhendile niwe mgima, iyo yuyo yanongele, Idikwe lusazi lwako uchole!”

¹² Wayuda wamuuza, “Iyo yalihi yakulongele, Idikwe uchole?”

¹³ Ija munhu yahonile hamtangile iyo yalihi, kilumbo Yesu kainega haja, kilumbo wanhu wakala bwando.

¹⁴ Mhunde baho Yesu yomana kumvika mgati mdihekalu, kamulongela, “Uteganye kwa mgima, sikuubwelele kutoza, sikudikugwile kulu dihile nghani kubanza dija!”

¹⁵ Munhu ija kagenda na zake kawapetela Wayuda kamba Yesu yuyo yamuhonyile.

¹⁶ Acho icho kilumbo Wayuda wakala womsepa Yesu, hambwe kagatenda ago mdisiku ja mhumulo.

¹⁷ Yesu kawedika, “Tataangu na dilelo yahalisanghana, na niye nosanghana.”

¹⁸ Kilumbo hicho Wayuda wabanza kuzahila nzila za kumkoma, kilumbo habezile Sabato iyeka, bali hamonga na ago kamkema Mulungu iyo Tataake, na kuno kokiitenda kamba na heyo Mulungu.

Wanhu wafile wozuswa na Yesu

¹⁹ Yesu kawedika yolonga, “Togola Togola nomulongelani, Mwana hadaha kutenda mbuli yali yeka, bali dija diyokona Tata yodisanghana; ago gose goyotenda Tata, Mwana kotenda vivo.

²⁰ Tata kamnogela Mwana, yomulagila zose ziyotenda Mwenyecho, kileka komulagila na misanghano ibanzile hiyo, giladi mweye mkanganye.

²¹ Kilumbo kamba Tata yozusa iwafile na kuwabweza wapile, vivo na Mwana kotenda wapile awo woyolonda.

²² Vilema Tata hatagusa mbuli, bali kitala chose kamwingha Mwana,

²³ giladi wose wamdumbe Mwana kamba vowomdumba Tata. Yolema kumdumba Mwana, hamdumba Tata yamgalile.

²⁴ Kingongongo nomulongelani: Yonda yahulike longa jangu na kumtogola Heyo yanhumile, kana upile wa milongo na milongo, wala havika mkitala, bali kabitila yolawa muifa, kengila muupile.

²⁵ Togola Togola nomulongelani, Kimilo chokwiza na vino chabaha, wafile chondawahulike dizwi da Mwanage Mulungu, na waja wahulike, vivo vonda wawe na upile.

²⁶ Kilumbo vivo Tata viyokala na upile mmwake Mwenyecho, vivo yamwinghile Mwana yawe na upile mmwake mwenyecho.

²⁷ Hamonga na higo kamulagiza yatende ikitala, chanduso heyo yuyo Mwanage Adamu.

²⁸ Sikumkanganye gano, kilumbo chokwiza kimilo chonda wose wali mmapanga wahulike dizwi jake.

²⁹ Wolawa hanze, waja watendile ganogile wozukila ugima, na wayao watendile gehile wozukila ikitala.

³⁰ Niye sidaha kutenda mbuli niiyeka; avo vimhulike, vivija notagusa, na ikitala changu cha kweli, kilumbo sizahila manogelwa gangu niye bule, komu manogelwa gake Yangalile.

Usindi wa Tata ubanza uja wa Yohana

³¹ Niye nihesindila mwenyecho, usindi wangu wa uvwizi.

³² Kahi kakuko Msindi wangu iyagwe nimtangile, na nivitanga kamba usindi wake wonisindila uwo wa ikweli.

³³ Mweye mumgalila Yohana wanhu na heyo kaisindilila ikweli.

³⁴ Kahi niye siubokela usindi wa munhu; higo nolonga giladi muhone.

³⁵ Heyo Yohana kakala yali kiwenge chokwaka na kumulika, amweye mulonda kudenghelela uja umwenge hadodo.

³⁶ Bali usindi unili nawo niye ubanza uja wa Yohana, chanduso sanghano hizo ziyaninghile Tata giladi nizimambukize, azo zino zinitenda, zosindila zenyego kamba Tata kangala.

³⁷ Heyo Tata yangalile kunisindila; mweye wala hamdihulika dizwi jake sikuzose, na kihanga chake hamkiwene.

³⁸ Wala Longa jake hadili mmwenu, kilumbo hamumvumila yuja yagaligwe na heyo.

³⁹ Mweye mololesa Jandiko ja Nzuma, kilumbo mogesa kamba jomwinghani upile wa milongo yose, amba hijo dijo dinisindila.

⁴⁰ Kahi mweye hamulonda kwiza kumwangu muwe wapile.

⁴¹ Niye sivumila nhunizo za walumwengu.

⁴² Bali niwatangani mwabule unogi wa Mulungu mmwenu.

⁴³ Niye niza kwa tagwa ja Tataangu, amweye hamnibokele; kamba munhu yungwa yaheza kwa tagwa jake mwenyecho, ayo mombokela.

⁴⁴ Modahaze kunhogola akuno mkibokeza nhunizo mwemwe kwa mwemwe, na nhunizo ija ilawile kwa Mulungu Yali Iyeka hamwizahila?

⁴⁵ Sikumgese kamba niye nomgelani hakitala cha Tata; kuna yomgelani hakitala, yuyo Mose yumtamanila wenyego.

⁴⁶ Kilumbo kamba mumvumile Mose, muhamvumile na niye, kilumbo heyo yuyo yandike mbuli zangu.

⁴⁷ Bali kamba hamvumile mandiko gake, movumila malonga gangu vilihi?”