Yohana 4 - Lagano da Isambi

Mtwanzi wa Kisamaria kalagilwa mazi ga digunge

¹ Baho mndewa viyatangile, kumbe Mafariseo wahulika kamba Yesu kotenda wanahina bwando kubanza Yohana na kuwabatiza, –

² bali Yesu mwenyecho habatize wanhu, komu wanahina wake, –

³ kauleka Uyuda kachola kubwela Galilea.

⁴ Na heyo vimwandakana yabite hagati ya Samaria.

⁵ Basi kavika kukiwambo cha Samaria kikemagwa Sikari, behibehi na umgunda wa Yakobo uyamwinghile mwanage Yusufu.

⁶ Na hiko kukala na sima ja Yakobo; baho Yesu vija viyadonhile kilumbo cha umwanza wake, kakala hasi ha idisima; aho ikala ivikile saa sita.

⁷ Keza pinga wa Kisamaria kudeha mazi. Na Yesu kamulongela, “Ningha mazi ningʼwe!”

⁸ Kilumbo wanahina wake wakala wacholile kukiwambo kugula chakuja.

⁹ Yuja ipinga Msamaria kamulongela, “Vilihi gweye Muyuda vuupula (mazi) kumwangu ungʼwe, na niye na mtwanzi wa Kisamaria?” (Kwa mzoko Wayuda hawaigondanyaga na Wasamaria.)

¹⁰ Yesu kamulongela, “Kamba uhatangile zingaombwe da Mulungu na heyo yalihi yokulongela, Ninghe mazi ningʼwe, gweye uhampulile heyo, na heyo yahakugolele mazi ga ugima.”

¹¹ Yuja ipinga kamulongela, “Mndewa, kwa bule na kiya cha kudehela, na ikisima kigidikila nghani, avo kogapata kwahi higo gamazi ga ugima? Che!

¹² Gweye kwa mkulu kubanza tafa wetu Yakobo yatwinghile sima dino, na heyo mwenyecho kangʼwa na wanage wose na fugo zake?”

¹³ Yesu kamwidika yolonga, “Yonda yangʼwe mazi gano kwiza kokona nghilu kabili.

¹⁴ Maza yonda yangʼwe mazi gaja gonda nimwinghe niye, honda yone nghilu digunge na digunge, komu gano gonda nimgwelele niye, gogalamka nzokwe za mazi gobwinda mmwake na nghulumo muugima wa digunge.”

¹⁵ Yuja mtwanzi kamulongela, “Mndewa, ninghe mazi higo, sikumbone nghilu, sikumbwele hano kudeha.”

Mpinga kalagilwa matozo, na vonda gasegezwe

¹⁶ Yesu kamulongela, “Genda ukamkeme mkasano wako, wize nayo!”

¹⁷ Yuja imtwanzi kedika kalonga, “Nabule mbigalo.” Yesu kamulongela, “Kulonga goya, nabule mbigalo.

¹⁸ Kumbe kukala nawambigalo wanhano, na hiyo yuli nayo sambi, si mkasano wako; aho kulonga ya ihoko.”

¹⁹ Imtwanzi kamulongela, “Mndewa, nokona kamba gweye kwa Mlaguzi.

²⁰ Tata zetu watambikila hadigongo didi, amweye molonga, kumbe hiko Yerusalemu baho hanhu hatwandakane tweye mnhambiko.”

²¹ Yesu kamulongela, “Mamo unhogole, chokwiza kimilo, chonda kwiza wamtambikile Tata si kuna digongo dino ngʼo wala kuja Yerusalemu.

²² Mweye motambikila vivo hamvitangile, atweye totambika vitumanyile, kilumbo uhonelo ulawa kwa Wayuda.

²³ Bali chokwiza kidami, vilema cha baha, waja wompula Mulungu muikweli, kwiza leka wompula Tata mloho na mwihoko; kwa mzoko Tata kowazahila wanhu wonda wampule vivo.

²⁴ Mulungu yuyo Loho, na hewo womtambikila viwandakana wamtambikile mloho na mwihoko.”

²⁵ Ija mtwanzi kamulongela, “Nivimanya kamba Mesiya kokwiza yokemigwa Kristo, na heyo vonda yeze kotugubulila viloto vyose.”

²⁶ Yesu kamulongela, “Iyo nene nilonga nagwe.”

Chakuja choyolonda Yesu, kimilo cha umulawo

²⁷ Mhunde baho wanahina wake wavika wakanganya, kilumbo kakala yolonga na mtwanzi; bali haduhu yalongile, “Kozahila choni?” hebu “Vilihi ulonga nayo?”

²⁸ Aija mtwanzi yomana kuileka inongo yake bahaja, kagenda kukiwambo kawalongela wanhu,

²⁹ “Izoni mulole munhu yandongele viloto vyose vinhendile, mmanye heyo iyo Kristo?”

³⁰ Basi walawa mkiwambo wamgendela.

³¹ Na kuchugu wanahina wampembela wolonga, “Mkulufunzi, diya tanhu!”

³² Kawalongela, “Niye ninacho chakuja hamkimanyile mweye.”

³³ Wanahina wakala woilongela wao kwa wao, “He! kuna munhu yamgalile mandiya?”

³⁴ Yesu kawalongela, “Chakuja changu icho kino, kugatenda manogelwa gake Yanhumile, haimambukize ikazi yake.

³⁵ Che, hamulongaga mweye, isigale miyezi minne kileka wize umulawo? Avino nomulongelani, Loleni mwinule meso genu, muyone imigunda viili mizelu ilonda kuhunigwa.

³⁶ Na heyo yohuna, kuno yobokela kitumetume, kolundiza ndigwa kuugima wa milongo na milongo, giladi yahandile yadenghelele hamonga na ija yohuna.

³⁷ Avo mina mbuli hiyo ilumba, Imonga yohanda, iyagwe yohuna.

³⁸ Niye nimtumileni kuhuna gaja hamgagaiye. Wayagwe waigaza, na mweye mwingile mmagazo gawo.”

³⁹ Kileka Wasamaria bwando wali mkiwambo kija wamtogola Yesu kwa kimu cha mtwanzi ija yamsindile yolonga, “Kandongela viloto vyose vinhendile.”

⁴⁰ Basi Wasamaria vuwamgendele, wampembela yakale kumwao, kakala hiko siku mbili.

⁴¹ Na wanhu bwando nghani wamtogola kwa sosombi ja Longa jake.

⁴² Wamulongela ija mtwanzi, “Vino sambi tweye tumtogola si kamba mumbuli zako gweye aka, kahi wenyego tuhulika, kabili tuvitanga kamba heyo magambo yuyo Muhonya iisi.”

Mlaguzi muiisi yake kabule nhogolwa; Akida wa Kapernaumu viyamtogole Yesu

⁴³ Mabaho siku mbili zija vizimalile, kasegela hiko kagenda Galilea.

⁴⁴ Kwa mzoko Yesu mwenyecho kesindila kamba Mlaguzi kabule nhogolwa muiisi yake mwenyecho.

⁴⁵ Avo viyavikile Galilea, Wagalilea wambokela goya kilumbo wazona zija zinhuko zose ziyatendile Yerusalemu mu sikunghulu, na hewo wakala waigendela sikunghulu.

⁴⁶ Imala kabwela viyagwe Kana ya Galilea kwayagalule mazi kugalamka ugimbi.

⁴⁷ Kukala na akida imonga Kapernaumu, heyo mwanage kakala mtamu. Aija viyahulike kamba Yesu kavika Galilea kulawa Uyuda, kamgendela kamuhembekeza yeze kumuhonya mwanage, kilumbo kakala behi na kudanganika.

⁴⁸ Yesu kamulongela, “Kamba hamuwene vinzonza na malolomboto, mweye hamtogolaga.”

⁴⁹ Yuja akida kamwidika, “Mndewa, izo mbwisa, mwanangu sikuyafe!”

⁵⁰ Yesu kamulongela, “Genda, mwanago mgima!” Munhu ija kadigoga longa dija diyamulongele Yesu, kagoga nzila kachola.

⁵¹ Na yahali mnzila, kawatinghana nyakadala zake wampetela, “Mwanago mgima.”

⁵² Na heyo kawauza, Saa nyingahi imwana viyahonile? Wamulongela, “Jana saa saba homa imulawa.”

⁵³ Baho ija tata kavitanga iyo saa ija Yesu iyamulongele, “Mwanago mgima.” Kamtogola hamonga na wose wali mngʼanda yake.

⁵⁴ Kino icho kilolomboto chekabili kiyatendile Yesu viyalawile Uyuda kwiza Galilea.